Despues di e declaracionnan di presidente di Colegio di Supervision Financiero (CAft), Lidewijde Ongering, den cual el a cuestiona e manera con a set up AWSS, e compania encarga cu renobacion y expansion di e planta pa trata awa di riool na Bubali (RWZI), gobierno a reacciona indicando cu ta bay haci un investigacion profundo.
E declaracion di Sra. Ongering, haci durante un sesion den Senado Hulandes, a hala hopi atencion.
El a bisa: “Na Aruba, en berdad tin un problema cu e maneho di rioolering. Y e riesgonan involucra cu esaki actualmente no ta bon maneha. Esaki por tin tur sorto di efecto den area di high-rise – e area unda e hotelnan grandi ta ubica.
“Den termino di gobernacion, realmente ta un problema con esaki ta organisa. E organisacion di tratamento di awa di riool, AWSS, tambe a keda distancia di gobierno y awo mester busca prestamo. Recientemente nos a duna un conseho no-solicita riba esaki, declarando cu e manera con cosnan ta structura actualmente ta bay conduci cu mester bolbe busca prestamonan caro. Nos ta calcula cu esaki lo trece aproximadamente 200 miyon (florin) den peso adicional, mientras cu tambe por a hacie diferente. Pa motibo di presupuesto y fluho financiero – manera mi a describi caba den otro contesta – actualmente tin suficiente pa esaki na Aruba.
“Pero awo AWSS un biaha mas ta bay tin cu tuma un prestamo den mercado liber, cu un prijs hopi halto y tur e consecuencianan financiero cu esey ta encera. Esey ta eficiente?”
Den e comunicado, gabinete AVP-Futuro a bisa cu “e hallazgo aki di CAft comprendiblemente a causa sorpresa y shock cerca hopi persona.” Nan a indica tambe cu e suma menciona, di Afl. 200 miyon, ta aparece tambe den e conseho di CAft cu e gabinete a ricibi recientemente, cu ta lanta duda tocante e operacion financiero rond di AWSS NV.
“Pa e gabinete, e hallazgonan di CAft ta motibo suficiente pa inicia un investigacion profundo. Gobierno tin meta pa obtene lo mas pronto posible y relato factual cu ta duna contesta na e pregunta urgente pakico gabinete Wever-Croes a opta pa un areglo financiero cu demostrablemente ta un desbentaha pa sociedad,” segun e comunicado. “Basa riba e resultadonan, gobierno ta bay considera e proximo stapnan.”
Siman pasa ora e conseho di Sra. Ongering a bira conoci, ex-premier Evelyn Wever-Croes a splica e situacion bisando cu tempo cu a dicidi pa set up AWSS separa di gobierno, no tabatin suficiente fondo pa hinca e gasto di AWSS den presupuesto. Sinembargo, por nota cu den e declaracion di Sra. Ongering, e ta bisa specificamente cu “actualmente” tin suficiente fondo na Aruba pa AWSS. Wever-Croes a aclaria cu “awor tin surplus, awor gobierno por a presta placa na AWSS (AAA, Elmar, Web, Setar tambe) na interes abou, manera nos kier a presta FCCA na interes abou. Pasobra si AWSS bay presta riba mercado internacional, e ta costa mas.”
Finalmente, gabinete Wever-Croes a bisa cu nan tambe ta bay busca inmediatamente conseho experto pa determina ki opcion ta existi dentro di e principionan di bon gobernacion pa stop cu AWSS mester saca prestamo innecesariamente halto. Adicionalmente, e gabinete ta bay solicita pa CAft retira e confidencialidad di e conseho cu a duna gobierno riba e asunto aki, “pa asina tur hende por ta informa di su contenido.”
