Problema di abuso sexual den comunidad ta un preocupacion pero tambe pa esnan cu por ta vulnerabel den comunidad. A puntra Stichting voor Verstandelijk Gehandicapten Aruba (SVGA) con ta haci si un mucha cu tin, por ehempel Down Syndrome, of cualkier otro limitacion, wordo abusa sexualmente.
Gisela Polo di SVGA a splica cu inclusion riba e tereno escolar,laboral, y como adulto mes ta nifica cu nan ta conta cu proteccion, loke ta hiba na e hecho cu, hopi biaha persona cu limitacion ta victima di abuso sexual.
A puntra Polo con un mucha cu limitacion por splica cu el a wordo abusa sexualmente. El a splica cu nan clientenan por splica precisamente kico a sosode cu nan; nan por splica kico e situacion ta y nan por mustra kico a tuma luga durante e abuso, ‘kico a drenta aki y aya, unda el a wordo mishi’.
E proceso ta bay manera cualkier otro, e ginecologo ta haci su investigacion pa asina bay polis, y confronta esaki cune. Claro tin comentario cu hende ta bisa ‘ken a bisa cu e persona cu limitacion mes a gusta’. Pero ta parti cu instancia di polis, dokter di cas y tur otro cu mester compronde.
Ta casonan cu ta pasa cerca nan, pero un cliente mes tin e capacidad di por splica detayadamente kico a pasa cu nan. Depende di e investigacion, si tin famia of conoci cu ta abusa di dje, e acto ta raporta na polis anto e proceso ta a sigui. Sinembargo, Polo ta remarca cu nan guia na e fundacion conoce nan cliente bon y ta wak nan tur dia.
Si un dia nan ta ripara cu un mucha ta cambia su conducta of tin algun plekjes straño, ta acerca nan pa sa kico por a pasa. Tin biaha ta rekeri di ayudo specialisa. Anto e ora ey ta haci investigacion canando e protocol pa yega na esey. “Logicamente e muchanan cu ta mas verbal por expresa nan mes mas miho, pero esnan cu no por papia, ta dificil; nan ta mas vulnerabel. Nos tin cu wak nan capacidad y di eynan ta evalua kico e persona por haci den futuro.”
