ORANJESTAD – Den e dianan aki tin hopi atencion atrobe pa e situacion na San Nicolas, relaciona cu e refineria, si acaso esaki tin un futuro, ainda.

E prome comentarionan tocante un posible ‘Plan B’ a cuminsa resona, y en berdad ta un momento oportuno pa bolbe riba e tema aki. Esaki den pasado reciente tambe a haya atencion, aunke no tanto di banda di gobierno, cu tabatin su mente fiha riba reapertura di e refineria, y e aspectonan cu por a combina cu esey. E perspectiva ey a cambia y ta bon pa laga nos pensamento pasa riba kico nos por haci, y esey pa un motibo importante. Na prome lugar San Nicolas, e parti mas afecta di nos isla den e ultimo decadanan, ta e tarea y responsabilidad number uno di cualkier gobierno cu ta bisa cu nan tin interes di nan pais na pecho. Y na di dos lugar, San Nicolas ta ofrece e miho oportunidadnan pa realisa crecemento sano y duradero den e proximo decadanan, combinando asina obligacion moral cu oportunidad real.

Cu e pensamento aki, na maart 2013 Camara di Comercio, cu aporte di varios persona y instancia, a presenta un plan alternativo pa e tereno di e refineria. A trece e idea di lanta un compania, cu e nomber San Nicolas Development Authority, cu lo por tabata parcialmente propiedad di Pais Aruba, pero tambe por a duna e posibilidad pa ciudadano di Aruba cumpra accion (shares) den e compania aki. Di e manera ey lo a crea algo cu di berdad ‘ta di nos’ y cu ta trece hunto e capital necesario pa e compania inverti den e actividadnan nobo. Parti di e plan aki awendia por ta mas dificil pa realisa, den e sentido cu e propiedad a pasa pa e compania estatal Refineria di Aruba NV, pero si nos ta tuma como realidad y punto di salida e desaparicion di e refineria, lo por modifica metanan di e compania RdA NV.

Pero, den e articulo aki, nos lo kier enfoca mas tanto riba e posibilidadnan cu e plan di KvK tabata señala seis aña pasa relaciona cu e facilidadnan portuario, y kico ta otro elemento cu por añadi na e momento aki. E plan di KvK, yama “Aruba without a refinery…, planning creates opportunities”, tabata trata exclusivamente e tereno di e refineria. Awor, tanto aña despues, ta obvio cu no por keda sin elabora un plan completo y integra di San Nicolas, incluyendo e tereno di e refineria, pero nos lo atende esey na un proximo oportunidad.

E plan pa e tereno di e refineria tabata contene cierto opcion pa uso di e facilidadnan portuario:

  1. Mantene e facilidadnan di transshipment di crudo;
  2. Mantene e haf existente;
  3. Posibilidad di crea un haf nobo di transshipment di container.

Na e 3 elementonan aki lo por añadi:

  1. E terminal di fast ferry;
  2. Posibilidad pa mantenimento/reparacion di barco;
  3. Posibilidad pa yachting (staciona/mantenimento).

Pa elabora mas riba e puntonan menciona: e transshipment di crudo por simplemente keda y por haci esey parti di e compania di desaroyo), pa desde prome momento genera ganashi (pa Aruba).

Nobo lo ta un haf nobo pa transshipment pa container, considerando varios aspecto. Uno ta cu transporte di container ta bira mas importante y concentra den nos region – cerca di Panama – sigur si e plan pa e canal na Nicaragua no bira realidad. Mester explora esaki. Ademas, di tur manera Barcadera ta demasiado chikito pa duna posibilidad pa acomoda barco di container mas grandi. San Nicolas tin na entrada di e bahia, pariba di e area di terminal di crudo, un parti di costa cu nunca tabatin uso y cu ta apto pa acomoda varios barco di container pareu, ademas di otro carga cu tampoco no por drenta Barcadera y cu ainda ta mara na Playa. Den e sentido aki Barcadera tabata un escogencia cuestionable, pasobra e no por sirbi como puerto pa barco mediano o grandi. E haf di San Nicolas ta mas grandi y mas hundo y ademas ta uno natural, cu no ta yena cu santo.

Cruise port

E haf existente por sirbi tambe como port of call pa crucero, sigur si ta pensa riba un rehabilitacion di centro comercial di San Nicolas, cu por ehemplo e creacion di un ‘waterfront’ na e parti aki. Mester mantene si e posibilidad tambe pa baha combustible cu ta yega pa consumo na Aruba mes, eventualmente combina cu bunkering. E area aki ta hopi cerca di e centro comercial di San Nicolas y por combina esaki bon cu duna bida nobo na e centro aki, inclusive un ‘waterfront’ den e parti aki.

Reparacion di barco y yachting
Tin espacio tambe pa crea mas facilidad, por ehemplo di yachting, unda por combina mantenimento y reparacion cu lugar pa staciona yate, den e parti mas pariba di e actual tereno di refineria. Riba costa Colombiano yachting ta birando un sector importante, y lo ta interesante pa explora e posibilidad pa haci e islanan (Aruba, Bonaire y Curaçao) conhuntamente mas atractivo pa e forma di turismo aki. Igualmente e posibilidad di reparacion y mantenimento di barco; aki tambe lo mester explora posible demanda.

Fast ferry
E plannan pa un fast ferry por keda incorpora perfectamente den un plan total pa San Nicolas y lo ta otro elemento mas den un area cu varios actividad portuario diferente. No ta necesario laga un actividad cay pa sigui cu otro.

Riba tera
Banda di e facilidadnan portuario, e tereno di e refineria lo brinda posibilidad pa varios actividad industrial/comercial. Pa esaki lo ta disponible e area unda actualmente e refineria mes ta. Despues di e limpiesa cu mester tuma lugar por destina esaki na otro industria liviano, no contaminante. Ta recomendable tambe pa muda e tankinan na parti pariba, cu ta usa actualmente pa warda diferente combustible pa distribucion na Aruba, pa e area net pariba di e transshipment di crudo. Asina henter e area parti pariba ta keda completamente liber pa otro actividad.

Conclusion

Den e resumen (y update) aki di e plan di KvK 2013 nos a limita nos mes mas tanto na elabora riba kico por haci a base di e posibilidadnan cu e haf mas grandi y mas bunita di Aruba ta brinda. Pero esey no ta tur. Lo ta un eror pa contempla mehoracion y desaroyo di un ciudad – pasobra esey e ta – solamente for di punto di vista di su posibilidadnan economico. Un desaroyo sano socio-economico di San Nicolas ta encera hopi mas cu loke a trece dilanti den e articulo aki. Den un proximo articulo lo enfoca mas riba e otro componenentenan di e desaroyo urbano cu San Nicolas mester, pa deshaci di varios decada di negligenci y olvido. No mester lamenta e desaparicion di e refineria, pero aprecia e alternativanan cu su desaparicion ta brinda.