Ayera mainta Gemeenschappelijk Hof van Justitie a presenta su cuenta anual y relato anual pa aña 2024. Corte ta cera aña 2024 cu un perdida di mas cu un punto un miyon florin. Presidente di Gemeenschappelijk Hof van Justitie Mauritsz de Kort y Director di Operacion Martin Luttge, cu a presenta e relato anual y cuenta anual a traves di un video, a elabora un poco mas riba e aspectonan mas importante di e relato anual.

Den 2024 Corte a celebra su di 155 aniversario, cual a ser celebra riba tur isla cu un asina yama ‘freedom lunch’. Esaki, presidente di Corte Sr. .de Kort a indica, a brinda e oportunidad pa refleha riba e balornan central di independencia y accesibilidad. “Balornan nucleo cu ta solamente posibel pa medio di e libertad cu a ser lucha duro pa haya y cu ainda ta dificil pa proteha,” el a enfatisa.

Sr. De Kort a remarca e desaroyonan mas importante di Corte den 2024. Pa loke ta trata digitalisacion el a splica cu nan a tuma pasonan significante pa haci e sistemanan mas facil pa usa y pa procesa casonan mas lihe den forma digital, tambe casonan cu asuntonan pa gradonan mas halto.

Pa loke ta trata e calidad, el a splica cu como resultado di e conferencia di calidad algun aña pasa, nan a implementa un proyecto piloto pa sigura cu tur hende por expresa nan mes na Ingles, Hulandes of Papiamento durante e audiencia pa medio di e asina yama proyecto di Tolkien. El a agrega cu tambe nan ta publica mas y mas veredicto online.

Pa loke ta trata “Caribisacion”, presidente di Corte a indica cu nan ta keda compromete pa contrata mas hues y personal di region Caribe cu nan tin reto pa atrae. Pa e ultimo dos aña a bolbe recluta radionan nobo cu lo cuminsa cu nan opleiding pa bira hues of fiscal publico na 2025. Papiando di formacion, el a splica cu hues y empleadonan ta sigui cursonan di training pa medio di e Academia di Corte pa mantene e calidad di e profesion halto y asina na 2024 a organisa dos biaha e siman di conocemento tocante esaki.

Pa loke ta trata e casonan, Sr. De Kort a indica cu den 2024, Corte a trata mas cu 34 mil caso den prome instancia y den apelacion cerca di 1.200 caso.

Director di Operacion Sr. Luttge a duna un splicacion tocante e resultado y situacion financiero di Corte pa aña 2024. Pa loke ta e financiamento di Corte, el a splica cu Corte ta ser financia pa Aruba, Curacao y Sint Maarten, y pa Boneiro, Sint Eustatius y Saba pa Hulanda. Den corto, el a remarca, e acuerdo ta cu cada pais ta paga pa e cantidad di demandanan cu ta ser presenta. El a splica cu por ehempel Corsou y Aruba ta paga mas cu Sint Maarten y Hulanda pasobra aki tin establecimentonan grandi y cu mas caso.

Sr. Luttge a sigui splica cu e prijs cu ta ser cobra pa e diferente caso ta ser yama ‘kostprijs’. E ‘kostprijs’ aki ta ser calcula segun ley y pa un periodo di tres aña cada biaha. E periodo aki tambe ta ser determina pa ley. E periodo actual tabata di 2023 pa 2025. Manera cu ya caba Sr. Luttge a indica aña pasa, pa e añanan 2023 y 2024, en conexion cu e posicion financiero dificil di e paisnan como consecuencia di e impacto di e pandemia di covid, a bay di acuerdo pa no usa e ‘kostprijs’ aki. En bes di esey, a bay di acuerdo pa limita e presupuesto na nivel di presupuesto di aña 2022. Esaki ta nifica cu nan a usa pa e presupuesto di 2024 un ‘kostprijs’ cu a ser calcula caba na 2020.

Pa loke ta trata e resultado financiero pa 2024 y un revision breve di e situacion financiero di Corte, Sr. Luttge a splica cu ora di traha e presupuesto pa 2024, a reconoce caba cu e aumento continuo di prijs di salario lo tin un impacto structural riba e posicion financiero di Corte.

El a sigui splica cu pa e motibo ey ora di traha e presupuesto 2024 ya a asumi un saldo negativo di 941.000 florin. E cuentanan anual pa 2024 a ser cera na final cu un resultado negativo di 1.158.000 florin.

El a indica cu e diferencia negativo mas aleu ta debi principalmente na aumentonan di prijs mas halto cu loke a spera. Den terminonan amplio, Sr. Luttge a subraya, nan ta mira un distincion den gastonan di personal, incluyendo vacaturanan habri.

Na mesun momento, el a agrega, tin un exceso riba gastonan di exportacion. Esaki por ser splica parcialmente door di gastonan cu a aumenta significantemente den, por ehempel, gasto di ticket y estadia pa biahenan esencial entre e islanan.

Tambe a papia di cifranan mas halto cu loke a spera den gastonan pa entrada y salida di personal. Y por ultimo e gastonan pa software y su maneho tambe a resulta di ta mas halto cu loke a spera.

Pa loke ta trata e situacion financiero di Corte, Sr. Luttge a splica cu nan ta usa e fondo di reserva general cual ainda ta un preocupacion grandi. El a sigui splica cu no solamente nan ta mira cu gastonan di exportacion ta aumentando debi na mas di e desaroyonan di salario y prijs menciona, pero Corte tambe den e ultimo añanan a ser forsa pa pospone inversionnan y desaroyonan necesario.

Esakinan, el a menciona, ta por ehempel inversionnan den formacion, structura di salario y funcion, pero tambe den actualisa ICT. Sr. Luttge a remarca cu tur e inversionnan aki ta necesario y lo bin Corte den futuro cercano, pasobra pospone e inversionnan aki no ta sostenibel.

El a indica cu tur esaki ta inclui den e calculacion di e prijs di gasto nobo pa e periodo di 2026 pa 2028 y ta inclui como tal den e presupuesto provisional pa 2026.

Finalisando, presidente di Corte Sr. De Kort a subraya cu e Corte tin retonan, pero ta sigui traha riba proceduranan mas lihe, teamnan mas fuerte, mas envolvimento local y internacional y un cooperacion cu e cuater pais den Reino. “Solamente hunto nos por mantene e poder hudicial fuerte y confiabel pa un y tur,” el a enfatisa.

Pa informacion detaya di desaroyonan importante den 2024 relaciona specificamente cu Corte di Aruba, lesa esaki den nos siguiente edicion di Bon Dia Aruba.