Fundacionnan di Venezolano a bira organisadonan di ayudo humanitario

ORANJESTAD – Manera ta conoci, nos pais bisiña Venezuela ta biba e pio crisis humanitario, social y politico den añanan aki. Un iniciativa di parti di e comunidad internacional pa alivia miles di Venezolano cu ta sufri pa via di escasez di alimento y falta di medicina, tambe a alcansa Aruba.

Durante un conferencia di prensa di e fundacion VeneAruba Solidario, hunto cu e fundacion Venezolanos Unidos en Aruba, a duna di conoce ayera cu Fundacion Venex Curaçao a haya un invitacion di parti di e Asamblea Nacional di Venezuela, cu tambe a haya autorisacion di e gobierno di Hulanda, pa bira un organisado di ayudo humanitario.

Asina a splica Grisslyn Hernandez, presidente di e fundacion VeneAruba Solidario, kende a bisa cu e ayudo humanitario tin tres centro di acopio, un di nan ta un isla di Caribe cu ta Corsou.

Tambe a bisa cu fundacion VeneAruba Solidario a ricibi un carta di parti di Venex Curacao pa complementa e ayudo aki, cual Hernandez a acepta inmediatamente.

El a invita e comunidad henter, sociedad civil, tur persona cu lo kier forma parti di e ayudo humanitario na Aruba, pa despues nan por manda tur e ayudo pa e entro di acopio na Corsou, un di e tres centro di acopio mundial cu a ser yama door di Asamblea Nacional y e presidente encarga di Venezuela, Juan Guaido.

Hernandez a splica cu nan lo haci un evento dia 23 di februari. Nan a crea un grupo di chat pa e personanan cu ta interesa pa ta parti di boluntario, el a bisa cu tur e boluntario lo traha cu un comision pa por haci e ayudo aki, manera e linemento ta bisa, directamente di Asamblea Nacional y tambe di Venex Curacao, cu tambe ta trahando na conhunto cu e islanan ABC.

Di e mesun manera, el a comenta cu nan lo bay tin na luganan specifico un box identifica, unda hende por laga e donacion pa e ayudo.

Di loke ta trata e insumo cu e personanan lo por yuda ta: hariña di maishi, aros, pasta, azeta, sucu, lechi pa baby, cereal, medicina, entre otro; esaki lo yuda na Venezuela esunnan mas vulnerabel, muchanan di 0 pa 5 aña cu no tin lechi, medicina pa e personanan cu ta sufri di malesa cronico.

Luis Lizarraga, ken ta vice-presidente di e fundacion VeneAruba Solidario, a expresa su gradicimento pa e personanan cu ta forma parti di e boluntario pa e ayudo na Aruba. El a splica cu ta existi un marco legal cu a inicia na Hulanda di loke ta trata un ayudo humanitario. Lizarraga a comenta cu pa via di e marco legal ey, tur ayudo humanitario tin cierto reglanan cu Asamblea Nacional di Venezuela a impone pa e donacion lo por yega na su destino sin problemanan.

Hernandez a agrega cu loke ta trata cu e donacion cu nan lo ricibi e dia 23 di februari, nan ta conforma comisionnan pa despues nan por hiba tur e insumonan pa un container, cu lo hiba tur e ayudo pa Corsou.

Tambe el a bisa cu e actividad aki nan lo haci como fundacionnan di Aruba y Corsou hunto cu sociedad civil, nan no tin apoyo di parti di e gobierno di Aruba.

Di otro banda, e presidente di e fundacion Venezolanos Unidos en Aruba, Marllori Medina, a bisa cu e ayudo humanitario ta hopi importante pa Venezuela, specialmente pa e muchanan y hendenan grandi, cu ta e poblacion cu mas ta sufri pa via di escasez di alimento y medicina.

Medina a duna di conoce cu 36 muchanan ta muri pa dia, di cancer of desnutricion, na ciudad di Caracas y Punto Fijo, pa motibo cu nan no tin e remedi of cuminda cu nan mester.

 

 

 

 

 

You May Also Like

Dep higiena hubileo Br.jpg

Departamento di Higiena mester di mas personal y instrumentonan

Diabierna anochi departamento di Higiena a celebra su 80 aniversario di existencia.   E ...

27Mei, JO, EAGLE 2.JPG

Tiramento di sushi na Eagle Beach a cuminsa bira un tradicion

Tiramento di sushi riba beach nan rond di Aruba a cuminsa bira di mas ...

prome (2).JPG

Confusion y disgusto durante prome dia di solicitud na Citgo Desk

Manera a wordo informa cu dia 10 di october lo cuminsa tuma solicitud na ...

5oct pisamento funcion Ansa.jpg

Trahadonan di toren di control tin te 31 december pa dicidi si ta bay den ANSA of no

ORANJESTAD – Mediador di Gobierno, Sr. Anselmo Pontilius a expresa su positivismo riba e ...

Caso di depresion post parto mester di atencion mas profesional na Aruba

Un embaraso ta exigi cierto preparacion cu e pareha mester tene cuenta cu nan. ...

img_1443134715_617.jpg

CITGO ‘preocupa’ con lihe por haya Arubianonan bek pa traha na Aruba

ORANJESTAD – E compania CITGO ta precupa con lihe por haya arubianonan den exterior ...