Pa Gabinete AVP-FUTURO desaroyo economico di Aruba mester ta balansa cu e desaroyo di infrastructura y e uso di e espacio limita di e isla, pa sigura stabilidad y un bon calidad di bida a largo plaso. Introduccion di un Plan Nacional di Infrastructura ta esencial den e maneho di infrastructura y vivienda pa gobierno nobo.
Gabinete AVP-FUTURO lo introduci un proyecto di ley cu decisionnan importante pa desaroyo social, economico y fisico di e pais, incluyendo un periodo di restriccion riba construccion y expansion di hotel, pa kita e presion riba medio ambiente y espacio fisico limita.
Alabes gobierno lo stimula inversionnan den e infrastructura fisico y digital, pa alinea Aruba miho cu su necesidad actual y den futuro. Un di e necesidadnan basico ta pa tin un dak riba cabes di cada ciudadano. Escasez di vivienda ta sigui ta un problema serio pa famianan na Aruba. E condicionnan existente pa haya tereno pa traha cas ta complica y ta stroba hende cu entrada abou y mediano di yega na un tereno pa cas.
Pa gobierno no ta secreto cu hopi famia no por cumpli cu e exigencianan pa haya financiamiento pa traha un cas. Hopi famia tin un entrada cu no ta suficiente pa nan por huur un cas digno pa biba aden. E situacion inaceptabel di vivienda na Aruba aworaki a haci cu famianan ta biba preta riba otro, den espacio inadecua y no sigur pa mucha y anciano.
Tambe a tuma nota cu e calidad di bida den e bario y centronan di ciudad ta un problema serio a pesar di inversion grandi den pasado, den centro di Oranjestad, y inversion limita den ultimo añanan. Gobinero lo mester bolbe haci inversion y pone hopi atencion pa modernisa infrastructura, renoba e barionan y revitalisa e centro di ciudadnan di San Nicolas y Oranjestad.
Pa gobierno ta importante pa e ciudad y barionan ta organisa na un manera cu nan no solamente ta habitabel y sano, sino tambe cu nan mester tin un ambiente cu ta dushi pa biba aden. Gobierno lo sigui desaroya infrastructura, sigura mantencion continuo y preveni decadencia infrastructural. Pa e motibo aki, Gabinete AVP-FUTURO lo traha un Plan Nacional di Infrastructura cu bista riba mantencion y modernisacion continuo di infrastructura, pa sostene e calidad di bida.
Den nan plan di gobernacion gobierno ta splica e prioridadnan den e maneho di infrastructura y vivienda gobierno pa logra nan meta.
Primeramente lo traha e Plan Nacional di Infrastructura: inclusivo pa sigura modernisacion, mantencion y accesibilidad continuo di e infrastructura fisico di Aruba y pa sigura un desaroyo economico y social amplio y continuo den balans cu medio ambiente y e necesidadnan social awor y den futuro.
Manera stipula den e ROPV nan lo inicia cu e evaluacion di e ley y e maneho; lo duna prioridad na renobacion di e planta di purifica awa sushi (“Waterzuiveringsinstallaties Aruba”) y lo evalua decision cu a tuma pa sanea e problemanan cu a surgi y dicidi con lo sigui adapta e plan aki.
Gobierno lo atende y tuma decision riba e maneho y proceso di desperdicio na Aruba a largo plaso, cu ta inclui Parkietenbos, Ser’i Teishi y dumpnan ilegal; lo evalua e continuacion di e capping di Parkietenbos y su conversion den un parke solar; y lo usa un minimo di e tereno habri pa construccion nobo, maximalisa uso di tereno ya usa, introduci maneho pa renoba of reconstrui edificio existente.
Otro prioridadnan di gobierno den infratstructura y vivienda ta pa evalua regla y procedura pa yega na tereno y construccion di vivienda propio. Nan lo re-evalua tur peticion pa tereno cu a haya un “opcion” pa construi den e ultimo añanan, pero cu no por a cumpli pa motibo di condicionnan; y lo evalua y introduci regulacion nobo pa yega na un balansa entre suficiente cas pagabel y e fenomeno di vacation rentals; incluso pa cas di persona cu no ta biba na Aruba, pero ta usa pa vacation rentals. Gobierno lo haci esaki den dialogo cu e sector y instancia concerni.
Ademas di esaki, Gabinete AVP-FUTURO lo renoba regulacion pa construccion y huur di cas pa tin un miho standard di calidad, incluso pa cas social. Lo yega na acuerdo cu desaroyadonan pa ofrece suficiente cas cu ta cumpli cu e demanda; lo haci cumplimento di un cas mas facil door di subi e garantia di Fondo Nacional di Garantia; y lo evalua e introduccion di un contribucion mensual for di caha di gobierno (“toeslag”) pa esunnan di menos entrada por huur un cas digno y adecuado pa nan biba aden. (“Huurtoeslag”).
Gobierno tin como meta tambe crea parke den tur districto cu ta facilmente accesibel, cu posibilidad di recreacion y cu hopi naturalesa pa por eherce actividad fisico y social; lo incentiva uso di vivienda den centronan di ciudad, specialmente pa studiante y profesional hoben, como tambe stimula mas negoshi di horeca; y lo incentiva uso di edificio bashi di gobierno.
Gabinete nobo tin plania y lo cuminsa di nobo cu renobacion y mantencion di scol, facilidad deportivo, caretera y caya, como tambe e proyecto di iluminacion den bario; nan lo yega na acuerdo nobo cu FCCA pa construi cas segun norma nobo pa famia di menos entrada; y lo evalua un maneho pa stimula re-destinacion di propiedad bandona.
Hunto cu e empresanan di utilidad y distribuidornan di auto, gobierno lo aumenta uso di vehiculo electrico (EV’s) y/of hybrid na Aruba y continua cu e proyecto existente pa reemplasa tur auto di gobierno cu EV’s y/of hybrid y construccion di charging stations.
Tambe nan lo analisa e impacto ambiental di tur proyecto di construccion y hiba un maneho responsabel y sostenibel di otorgamento di tereno pa proyecto nobo; y lo eactiva e plan pa renoba y revitalisa bario cuminsando cu e dialogo di habitante di bario cu departamentonan di gobierno pa sigura exito di e renobacion integral di e barionan. E renobacion di barionan lo mester inclui instalacion di luznan riba caya, espacio special pa mucha por hunga, espacio pa hende por bini hunto, cana y core bicicleta, mas cooperacion entre polis y e bario y proyectonan comunitario cu actividad cultural cu y pa e habitantenan. Pa gobierno mehora calidad di bida di habitante den bario semper ta e meta central di tur renobacion.
Lo haci tambe cu mantencion di infrastructura ta un prioridad pa cuida cada adelanto den mehoracion di infrastructura y calidad di bida di e hendenan. Den e cuadro aki gobierno lo duna atencion special na mantencion y expansion di carretera, sistema di riol y limpiesa di nos isla.
Gobierno lo introduci miho forma di maneho di awa. Entre otro, miho forma pa warda awa di yobida, reduci polucion di awa y proteha luga di warda awa pa uso humano, pa agricultura y cria di bestia.
Ademas tur esaki, gobierno lo stimula y sostene proyectonan di construccion basa riba cooperacion entre sector priva y gobierno pa por alivia e demanda pa vivienda di bon calidad y pagabel. Pa logra esaki, dialogo entre gobierno, desaroyador y sector financiero ta esencial.
Gobierno lo tin evaluacion continuo di e proyecto di “Smart Community” pa nan haya mas conocemento riba con pa traha un cas mas sostenibel den sentido di, entre otro, uso di material di construccion, ventilacion pa cu reduccion di consumo di energia; lo evalua proyectonan manera “Port City” pa dicidi riba nan importancia pa economia, e miho uso di e espacio publico limita y otro necesidad economico y social.
Gabinete AVP-FUTURO tin como meta tambe yega na palabracion nobo, a traves di dialogo cu desaroyado di proyecto di hotel, condominio y apartamento cu tin permiso pa hopi aña caba, den cuadro di un maneho mas balansa di mercado laboral, capacidad y necesidad economico, infrastructural, parkeer y social di nos pais y necesidad di sector di construccion.
Nan lo renoba tur caya di San Nicolas, incluyendo trottoir y instalacion di luz, baki di sushi, banki pa sinta y hopi mata y flor segun un guia manual pa caya pa mantene un consistencia estetico; lo crea mas baño publico y mantene nan; lo implementa un maneho general di precario pa San Nicolas pa tur comerciante sa di antemano unda nan por pone un terasa sin cu mester di precario y sin cargo adicional pa tin un terasa den centro di San Nicolas; lo trece mas departamento gubernamental back den districto; y lo duna prioridad pa entrega tereno di erfpacht den e region di San Nicolas.
