Gabinete AVP-FUTURO a anuncia trayecto di flexibilisacion den maneho di admision pa indocumentado drenta mercado laboral

Durante un conferencia di prensa di Gobierno di Aruba, Minister di Husticia, Integracion y Transporte Publico, Arthur Dowers a anuncia un trayecto di flexibilisacion di maneho di admision na Aruba. E trayecto aki lo duna persona indocumenta na Aruba e oportunidad pa drenta mercado laboral.

Minister Dowers a splica cu manera ya ta conoci, algun siman pasa Gobierno di Aruba a tuma e decision pa suspende temporalmente loke ta conoci manera e “arbeidsmarkttoets”. Esaki tabatin como meta pa yuda baha e presion cu tin den mercado pa loke ta trata falta di personal, pero asina mes no a logra e resultadonan cu tabata spera.

E mandatario a indica cu den ultimo añanan no tabatin un maneho optimal den e sector aki y esey a haci tambe cu a bira dificil pa por mantene e maneho. Pa e motibo aki, gobierno a tuma e decision, pa baha e presion grandi y creciente den mercado laboral, di facilita e proceso door di duna permiso na hendenan cu ya ta den e mercado laboral sin e toets.

Aworaki gobierno a yega na e siguiente fase caminda ta constata cu e presion, cual nan a spera di baha, no a baha suficiente, y toch ta mira cu den mercado tin hopi persona indocumenta cu ta traha na e momentonan aki.

Gobierno di Aruba a tuma e decision pa flexibilisa e maneho di permiso pa cierto persona. Esta esnan cu ta trahando indocumenta, cu ta presente na e pais, cu por yega na un dunador di trabao. Y aunke na e momentonan aki e persona a keda mucho largo na e pais, gobierno no lo bay over na nenga e permiso.

Minister Dowers a splica cu un persona cu ta na Aruba caba, cu a yega Aruba prome cu dia 1 di juli, y cu ta trahando of tin e posibilidad pa yega na un trabao, por solicita pa bin na remarca pa un permiso di trabao.

El a sigui splica cu e mesun rekisitonan cu mester cumpli cune ora cu un persona cu ta trahando ta solicita permiso normalmente, e mesun rekisitonan ey mester cumpli cune si e persona ta na Aruba caba y ta trahando caba of kier drenta e mercado laboral, pero tin un status di indocumentado na e momentonan aki.

El a agrega cu e unico diferencia cu tin ta cu den e trayecto di flexibilisacion no ta bay exigi pa e persona bandona e pais, y tampoco ta bay nenga e permiso pasobra cu a keda na e pais fuera di e reglanan.

E mandatario a remarca cu e meta ta dirigi riba legalisacion di hendenan cu ta na Aruba na e momentonan aki. Pues no tin intencion pa bin cu gruponan grandi di trahadonan di afo. Ademas el a indica cu temporalmente ta bay baha e dunamento di permiso na persona cu ta di afo y ta bay enfoca pa duna permiso na e hendenan cu ta na e pais na momentonan aki, pa nan por drenta den e mercado laboral legal.

El a splica cu esaki tin como beneficio cu e hendenan ta bay cumpli cu e regla y leynan di e pais, nan ta bay paga e primanan cu mester ser paga y contribui na e beneficionan di e pais.

“Hunto nos kier traha riba progreso di e pais aki y nos ta spera di por conta cu cooperacion di tur dunador di trabao cu mester di trahado, pa haci uso di e posibilidad cu ta ser brinda na bo na e momentonan aki,” el a enfatisa.

Minister Dowers a ratifica cu e trayecto di flexibilisacion ta conta pa cualkier persona cu ta na pais Aruba na e momentonan aki caba, y cu a drenta Aruba prome cu dia 1 di juli, por aplica pa drenta e mercado laboral legal. E trayecto aki no ta conta pa hendenan cu a caba di yega awor of cu a drenta Aruba despues di 1 di juli.

El a indica cu banda di esaki, gobierno a tuma e decision tambe pa duna e posibilidad na hendenan cu ta biba na Aruba caba, y cu na e momentonan aki pa motibo di reunificacion familiar a haya un permiso cu e prohibicion pa traha, pa kita e prohibicion pa traha. E personanan aki por solicita pa haya un permiso normal y asina drenta e mercado laboral y contribui na e desaroyo di nan famia. El a agrega cu mesun cos ta conta pa studiantenan cu ta mayor di edad cu lo por drenta e mercado laboral si nan ta traha banda di nan estudio.

E mandatario a sigui splica cu tambe nan a crea e posibilidad pa adkiri un permiso flexibel pa hendenan cu ya ta trahando y cu tin cinco permiso. Despues di e di cinco permiso, nan por solicita un permiso flexibel, cu ta un permiso cu ta dura maximo cinco aña, y cu e permiso aki e persona ta haya e libertad pa por traha cerca otro dunador di trabao of cu mas cu un dunador di trabao.

Adicionalmente el a menciona tin e posibilidad tambe di aplica pa permiso pa mas cu un aña. El a remarca cu ta spera cu e dunador di trabao ta haci uso di esaki pa nan trahadornan, cu lo haci administracion mas facil y lo baha presion riba e organisacion y ademas lo duna e trahado un siguransa mas largo.

Minister Dowers a indica cu na e momento aki e trayecto ta bay cuminsa cu tur persona cu a drenta di forma legal Aruba, pues via aeropuerto principalmente, caminda e persona ta ricibi e stempel di entrada den su paspoort.

E mandatario a informa cu fin di luna, gobierno ta bay haci e prome evaluacion y lo duna informacion riba kico a encontra den e proceso y basa riba esey lo evalua kico ta e siguiente pasonan cu mester tuma.

Pa loke ta trata DIMAS, el a splica cu a haci y ta haciendo adaptacion den sistema di operacion di DIMAS pa mehora servicio. Ademas di esaki a admiti diferente persona adicional pa brinda servicio y tin un grupo special cu ta bay atende cu e trayecto di flexibilisacion aki. Pues e trayecto regular di DIMAS ta sigui y e trayecto di flexibilisacion tin un team special cu ta bay traha riba dje y ta spera cu e dos gruponan aki por brinda suficiente servicio.

E trayecto di flexibilisacion ta tin un periodo di duracion di cuater luna pa tur persona cu no tin permiso registra. Minister Dowers a enfatisa cu no por garantisa cu tur permiso lo sali den cuater luna, pero e meta ta pa den cuater luna tur hende registra y despues di e prome evaluacion lo mira si mester haci cambionan na e trayecto of no.