Riba 28 di october 2025 a tuma lugar e presentacion di e “Sleepover Project”. Un grupo grandi di maestro y director tabata presente pa tende mas tocante e proyecto nobo cu lo ta hopi educativo.
Den e ultimo 2 añanan, Fundacion Snoop Dogg ya bin ta publica y reparti diferente buki educativo na tur scol basico rond di Aruba. Pa pone e teoria den practica, e Fundacion a dicidi di introduci e “Sleepover Project” – un experencia nobo y practico pa siña muchanan loke berdaderamente ta nifica pa cuida un mascota.
Tur weekend, un alumno di 2de klas lo hiba e peluche di Snoop Doggy cas, cas hunto cu un buki di actividad/tarea. Tambe e alumno lo haya un tas unda tin diferente articulo pa cuida e peluche p.e. un leash, baki di awa y cuminda y mucho mas. E idea patras di e proyecto ta pa yuda muchanan compronde loke ta significa pa tin un mascota. Cu esaki no simplemente kiermen pa laga e mascota den cura pero cu esaki ta encera pa dun’e cuminda, awa, atencion y hopi amor.
Pa finalisa e proyecto, e alumnonan lo participa den un role-play den klas unda cu lo tin e posibilidad di bisti como un veterinario, cumpra cuminda di cacho cu moneda di Snoop Doggy y mucho mas.
Si ta desea di participa na e proyecto of kier duna un man, por tuma contacto cu Fundacion Snoop Doggy nafoundationsnoopdoggy@gmail.com of 592 0642.
