Gabinete Wever-Croes consistiendo di MEP-POR-RED ta bira un realidad cu ocho minister

Ayera tardi e noticia cu a domina e dia tabata e anuncio cu despues di casi cinco siman di dialogo y deliberacion, finalmente Aruba ta conoce su gobierno nobo di coalicion. Awe e huramentacion di minister lo tuma luga, cual ta un ceremonia haci por medio di su excelencia gobernador Alfonso Boekhoudt. Pa celebra e momento aki cu pueblo di Aruba, awe nochi lo tin un encuentro na Plaza Betico Croes for di 7or pa 9or.

Awor cu ta cla cu e negociacion, den curso di ayera mes a cuminsa cu tumamento di retiro na parlamento pa e procedura di e parlamentarionan nobo cuminsa cana. Pa awe den oranan di mainta e parlamentarionan nobo lo mester huramenta. Ora cu nan caba ta bin despues parti atardi e huramentacion di e ministernan. Negociacion no tabata facil, segun formado, lider di partido MEP y awor prome minister di Aruba Evelyn Wever-Croes a declara ayera na prensa.

Nan a cuminsa como tres partido cu a bay eleccion cu posicionnan propio, algun posicion contradictorio na otro, hopi posicion igual cu otro, y finalmente pueblo a papia y vota pa coalicion. “Y p’esey nos ta enfoca den locual ta uni nos y locual nos tin den comun,” sra. Wever Croes a expresa. E partidonan a firma e acuerdo di formacion dia 17 di october despues di a haya e formatie opdracht riba 12 di october for di gobernador di Aruba. Dia 1 di november a bay over na firma e acuerdo di gobernacion caminda cu a pone e puntonan mas elabora cu lo bay traha riba nan. Siman pasa diabierna a keda anuncia cu nan a keda cla cu reparticion di cartera anto a tuma algun dia pa a caba di formalisa tur cos. E procedura berdad a tuma su tempo, cual ta tempo cu nan mester a tuma pe segun e formado, kende tambe a gradici prensa pa e cooperacion durante e ultimo simannan aki.

Evelyn:”Nos a enfoca riba e puntonan cu nos tin en comun; na prome luga integridad y bon gobernacion. Ora cu pone esaki como prioridad number uno, naturalmente mester tene cuenta cu e puntonan aki den e proceso.” E dos otro puntonan cu e partidonan tin en comun y ta pone como prioridad segun e formado, ta e situacion financiero di Aruba, y pa pone e ser humano central, e trankilidad, cuido medico, cuido social, enseñansa y viviendanan social entre otro cu mester haya atencion. Na caminda sin duda lo bay topa cu puntonan cu no a keda papia di dje aworaki segun sra. Wever-Croes. “Puntonan cu tal bes nos tin otro opinion riba nan. Y den e caso ey nos a bin cu e ponencia cu nos ta bay tin un comision cu ta bay atende cu posibel conflictonan pa evita cu algo asina mesora ta bay nifica e final di un coalicion,” e ta splica.

Carteranan Gabinete-Wever Croes
Rudy Lampe (RED) lo bira minister encarga cu enseñansa, ciencia y desaroyo sostenibel. Otmar Oduber (POR) ta encarga cu Infrastructura y Medio Ambiente, y na mes momento e ta vice prome minister di Aruba. Andin Bikker (POR) ta bira minister di Husticia y Integracion. Chris Romero (MEP) ta bira minister di Transporte, Comunicacion y Sector Primario. Dangui Oduber (MEP) ta bira minister di Turismo, Salubridad y Deporte. E parti di Salubridad sr. Oduber ta bay haci e den conhunto cu colega Arthur Vallejo, cu tin mas conocemento tambe den e tereno aki. Glenbert Croes (MEP) ta bira minister di Asuntonan Social y Labor. Xiomara Ruiz Maduro (MEP) ta bay encarga cu cartera di Financia, Asuntonan Economico y Cultura. Guillfred Besaril (MEP) ta bira minister plenipotenciario na Hulanda, y Ady Thijsen (MEP) ta tuma su luga como presidente di parlamento di Aruba. Finalmente minister encarga cu asuntonan general, Integridad, Energia, Innovacion y organisacion gubernamental naturalmente Evelyn Wever-Croes (MEP).

Pakico ocho minister
Parlamentario Ricardo Croes (RED) tambe a subraya cu e ultimo simannan aki no tabata asina facil manera cu tur hende ta desea di pensa. “Pero e tabata fructifero. Nos di partido Red ta masha contento cu e ministerio cu nos a haya como encargo y ta priminti di haci un trabao cabal den e ministerio aki,” el a bisa. A dialoga basta riba e hecho cu tur tres partido a campaña cu shete minister y awor e mester a bira ocho. Ricardo: “Pero nos ta hendenan realistico, responsabel, y nos sa cu e ta imposibel pa haci e cu shete minister. Despues di tanto negociacion nos a bin di acuerdo cu ocho minister ta locual ta adecuado pa e gobierno aki.”

Segun e formado, e partidonan yega na ocho minister cu cierto condicionnan, un di nan sigur pa tin hopi menos coordinador cu e gobierno anterior, cu tabata tin cada un salario di por lo menos 9.000 florin pa luna. Pa locual ta e reparticion di cartera, e partidonan a cuminsa cu un proceso di inventarisa e ministerionan y reparti nan entre e diferente partidonan. Evelyn: “E realisacion cu bo no por haya tur cartera tabata uno duro pa haci. Un coalicion kiermen reparticion di trabao y responsabilidad. P’esey tambe e programa di gobernacion ta asina importante pasobra prome cu nos a reparti, nos a papia di nos visionnan y kico pa nos ta importante.”


‘Un gobierno di cuater aña plus’
Otmar Oduber (POR) a subraya ayera cu no ta un casualidad cu e tres partidonan aki ta sinta hunto awe den coalicion pa forma un gobierno. Un gobierno cu e ta expresa lo ta uno stabiel pa cuater aña sigur of mas. “Nos a siña conoce otro. Nos no por djis bisa cu semper nos a stima otro, pero nos a siña respeta otro den e proceso cu a caba di pasa e simannan nos tras,” el a expresa. El a sigui comenta cu comercio y pueblo di Aruba den su totalidad por ta sigur cu esaki lo ta un gobierno cu ta bay traha pa e aspecto humano di cada un ciudadano cu ta biba akinan. Sr. Oduber a bay over na expresa despues cu: “E sentido di orguyo di e prome dama cu ta bay bira prome minister di e pais aki ta yena nos tur. Nos como hende homber tambe ta un sentido di tin Evelyn Wever-Croes como nos prome minister.”

Den e fase aki e respet ta loke a prevalece segun sr. Oduber. “Hopi hende a cuestiona na caminda, hopi hende cu ta presente awe no a kere of a anhela pa e dia aki no yega. Pero mi tin cu bisa cu ora bo kier traha algo bin y kier tin un siguridad pa comunidad di Aruba. Di cu naturalmente bo tin nan prioridadnan y necesidadnan na prome luga, bo ta tuma e tempo necesario.” For di fase di informacion te na fase di formacion te na e screening cu a tuma luga den tur e ministernan cu ta bay sinta den e dianan aki, tabata uno riguroso segun sr. Oduber. “Ohala esunnan cu a drenta parlamento por a pasa e screening aki cu tabata den gobierno anterior pa drenta parlamento. Nos no lo sa si nan lo a pasa e screening aki of no, pero nos sa si cu e nuebe ministernan cu ta bay huramenta a pasa e screening aki. Y ta capabel, capacita y cla pa goberna e pais aki.”

You May Also Like

Pronto Caribbean Cinemas vip na Paseo Herencia

ORANJESTAD – Caribbean Cinemas VIP na Paseo Herencia pronto lo ta habriendo su porta ...

Dokter Van Trigt: ‘Mester di mas informacion pa malesanan transmiti sexualmente’

Bon Dia Aruba a acerca dokter di cas Joaquin van Trigt pa informacion tocante ...

Robert Leal: Con aborto por traha mentalmente den hende muhe

ORANJESTAD – Den un entrevista cu psycholoog Robert Leal, a papia tocante asuntonan di ...

Editorial

300 cliente di onderstand ta costa 3 miyon

300 coordinador ta costa 30 miyon! Cu atencion nos a sigui e noticia di ...

Inspeccion enseñansa apertura escolar.jpg

Niun iregularidad a wordo raporta na departamento di Inspeccion di Enseñansa

Te asina leu cu departamento di Inspeccion di Enseñansa a wordo informa for di ...

Rancho trabou boluntario (1).jpg

Fundacion Rancho mester di mas boluntario pa realisa nan proyectonan 2017

Un grupo di trahadonan boluntario di Stichting Rancho a ricibi un certificado di aprecio ...