Recientemente Fundacion Zinnia a saca e documentario “Bida ta Sigui” cu tin como meta no solamente informa, pero conscientisa tur famia cu a yega di perde un ser keri pa motibo di un chauffeur cu tabata core auto bao di influencia cu bida ta continua.
Ya ta 10 aña di fayecimento di e hobencita Zinnia Croes ken a perde su bida despues cu el a ser alcansa pa un chauffeur cu tabata tras di stuur bao di influencia. Mayornan di Zinnia a lanta Fundacion Zinnia y a traves di e fundacion tabata enfoca riba conscientisacion tocante stuur bao di influencia.
Aworaki Fundacion Zinnia a anuncia cu nan ta saca e documentario “Bida ta Sigui” caminda famia di Zinnia ta habri nan portanan pa Aruba conoce y siña kico e famia a pasa den dje despues di e fayecimento lamentabel di Zinnia.
Den e documentario e famia y sernan keri di Zinnia ta papia tocante ki consecuencia un accidente y un persona cu ta maneha y ta haci escogencia pa core auto bao di influencia di alcohol tin no solamente pa e mama, tata y ruman di Zinnia, pero tambe tur hende cu tabata rond di dje.
Ademas e documentario ta toca tambe e tema di salud mental cu ta un parti importante ora cu famia ta pasa den trauma manera perde un ser keri, un yiu.
E meta tras di e documentario ta pa duna algo na e famianan back cu ta pasa den situacionnan similar y enfoca riba motiva y conscientisa tur famia cu a pesar di e dolor bida ta continua.
