12juli, JM, Gerald Vingal.jpg

Bon Dia Aruba a tene un entrevista cu Sr. Gerard Vingal director di Departamento di Inmigracion na aeropuerto di Aruba, tocante e maneho cu tin ora cu un hende drenta Aruba y nan no bay bek cu e vuelo cu nan a book. A puntra Specificamente pa e situacion cu ta atende cu personanan Venezolano ora cu nan bin como turista, pero ta keda atras ilegal.

 

Esaki ta un fenomeno cu a crece aki na Aruba segun por a mira den diferente comunicado di Cuerpo Policial di Aruba. Hopi biaha den control, ta gara diferente persona ilegal y ta haya sa cu hopi ta drenta legal pues como turista y ta keda sin bay bek, recientemente a gara uno cu tin 1 aña aki na Aruba ilegal.

 

Sr. Vingal a splica cu tin e sistema cu ta mira ora cu un hende ta drenta, y ta registra su entrada, ta duna nan tanto dia por ehempel 10 dia. Y por wak den e sistema e ora si nan a sali, si nan a cumpli cu e dianan cu nan a duna, si of no. “Por ehempel,  no tur ora cu un hende cu a keda anto el a surpasa e dianan di su estadia, no tur ora esey kiermen cu el a keda ilegal,” Sr. Vingal a splica. Esaki tin di haber cu e echo cu sistema di inmigracion no ta conecta na e sistema di Dimas, no por mira si e persona a haya un extension turistico of si el a haya hasta un permiso etc. Pues locual cu ta pasa ta,  pa haya e cifranan concreto cu ta mustra realmente ken a keda ilegal, inmigracion ta manda e lista cu nan tin pa Dimas, anto Dimas ta check esey e ora ey. Dimas ta haci un screenmento den nan sistema y nan por saca afo kende a keda ilegal realmente.

 

Esaki kiermen cu  si un persona no bay bek su pais, Inmigracion no ta haya un notificacion cu ta bisa esaki. A puntra Sr. Fingal si un persona turista procedente di Venezuela por cumpra un One Way ticket pa bin Aruba, el a bisa cu esaki no por y ta retour ticket  so e por bin cun’e. Si e presenta cu un On Way ticket simplemente e no ta wordo acepta, segun e director.

 

Bon Dia Aruba a puntra Sr. Vingal kico mas e departamento di inmigracion ta haci ora cu un persona no presenta pa su vuelo, y el a splica: “E no bay pa e situacion cu un hende no a presenta pa su vuelo, pasobra esey  nos no por wak.” Por ehempel un persona a drenta Aruba y e ta Venezolano, e persona a pidi pa keda 10 dia, ta te ora cu e persona sali bek cu scan e paspoort di e persona na salida, e ora ta haya tur informacion di e persona y ta haya sa si el a keda mas cu el a pidi pa keda  etc. Na e momento cu constata esey ta check si el a pidi un extension turistico, y si e no a pidi un extension turistico e ta wordo bisa cu den e aña calendario aki e no por drenta mas. Pues e mester warda e aña bolter.

 

A puntra Sr. Vingal den e caso cu un persona wordo gara ilegal riba e isla ta cuanto aña e ta haya cu e no por drenta Aruba. Segun e director, tin un scala cu ta aplica, e scala ta indica  e ora  a base di cuanto tempo e persona tin ilegal ta cuanto tempo e ta wordo prohibi pa drenta Aruba, E cantidad di añanan ta varia pero ta bay te na un maximo di 5 aña cu un persona no por drenta bek Aruba si e wordo gara ilegal. 

 

 Esey ta e parti LTU, pa loke ta  castigo huridico e ta bay via hues unda cu un hende por haya ordo cu e ta wordo saca for di e isla, y den e caso ey si e periodo por bay na un maximo di 8 aña. Pues si un persona comete un crimen na Aruba mientras cu e ta ilegal y wordo gara.

 

Trahamento ilegal ta cay bou di LTU cual ta ilegalidad, traha ilegal no ta algo criminal, pero si e persona a horta hopi placa for di e caminda cu e tabata traha e ta bira un delito castigabel, Sr. Vingal a splica.

 

Terminando Sr. Vingal a bisa cu e no tin cifra concreto pa  duna di e cantidad di personanan cu keda ilegal y ta Dimas tin esakinan, na Inmigracion tin solamente cifra di entrada, salida y cuanto hende ta nenga por ehempel di cada vuelo cu yega. Pa loke ta cifranan di huesped  y ilegalidad ta cay bou di Dimas

LEAVE A REPLY

Please enter your comment!
Please enter your name here