Fundacion Zinnia ta presenta campaña Supla pa Bida; “No solamente pa mi bida, sino esun di otro tambe”

Bon Dia Aruba tabatin e placer di sinta cu presidente di Fundacion Zinnia, Sra. Michella Croes-Matos, ken a presenta e fundacion su campaña Supla pa Bida, cual ta carga e meta di trece conscientisacion pa stuur bao influencia di alcohol.

Sra. Croes a cuminsa ta conta cu Fundacion Zinnia a lanta 10 aña pasa despues di e perdida tragico di Zinnia, ken a perde su bida den accidente causa pa un persona cu tabata bao infleucna di alcohol, “despues di esey nos a pensa kico di algo hopi malo, kico nos lo por saca afo pa cu nos traumaproces. Asina Fundacion Zinnia a lanta, caminda cu nos kier conscientisa hende cu e ta ok pa fiesta pero pa ta consciente.”

Fundacion ta bin ta trahando riba e area aki for di hopi tempo caba, cu partnersnan manera Amigo Didi, cual “ya caba eigenlijk ta hopi grandi riba e isla. Amigo Didi ta cana riba su mes. Tur hende ta conoce Amigo Didi, ora bo papia di Amigo Didi nan sa precies mane ‘aha e persona cu no ta bebe’. Aworaki despues di 10 aña cu nos tin ta trahando pa e parti di conscientisacion aki nos ta bin cu un proyecto nobo cu ta cay bao di e umbrella di Amgio Didi, yama Supla pa Bida,” Sra. Croes-Matos a comparti.

Tocante e campaña, el a splica cu “esaki ta un personal ‘breathalyzer’ caminda e ta pa uso di un biaha so. E personal breathalyzer aki su idea ta, ban supone awe bo a sali pero bo no a sali cu e intencion di bebe mes, bo por ta na un fiesta … di 3, 4, 5 ora y na cuminsamento bo ta bisa mi a bebe 2 cerbes pero mi ta lag’e sali for di mi sistema, pero bo tin duda. E manera cu bo ta haya sa si bo ta apto pa stuur ta di supla na e breathalyzer y esaki ta indica si berdad bo por stuur si of no. Si bo no a pasa e limite.”

Algo sumamente clave y necesario ta cu riba e breathalyzer personal aki, tin e informacion conforme ley y “asina cu e duna e indicacion cu e ta berde, esey kiermen bo no por stuur.” Na su turno, esaki kiermen cu “nos ta bay back na plan A cu ta #amigodidi. Esaki ta un herment di prevencion pa haci hende consciente di nan mesun actonan y cu nan ta responsabel pa nan actonan. Bo ta laga e responsabilidad den nan mesun man,” Sra. Croes-Matos a splica.

Esaki no ta un trabao completamente nobo pa e fundacion, mirando cu “den pasado nos a bin cu esaki caba, mi ta pensa 7 aña pasa” y e acogida pa esaki tabata uno “hopi bon den comunidad.” Awo e campaña a cuminsa y lo keda cu un duracion di 3 luna, cual a cuminsa core dia 14 di nvoember, un fecha cu e fundacion a scoge pa motibo cu “dia 16 di november tabata Dia Internacional di Victima di Trafico, pues nos a habri e campaña cu un motibo.”

Pa loke ta trata e disponibilidad di e breathalyzer personal aki, Sra. Michella a splica cu pa awo e ta gratis, pero despues di e 3 luna lo haci un evaluacion di con e proyecto a bay y lo tuma den consideracion laga esaki disponible pa un suma rasonable.

E intencion di e campaña aki ta “cu por bisa mi ta pasa cumpra benta 5 den auto, paso mane mi ta bisa e, ta yama Supla pa Bida, no solamente pa mi bida sino esun di otro tambe. Esaki kiermen cu si otro hende cu toevalig bo conoce y bo a wak cu el a dal drinks, bo por bis’e ‘wak mi tin algun item den auto, laga’mi coy e p’abo por supla un rato’. Nos mester ta mas uni cu otro y wak mas pa otro tambe,” el a expresa.

Den e 3 luna aki fundacion Zinnia lo ta presente tambe cu verkeerscontrole, “nos a cuminsa diabierna cu a pasa, el a bay hopi bon. Tabatin aanhouding, hende cu a supla tambe … Nos tabatin un team tremendo. E samenwerking tabata hopi bon y nan a gusta e concepto asina hopi cu nan mes ta bisa nos mester haci esaki hunto,” Sra. Michella a comenta, agregando cu “ta bunita pa mira eigenlijk con fundacion y nos partnersnan cu ta asina grandi den comunidad a acepta esaki y crece hunto cu nos.”

E proyecto aki ta uno cu no solamente ta centra riba yuda un persona, sino di tambe cuminsa crea habitonan nobo cu lo drenta nos rutina poco poco y lo haci nos mas responsable. Sin temporada festivo caba nos ta mira varios accidente prevenibel cu aunke nan no ta mortal, ta keda accidente cu ta laga daño atras y a pone hende su bida den peliger.

“Nos no ta papia precies cu mester tin un victima, esaki ta mas cu claro, un ta dimas. Locual cu ta keda atras aunke no tin victima, ta e parti traumatisch … Nos kier conscientisa hende cu no mester warda pa algo pasa pa nos ta consciente,” Sra. Croes -Matos a declara.