Ayera den oranan di mainta e ex-parlamentario di partido AVP a manda un carta na redactor cu tabata dirigi na lider di e partido aki, Mike Eman, unda el a informa di su retiro treciendo varios punto dilanti como e diferencia di pensamentonan y sentimentonan entre esnan mas hoben y otro coleganan.

Croes, ken a uni su mes como candidato oficial di partido AVP “cu expectativanan halto y cu hopi animo pa sirbi nos pais cu e compromiso di partido pa rehubenece e organisacion y crea un espacio y plataforma pa e bos di un generacion nobo den politica na Aruba. E cambio aki no a refleha manera nos a pensa y spera durante e presentacion di lista di candidatura pa eleccion 2017; e resultado di votonan a mustra diferente y na fabor di e hobennan,” el a sigura.

El a conta cu den eleccion ey el a haya 982 voto cu e number 18 pero esey no tabata suficiente como votonan preferencial pa e por drenta na Parlamento di Aruba: “esaki no a stroba mi persona di e hecho cu mi a continua cu mi afiliacion y participacion activo den partido, formando parti no solamente como candidato sino tambe como miembro di hunta di organisacion afilia na partido manera Fundacion Digna-Lacre Herrera.”

Mientras tanto, cu tempo el a bin reconoce cu e diferencia di pensamentonan y sentimentonan entre esnan mas hoben y otro coleganan tabata creciendo y cu el a encarga su mes di vocifera esaki continuamente durante ultimo 6 aña cu e unico meta “pa partido laga los di custumber y refleha cambionan real pa modernisa formanan di hiba politica na bienestar di pueblo y Aruba su futuro.”

Den ultimo eleccion di aña 2021 su persona a haya 1919 voto preferencial hayando asina e oportunidad pa drenta Parlamento di Aruba como e miembro di mas hoben na e momentonan aki.

Pero e diferencianan den e organisacion pa pensamento y opinion a keda haciendo e situacion no solamente mas complica sino tambe “frustrante” pa su funcionamento den partido y fraccion. Incidentenan manera e situacion cu a presenta den Parlamento pa e caso di parlamentario Mike de Meza y ex-minister di partido MEP Eddie Briesen, ademas di e partijbijeenkomst di 17 di april ultimo, mas diferencianan di opinion pa loke ta trata integridad a culmina un etapa unda hasta a cuestiona y ataca su principionan, manera el a sigura.

“Despues di deliberacion, lamentablemente mi persona no a keda convenci cu realmente e cambionan aki lo tuma luga, pa tal motibo mi a yega na e conclusion cu no ta keda na mi persona otro alternativa di distancia mi mes di partido AVP entregando mi retiro, considerando cu mi no ta reconoce mi mes den e vision y forma di pensa y hiba politica di partido. Lo mi continua cu mi contribucion den politica pa e bienestar y porvenir di pais Aruba y henter comunidad en general.”

Tabata dia 20 di april cu Gerlien Croes a dicidi di haci un conferencia di prensa unda el a pidi comprension y espacio pa por combersa cu su famia y sostenedonan tocante loke e tabata sinti di e situacion cu a surgi y loke a causa su retiro oficial di e partido e dia di ayera.

Awor e lo continua como parlamentario independiente y partido berde ta keda cu 5 asiento so den Parlamento di Aruba.