George Forbes

Parke Curason of Parke Jaburibari ta un parke cu no mester di introduccion bou nos comunidad. Cu un cancha di basketball, cancha di futbol, pista pa practica BMX, rampanan pa practica skateboard, workout stations, parke pa muchanan hunga y un pista di 750 meter pa cana/core/core bais. Pero menos conoci ta e dedicacion cu un empleado di e parke, George Forbes ta hinca den su trabou.

Cara di e parke
Riba un dia normal Sr. Forbes ta cuminda bishitantenan, yuda muchanan pomp nan taira di bais y mustra scheur den e caminda di canadonan. Te hasta e ta percura pa autonan cu yega e parke haya un luga di parkeer. Pa e bishitantenan di e parke, e ta e persona cu ta duna cara na e parke. Hopi biaha nos ta lubida di duna danki na personanan den nos comunidad cu di nan mesun manera ta duna man den nan bida diario.

150 bishitantenan diario
Bon Dia Aruba a acerca sr. Forbes, kende a splica cu “Mi tin 13 aña ta traha den e parke y mi ta sumamente felis cu mi trabou. Mi ta traha como supervisor di seguridad. Mi tin un laso special cu tur hende cu ta bishita e parke regularmente, y esaki ta haci mi hopi feliz.” Segun sr. Forbes, tin 150 hende cu ta bishita e parke diariamente. “Esaki ta un averahe, pasobra durante fin di siman nos sa haya mas bishita”. E parke ta existi segun sr. Forbes pa 14 aña mas o menos, cual kiermen cu e ta trahando cu e parke casi desde comienso.

“E parke e tempo ey tabata mustra maraviyoso. Tur cos tabata nobo y den bon condicion. Cada aña mi ta wak mas y mas hende cu ta bira bishitante regular di e parke. Esaki ta hopi bon pasobra bo ta wak cu nos comunidad ta interesa den mantene nan mes activo. Compara cu e pasado, mi por bisa cu tin un desaroyo hopi positivo. Pa esaki mi ta kere ta importante pa keda mantene e parke”.

Sr. Forbes mes ta gusta practica deporte y mantene su mes activo. Y e no tin miedo di yuda bishitantenan, sea jong of grandi. “Mi no ta un persona cu ta keda sinta ta cobra mi placa. Tin hopi cosnan cu nos mester haci pa preveni accidente”, sr. Forbes a expresa. Sr. Forbes su aspiracion y deseo ta pa sigui yuda e bishitantenan y wak e parke den bon condicion. “Mi ta spera cu e mantencion cu a wordo priminti lo yega pronto, pasobra mi ta kere cu e parke aki tin un rol crucial”.

Luga pa practica BMX
Jaymer Carolina, un hoben cu ta practica e deporte BMX, ta confirma e importancia cu e parke tin pa e por practica su deporte: “Kinan ta e unico luga cu mi por practica mi deporte. Mi ta train 6 dia pa siman di 5 or te 7 or di atardi”. Su club di BMX yama Rough Riders Aruba, unda e ta core den categoria di 17 pa 24 aña. “Den proximo temporada mi ta bay purba core cu e elite, e pros. Loke ta mas importante den nos deporte ta e adrenalina, velocidad, estilo y purba bo best pa yega na prome luga.” E parke no solamente ta duna un hogar na esunnan cu ta practica BMX, si no tambe teamnan di basketball, grupo di futbol, fanaticonan di skateboard, muchanan chikito, hende riba bais y hende riba pia.

Mas cu esaki e parke ta un luga pa hendenan bin hunto, disfruta den grupo y mantene nan mes activo. Esaki Daniel Tromp, kende tambe ta practica BMX ta enfatisa: “Danki na e parke aki mi por practica mi deporte y mi por a logra representa Aruba den competencianan regional. Pero akinan tambe mi ta yega pa comparti cu mi amigonan. E parke tin mester di mantencion riba diferente nivel y mi ta spera cu e mantencion yega pronto. Mi ta spera e gobierno tambe realisa nan responsabilidad pa e parke.”

Sharitza Henriquez , kende gusta cana den e parke, tambe ta concorda cu e opinion di sr. Tromp. “Tin hopi area cu falta di mantencion, especialmente e workout stations”.