Fundacion Preserva Aruba: Dia 1 di juli 2025: 162 aña desde liberacion di sclavitud na Aruba

Awe dia 1 di juli 2025, Fundacion Preserva Aruba ta conmemora 162 aña di liberacion di esclavo transatlantico den Reino Hulandes. Cu e articulo aki ta comparti algun informacion y e ley di abolicion na e lesado di e corant aki.

Segun e cifranan di CBS 47.000 hende a wordo libera na Surnam y e islanan Hulandes Caribense riba dia 1 di juli 1863. Na Aruba 487 nombernan a keda registra den e registro di catibo como vrijgemaakte. Akibao bo por lesa e ley di abolicion di dia 8 di augustus 1862.

E shon/doño

Den e ley bo por lesa cu e shon/doño di e catibo a haya un recompensa pa cada di e catibonan cu e por a proba cu nan ta di dje y kico e mester a haci pa ricibi e recompensa aki. E a haya pa cada catibo 200 florin. E catibo mester a ta na bon salud, e no mester a tin straf of cu e a huy. Baby cu a nace despues di 1 di juli 1863 no ta considera di ta un esclavo pa ken e shon/doño por ricibi placa pe. E siguiente articulonan ta atende cu e parti di e ley cu ta mara na derechonan y debernan di e shon/doño: 2, 3, 4, 5, 6, 7, 8, 9, 10, 11, 12, 13, 14, en 15.

E Catibo

Tabata rekeri di e catibo cu e bin cu un fam pa su mes y su famia cu ta unico den colonia. E a ricibi un muestra di su inscripcion den registro como ciudadano di e colonia. E por a keda cu e paña riba su lomba y otro cos cu segun custumber colonial ta pertenece na e catibo. E no mag di cana riba caya sin nada di haci. Solamente cu permiso y por a carga un pistol. E mester a traha cuater dia pa siman pa e doño di e cas den cua e tabata biba aden.

E siguiente articulonan ta atende cu e parti di e ley cu ta mara na derechonan y debernan di e catibo: 16, 17, 18, 19, 20, 21.

Capitulo 1

Articulo 1 y 2. E fecha di abolicion di sclavitud y e promesa di un recompensa pa e shon/ doño.

Capitulo 2

Articulo 3. Trinta dia despues di e publicacion di e ley e shon/doño mester a entrega locual na ta yama e borderel van aangifte. Den esaki e shon/doño ta menciona e nomber di e plantacion, e nomber y luga unda e mes ta biba, y e siguiente informacion di e catibo: nomber, sexo, edad, ofishi, religion y su pertenencia. Tambe mester entrega e nomber di e catibonan cu tabata tin derecho riba manumission.

Articulo 6. Na Aruba e shon/doña a ricibi u recompensa di 200 florin pa cada catibo.

Articulo 7. Pa e shon/doña ricibi e recompensa un catibo cu tabata malo mester wordo declara bon na salud door di tres doctor. E shon/doña no ta ricibi un recompensa tampoco si e catibo a huy, si e tin straf of pa un baby naci despues di e publicacion di e ley.

Articulo 8. E recompensa ta inclui e pertenencia di e catibo. E catibo ta bira doño di su pertenencianan.

Articulo 9. E shon/doño ta haya inzage den e decision di e gobernador basa riba e borderellen van aangifte.

Articulo 10. E shon/doño por bay contra e decision di e gobernador na e gezaghebber dentro 14 dia.

Articulo 11. E shon/doño mester splica su motibonan dentro 14 dia sino e ta perde su derecho. E shon/doño cu kier splica dicon e no ta di acuerdo cu e prijs di e Gobernador pa su catibonan y cu ta biba na Aruba mester acudi na e corte na Corsou.

Articulo 12. E shon/doño ta ricibi e recompensa dentro 3 luna despues di e abolicion di sclavitud.

Articulo 14. E shon/doño ta perde su derecho riba e recompensa dentro 4 aña.

Capitulo 3

Articulo 16. E catibo cu lo wordo libera ta duna su mes y su famia e mesun fam. Nan ta ricibi un muestra di inscripcion cu e number di inscripcion, nan fam y nomber, y e fecha di nacemento of edad.

Articulo 17. E ley civil ta aplicable riba e catibo cu a wordo libera.

Articulo 18. E catibo cu a wordo libera ta wordo considera un ciudadano di e colonia.

Capitulo 4

Articulo 19. E gobierno di Hulanda ta stimula educacion di godsdienst y scol.

Articulo 21. Si un catibo cu a wordo libera cana riba caya sin nada di haci ta starfbaar.

Articulo 22. E shon/doño ta obliga di duna su catibo cu a wordo libera un luga pa biba pa por lo menos 3 luna despues cu su liberacion of paga pa e por biba na un otro luga. E catibo cu a wordo libera mester traha 4 dia pa siman pa e doño di e cas.

Articulo 23

Catibo libera cu ta den necesidad ta haya ayudo di e bestuur.

Articulo 26

Prome cu dia 31 di juli 1864 e minister di e colonia ta manda un reportahe di e uitvoering di e ley di 1 di juli 1863 na e Staten Generaal cu lo wordo publica den e staatsblad. Tur ambtenaar envolvi den e reportahe mester haci un bon trabao.