Pa Kailash Satyarthi, kende a ricibi premio Nobel di Paz na 2014 pa su lucha contra e represion di mucha y hobennan, y pa e derecho di tur e menor di edad pa educacion hunto cu Malala Yousafzai, e desaroyo internacional no ta yega esunnan mas vulnerable. Asina a declara den e plenario ‘Deja tu huella para el desaroyo social y economico’ na Merida, Yucatan.
E fruto di e desaroyo no ta yega te ultimo persona, p’esey no ta alcansa e muchanan homber y muhe, segun a considera den e marco di e cumbre 17 di Premio Nobel di Paz.
E metanan mundial pa elimina labor infantil na 2025 no lo bay logra, ya cu na mundo tin 50 miyon di mucha cu no tin luga pa drumi, 150 miyon ta traha pa hende rico y 428 ta victima di e pobresa multi dimensional.
Cu apenas dos dia di loke e planeta ta gasta na materia militar lo por disminui pobresa infantil, a sigura.
E cita, pa cual presidente Andrés Manuel López Obrador a presenta, ta reuni e ganadonan di premio Nobel cu a lanta nan bos pa derechonan humano.
Den e sentido ey, Tawakkol Karman, premio Nobel di Paz na 2011 pa su lucha no violento pa siguridad di e muhenan, a expresa cu ‘no lo keda keto, mi no lo stop di haci buya’.
Yemen ta den un conflicto desde cuatro aña pasa, cu intervencion di Saudi Arabia: apenas e fin di siman pasa, e instalacion di Saudi Arabia a ser ataca, sin cu a keda conoci e autor di e atentado ey.
Ex-presidente di Colombia, Juan Manuel Santos, a bisa cu e abandono reciente di e proceso di paz na Colombia ‘ta preocupante, pero no ta un catastrofe’, durante e inauguracion di e cumbre 17 di Premio Nobel di Paz, cu ta realisa den dianan aki na Merida, Mexico.
