Fundacion Movemento ta Bida ta conoci pa promove actividad fisico y custumbernan pa un bida mas saludabel pa e poblacion di adultonan mayor na Aruba. Durante un conferencia di prensa, Rosa Leon di Fundacion Movemento ta Bida a anuncia e Caribbean Active Aging Congress II (CAAC II). Leon a elabora ariba e enfoke di e congreso y con esaki lo contribui na e bienestar di adultonan mayor na Aruba.

Cinco aña pasa Fundacion Movemento ta Bida a trece su prome Caribbean Active Aging Congress unda cu e enfoke principal tabata pa duna tur e profesionalnan na Aruba y den Caribe e informacion necesario riba e aspecto fisico y general pa adultonan mayor. E importancia di esaki ta pa trece conscientisacion eigenlijk di sa con pa traha cu adulto mayor.

Leon a splica cu CAAC II tin como obhetivo conscientisa y prepara Aruba y Caribe riba e poblacion cu ta enbeheciendo y tambe e retonan cu esaki ta trece cune. CAAC II tin como meta tambe aumenta e habilidad di e adulto mayor pa keda activo, saludabel, y biba independiente den nan comunidad.

Caribbean Active Aging Congress e aña aki lo tuma luga ariba dia 1 y 2 di october. Dia 1 di october ta un dia special pasobra mundialmente dia 1 di october ta celebra Dia Mundial di Adulto Mayor. Tur aña Nacionnan Uni (United Nations, UN) tin un tema pa e celebracion aki y e tema di e aña aki ta resiliencia y contribucion di e adulto mayor femenino.

Leon a remarca cu UN kier pone enfasis riba e rol y e determinacion cu e adulto mayor femenino ta desempeña pa por supera cualkier desafio global y na mes momento contribui pa soluciona esaki cu resiliencia y fortalesa.

“Si nos kier enfoca den e calidad di bida di nos adulto mayor, ta importante pa duna nan e hermentnan necesario pa nan por traha riba nan mesun calidad di bida. Pero e pregunta cu nos tur ta haci ta, nos ta cla pa bira adulto mayor di un manera saludabel?”, Leon a subraya.

Pa cu e pregunta aki, el a indica, CAAC II ta bin cu diferente enfoke, specialmente pa hoben como adulto, con nan por prepara nan mes for di aworaki caba pa ora cu nan yega na e edad di adulto mayor, pa asina biba e calidad di bida cu nan lo mester tin.

Leon a informa cu CAAC II lo tin siete orador local y cuater orador internacional cu ta bay discuti diferente aspecto, por ehempel, diagnosisnan incurabel, con por deal cu esaki y kico ta locual por haci riba dje. Tambe lo amplia riba e aspecto fisico, enbehecimento, aspecto social prome y despues di pensioen, entre otro.

Durante e congreso lo papia riba alternativanan di vivienda y cuido pa cas, con e situacion ta na Aruba actualmente pa loke ta trata enbehicimento y kico esaki kiermen pa Aruba.

Leon a indica cu lo tin un panel tambe di adultonan mayor cu lo enfoca ariba e adulto mayor activo cu tin na Aruba na e bunita edad di 80+, kico nan ta haciendo pa ta activo y contribui den nan sociedad.

Sra. Carmen Bislip, un adulto mayor 90+ cu ta activo den sociedad y ta biba independiente, tambe tabata presenta na e conferencia y a comparti un poco di su experiencia como adulto mayor 90+ activo.

 

Bislip a enfatisa cu no ta paso un persona ta birando bieu, nan no por haci nada mas. El a remarca cu en berdad un adulto mayor no por haci tur cos manera e tabata haci ora e tabatin 18 aña te 20 of 30 aña, pero tin cos cu ainda e por sigui haci.

“Na prome luga no spanta cu bo ta bay bira bieu, cuminsa for di ora cu curpa ta cuminsa mustra bo cu bo no por haci tur cos y cuminsa pensa mas leu”, el a bisa. “Si boso kier sa con pa bira bieu contento, bin dia 1 cu 2 di october. No ta pasobra bo ta bira bieu bo ta sinta y crusa man y bisa mi ta bieu, min’ por sali niun caminda. Mi no por haci tur cos, pero loke mi por haci mi ta haci contento.”

Pa personanan interesa pa inscribi, tin dos forma di inscripcion pa CAAC II. Por pasa na e oficina di IBISA na Frankrijkstraat 1 unda cu e participante lo yena un formulario cu informacion y por haci e pago di biaha. Y via e pagina di Facebook di Fundacion Movemento ta Bida lo tin un link unda cu e participante ta yena su informacion tambe, ta haci e pago, despues ta upload e comprobante di pago cu a haci via banco.

Leon a splica tambe cu tin tres diferente tarifa di entrada pa e congreso. Pa personanan 60+, e costo di entrada ta 25 florin pa tur dos dia di e congreso, studiantenan ta paga 50 florin pa tur dos dia y profesionalnan ta paga 100 florin pa tur dos dia.

“Nos kier conscientisa nos hobennan tambe pasobra si bo kier contribui na un bon calidad di bida na edad di adulto mayor, cuminsa aworaki y prepara bo mes pa bo bienestar ora bo ta un adulto mayor” Leon a agrega.

Por ultimo, Leon a resalta cu Fundacion Movemento ta bida ta sumamente agradecido pa e apoyo y sosten cu fundacion ta ricibiendo y actualmente e fundacion a ricibi un aporte di parti di Ministerio di Transporte, Integridad, Naturalesa & Asuntonan di Adulto Mayor cu a mira e necesidad y importancia pa tene un congreso di e caliber aki pa comunidad. Alabes Leon a tuma e oportunidad pa un bes mas duna un gradicimento na tur colaborado y sponsor.

LEAVE A REPLY

Please enter your comment!
Please enter your name here