Pa Gabinete AVP -FUTURO ta importante pa e desaroyo economico di Aruba ta balansa cu e desaroyo di infrastructura y cu uso di e espacio limita riba e isla, pa sigui stabilidad y un bon calidad di bida na largo plaso. Den nan programa di gobernacion ta elabora e prioridadnan pa yega na e meta aki.

En conexion cu esaki gobierno lo introduci un proyecto di ley cu decisionnan importante pa desaroyo social, economico y fisico di e pais, incluyendo un periodo di restriccion riba construccion y expansion di hotel, pa kita e presion riba medio ambiente y espacio fisico limita. Alabes lo stimula inversionnan den infrastructura fisico y digital, pa alinia Aruba miho cu su necesidad actual y den futuro.

Un di e necesidadnan basico pa gobierno ta pa tin un dak riba cabes di cada ciudadano. Escasez di vivienda ta sigui ta un problema serio pa famianan na Aruba. E condicionnan existente pa haya tereno pa traha cas ta complica y ta stroba hende cu entrada abou y mediano yega un na tereno pa cas. Hopi famia no por cumpli cu e exigencianan pa haya financiamento pa traha un cas. Hopi famia tin un entrada cu no ta suficiente pa nan por huur un cas digno pa biba aden.

Gabinete AVP-FUTURO ta remarca cu e situacion inaceptabel di vivienda na Aruba aworaki a haci cu famianan ta biba preta riba otro, den espacio inadecua pa famia y sigur pa mucha y anciano. E calidad di bida den bario y centronan di ciudad ta un problema serio a pesar di inversion grandi den pasado, den centro di Oranjestad, y inversion limita den ultimo añanan.

Segun gobierno nobo lo mester bolbe haci inversion y pone hopi atencion pa modernisa e infrastructura, renoba e barionan y revitalisa e centronan di ciudad di San Nicolas y Oranjestad. “Nos ciudad y barionan mester ta organisa na un manera cu nan no ta solamente habitable y sano, sino tambe cu nan mester tin un ambiente cu ta dushi pa biba aden,” Gabinete AVP-FUTURO a indica.

Gobierno tin como meta sigui desaroya infrastructura, sigura mantencion continuo y preveni decadencia infrastructural. Pa e motibo aki, nan lo traha un Plan Nacional di Infrastructura cu bista riba mantencion y modernisacion continuo di infrastructura, pa sostene e calidad di bida.

Pa logra nan meta gobierno lo traha e Plan Nacional di Infrastructura inclusivo pa sigura modernisacion, mantencion y accesibilidad continuo di e infrastructura fisico di Aruba y pa sigura un desaroyo economico y social amplio y continuo cu balans cu medio ambiente y e necesidadnan social awor y den futuro.

Manera stipula den e ROPV nan lo inicia cu e evaluacion di e ley y e maneho; lo duna prioridad na renobacion di e planta di purifica awa sushi (“Waterzuiveringsinstallaties Aruba”). Den esaki lo evalua decision cu a tuma pa sanea e problemanan cu a surgi y dicidi con lo sigui adapta e plan aki.

Gobierno tin como prioridad tambe atende y tuma decision riba e maneho y proceso di desperdicio na Aruba na largo plaso, cu ta inclui Parkietenbos, Ser’i Teishi y dumpnan ilegal; lo evalua e continuacion di e capping di Parkietenbos y su conversion den un parke solar; y lo usa un minimo di e tereno habri pa construccion nobo, maximalisa uso di tereno ya usa, introduci maneho pa renoba of reconstrui edificionan existente.

Gabinete AVP-FUUTRO lo evalua regla y procedura pa yega na tereno y construccion di vivienda propio. Lo re-evalua tambe tur peticion pa tereno cu a haya un “opcion” pa construi den e ultimo añanan, pero cu no por a cumpli pa motibo di condicionnan.

Un punto di prioridad ta tambe evalua y introduci regulacion nobo pa yega na un balans entre suficiente cas pagabel y e fenomeno di vacation rentals; incluso pa cas di persona cu no ta biba na Aruba, pero ta usa pa vacation rentals. Haci esaki den dialogo cu e sector y instancianan concerni; y lo renoba regulacion pa construccion y huur di cas pa tin un miho standard di calidad, incluso pa cas social. Yega na acuerdo cu desaroyadonan pa ofrece suficiente cas cu ta cumpli cu e demanda.

Gobierno tin como meta haci cumpramento di un cas mas facil door di subi e garantia di Fondo Nacional di Garantia; y lo evalua e introduccion di un contribucion mensual for di caha di gobierno (“toeslag”) pa esunnan di menos entrada por huur un cas digno y adecuado pa nan biba aden. (“Huurtoeslag”).

Lo crea tambe parke den tur districto cu ta facilmente accesibel, cu posibilidad di recreacion y cu hopi naturalesa pa por eherce actividad fisico y social.

Otro aspecto tambe ta incentiva uso di vivienda den centronan di ciudad, specialmente pa studiante y profesional hoben, como tambe stimula mas negoshi di horeca; lo incentiva uso di edificio bashi di gobierno; y lo plania y cuminsa di nobo cu renobacion y mantencion di scol, facilidad deportivo, caretera y caya, como tambe e proyecto di iluminacion den bario.

Gabinete AVP-FUTURO tin como prioridad tambe yega na acuerdo nobo cu FCCA pa construi cas segun norma nobo pa famia di menos entrada; y lo evalua ademas un maneho pa stimula redestinacion di propiedad bandona.

Hunto cu e empresanan di utilidad y distribucion di auto, lo aumenta uso di vehiculo electrico (EV’s) y/of hybrid na Aruba y continua cu e proyecto existente pa reemplasa tur auto di gobierno cu EV’s/y/of hybrid y construccion di charging stations; y lo analisa e impacto ambiental di tur proyecto di construccion y hiba un maneho responsable y sostenible di otorgamento di tereno pa proyecto nobo.

Gobierno lo reactiva e plan pa renoba y revitalisa bario cuminsando cu e dialogo di habitantenan di bario cu departamentonan di gobierno pa sigura exito di e renobacion integral di e barionan. E renobacion di barionan lo mester inclui instalacion di luznan riba caya, espacio special pa mucha por hunga, espacio pa hende por bini hunto, cana y core bicicleta, mas cooperacion entre polis y e bario y proyectonan comunitario cu actividad cultural cu y pa e habitantenan. Pa gobierno mehora calidad di bida di habitantenan den bario semper mester ta e meta central di tur renobacion.

Haci mantencion di e infrastructura ta un prioridad pa cuida cada adelanto di mehoracion di e infrastructura y calidad di bida di e hendenan. Den e cuadro aki lo duna atencion special na mantencion y expansion di e careteranan, sistema di riool y limpieza di e isla.

Nan lo introduci un miho forma di maneho di awa. Entre otro, miho forma pa warda awa di yobida, reduci contaminacion di awa y proteha luga di warda awa pa uso humano, pa agricultura y cria di bestia.

Gobierno lo stimula y sostene proyectonan di construccion basa riba cooperacion entre sector priva y gobierno pa por alivia e demanda pa vivienda di bon calidad y pagabel. Dialogo entre gobierno, desaroyado y sector financiero ta esencial den esaki.

Nan lo realisa evaluacion continuo di e proyecto di “Smart Community” pa haya mas conocemento riba con pa traha un cas mas sostenibel den sentido di, entre otro, uso di material di construccion, ventilacion pa reduccion di consumo di energia;y lo evalua proyectonan manera “Port City” pa dicidi riba nan importancia pa economia, e miho uso di e espacio publico limita y otro necesidad economico y social.

Den dialogo cu desaroyado di proyecto di hotel, condominium y apartamento cu tin permiso pa hopi aña caba, Gabinete AVP-FUTURO lo yega na un palabracion nobo den cuadro di un maneho mas balansa di mercado laboral, capacidad y necesidad economico, infrastructural, parkeer y social di pais y necesidad di sector di construccion.

Gobierno tin e meta la renoba tur caya di San Nicolas, incluyendo trottoir y instalacion di luz, bak’i sushi, banki pa sinta y hopi mata y flor segun un guia manual pa caya pa mantene un consistencia estetico; lo crea mas baño publico y mantene nan; y lo implementa un maneho general di precario pa San Nicolas pa tur comerciante sa di antemano unda nan por pone un terasa sin cu mester di precario y sin cargo adicional pa tin un terasa den centro di San Nicolas.

Gobierno lo trece mas departamento gubernamental back den districto; y lo duna prioridad pa entrega tereno di erfpacht den e region di San Nicolas.