Recientemente Bon Dia Aruba a publica un articulo den cual a trece un situacion caminda un turista Koreano a ser ataca pa un cacho los. E atake riba e turista Hyungmin Seo ta ilustra e severidad di e problema di cacho los riba caya y tambe e fayo grandi den e maneho pa cu esaki. Fundacion Snoop Doggy ta un fundacion relativamente nobo, pero igual cu varios otro fundacion di bestia na Aruba, ta mira e necesidad pa un solucion rapido pa e problematica ki.

Hyungmin Seo tabata di bishita recientemente na Aruba y un atardi el a dicidi pa subi su mountain bike pa haci un recorido, pero durante e recorido aki el a ser ataca pa cachonan di caya cu a tabata na e dump na Parkietenbos.

Lamentablemente despues cu e cachonan a ataca e turista, ningun persona den cercania a ofrece ayudo y pues e turista mester a tuma contacto cu otro persona pa asina ricibi asistencia. A pesar cu a purba di tur manera pa haya sa ken ta responsabel pa e incidente aki cu a laga e turista hopi afecta, esaki no a logra.

Finalmente a yama polis cu a avisa ambulance pa hiba e turista pa hospital unda el a haya hangua contra tetanus, y pa a haci su heridanan limpi.

E turista tabata hopi rabia pa e falta di responsabilisacion y tabata cla pa denuncia Aruba pa e maneho riba cacho los internacionalmente. Pero danki na e ciudadano Jair Britten, ken ta esun cu a yuda e turista Koreano, a dicidi pa informa ATA di e incidente, cu tin un team pa canalisa tipo di kehonan asina.

E problema di cacho los riba caya ta uno cu tin hopi aña tin atencion, pero lamentablemente no a bin cu un solucion pa esaki. E censo piloto di CBS realisa na 2019 a mustra cu molester causa pa cacho riba caya tabata number dos di e top cinco, concluyendo asina cu a pesar cu na 2015 Ordenansa di Cacho a drenta na vigor, e problema ta persisti.

Na maart di 2019 e problema di cacho y pushi riba caya a ser declara como urgente en conexion cu e asina yama “kill cage” e tempo ey y e epidemia di cacho cu tabata reina na Aruba. Na 2019 tambe a institui e Comision di Accion pa Regulacion di Cacho, pero te ainda, seis aña despues, e problema ta persisti sin un solucion den bista.

Despues di e publicacion di e articulo treciendo dilanti e caso lamentabel di atake di cacho riba e turista Koreano, Fundacion Snoop Doggy a expresa nan punto di bista y a trece dilanti nan preocupacion tambe pa cu e situacion critico relacion cu e problema di cacho y pushi riba caya.

Fundador y presidente di Fundacion Snoop Doggy, Esther van der Put-Freen ta conta cu e fundacion ta enfoca riba educacion di mucha, pasobra cambio real ta cuminsa cu conocemento y conscientisacion. El a remarca cu ora muchanan siña kico cuido di bestia apropia ta nifica, nan ta carga e balornan ey cu nan pa resto di nan bida. El a agrega hopi biaha, mayornan tambe ta busca algo na caminda – loke el a enfatisa ta un bunita bonus.

“Den e dos-plus añanan cu nos fundacion ta activo, hopi cos a ser alcansa caba. Nos a publica dos foyeto educativo bilingual, y un di tres ta casi cla. Danki na sosten di sponsornan corporativo, nos por print y distribui e foyetonan gratis,” el a indica.

Van der Put-Freen a splica cu hopi negoshi ta haya importante pa contribui y asina sostene educacion di mucha. El a sigui splica cu hunto cu nan cacho mascota, Rohan, nan ta duna presentacionnan den klasnan regularmente y mas scolnan ta acerca nan pa nan haci bishita, y programanan despues di scol y vakantie campnan di zomer y ta pidiendo tambe nan caha di educacion. “Ta maraviyoso pa mira cu e demanda pa educacion ta creciendo y cu nos materialnan ta ser usa mas ampliamente. Banda di e di tres foyeto, nos tin tambe un otro proyecto dibertido y educativo den pipeline,” el a agrega.

No obstante, e organisacion ta enfatisa cu sin envolvimento activo di gobierno, poco lo cambia. Van der Put-Freen ta enfatisa cu hopi problema ta bini di ignorancia, pero tambe di e manera cu bestianan hopi biaha ta ser percibi: no como miembronan di famia, pero como un sistema di alarma conveniente.

Ademas di esey, el a indica, hopi biaha hendenan no tin e medionan financiero pa laga nan bestianan ser sterilisa/castra of pa cuida nan corectamente. El a señala cu demasiado biaha nan ta mira cacho y pushi ta ser regala of na benta, e mama ta sali na estado atrobe djis algun luna despues, y e ciclo ta ripiti su mes. Tambe, el a indica, cu ora hende ta muda tin biaha nan ta simplemente laga nan cacho of pushi atras – como si fuera ta un cashi of stoof bieu. El a agrega cu nengamento di castra cachonan macho, pasobra e ta ser considera “no machista,” tambe ta un tema grandi na Aruba.

“Den nos bista, e problema mester ser atendi ampliamente. Sterilisacion y castracion ta clave. Varios organisacion, manera AWAA, Stimami Sterilisami, y Fundacion Luna, ya ta ofrece e servicionan aki gratis of na costo abou. Pero tanten cu gobierno no duna informacion amplio y regulacionnan cla, e ta keda un caso di keda saca awa mientras cu e cranchi ta habri ainda,” el a subraya.

Van der Put-Freen a enfatisa cu pa e motibo ey Fundacion Snoop Doggy ta boga pa un combinacion di medida: educacion y informacion ta crucial – por ehempel, propagandanan cortico den primetime na TeleAruba of mensahenan impactante riba borchinan di propaganda. Ademas, el a indica tin mester di un base di dato cu ta funciona bon cu registracion di microchip obligatorio, reglanan y permisonan pa cria di cacho, y riba tur cos, un ley di bienestar di bestia cu realmente ta ser aplica, incluyendo boet pa esnan cu ta ignora e reglanan.

“Esakinan kisas no ta topiconan popular, pero nan ta di necesidad urgente. Pa un isla chikito manera Aruba, ta inaceptabel cu bienestar di bestia ta un tema asina grandi. Solamente door di atende tur aspecto hunto nos por haci un diferencia di berdad,” el a finalisa.