Desde 13 di maart 2020, Aruba a haya un golpi fuerte riba tur tereno. Nos economia a cay, problemanan social a subi y nos a descrubi cu aunque nos ta un pais cu un GDP di 3 Biyon dollar, nos no a resta nada pa duna tur hende na Aruba di come y bebe. Awor aki nos ta biba den un pais caminda 4000 cas ta sin lus y/of awa y 5000 famia ta haya ayudo di FPNC pa nan tin cuminda. Un pais caminda nos hobennan ta biba sin un perspectiva di tin un trabou fiho, un cas pagabel of un chens pa disfruta di nan hubentud. Mama y tatanan di famia ta desespera pa duna nan yiunan e seguridad di un miho futuro. Un pais cu e Gobiernonan anterior a pone nan sangra awe, pavia di e malversion cu a tuma luga durante e 35 añanan di Mal Gobernacion, corrupcion y malversion di bo placa, placa cu nos tur ta produci, conosi como un pueblo humilde y cu bon manera. 

 

Duna pueblo locual ta di pueblo

Partido PUEBLO PROME ta bay kita e dolor di pueblo. Nos SI ta habri refineria pa crea mas cu 4000 cupo di trabou imediatemente pa esnan cu ta biba aki na Aruba mes, nos ta baha awa y coriente y habri e frontera commercial cu Venezuela pa asina baha costo di bida. Nos lo diversifica nos economia cu e.o. Industria di entretenimiento, arte y cultura internacional, agricultura y ganaderia y crea e requisitonan pa pueblo por habri empresa online manera centro di yamada y servicio industrial. Enseñansa ta wordo adapta gradualmente na tal manera, pa haya un miho conexion cu e mercado laboral y crea espacio structural den e tarea di e maestro pa recapatisacion. PUEBLO PROME ta bay construi locual a wordo destrui, drecha locual a wordo kibra, corta locual no ta funciona y crea e sosten emocional, fysico y mental pa mehora e bida di cada un cuidadano pa asina duna pueblo locual ta di pueblo.

 

Resumen statistico di 20 aña eleccion

Riba e schema abou por lesa entre otro cu desde 1986 Aruba a conose 10 Gobierno:

5x AVP (berde scur), 4x MEP (geel) y 1x MEP/POR/RED (Geel/Blauw/blanco = berde cla). E problema ta obvio y e cambio ta necesario.

Por wak cu na aña 2017, 11.342 votador no a logra deposita nan voto. No laga bo voto bay perdi y asina duna mas peso na e voto di esnan cu si a bay vota. Y locual ta hopi importante pa tuma nota di dje, ta ora mas partido a participa na eleccion, mas restzetel a bay pa e partidonan tradicional cu a causa e crisis financiero cu nos ta den awe. Nan tawata tin e deber pa crea un  reserva pa Aruba. P’esey, esnan cu a causa e problema, no por forma parti di e solucion.

 

Defendor di derecho humano

E unico manera pa nos tur hunto logra e cambio necesario, ta pa pueblo uni y vota en bloque pa un mayoria di respresentacion di e partido PUEBLO PROME den parlamento. Ora PUEBLO PROME haya e sosten y mando di pueblo pa nos defende e derechonan humano di pueblo, crea e condicionnan pa un miho futuro y asina trece e cambio necesario, nos si lo no faya pueblo. Invercionistanan ta cla caba pa cuminsa cu e reapertura di refineria y pone 4500 hende na pia di trabou. PUEBLO PROME ta sigur cu dia 25 di juni 2021 ta bay ta un dia historico den politica di Aruba. Ora pueblo vota pa e rumbo nobo di su pais. Un futuro sin e corrupcion cu ta costa nos 450.000.000 pa aña, sin intimidacion cu bo lo wordo stroba den

bo trabou ora bo duna bo opinion y sin manipulacion di pueblo. Nos ta bay cuminsa di nobo y traha riba un futuro cu seguridad, respet pa e ser humano y proteccion di e derechonan di cada cuidadano.

 

E bon nobo

Pais Aruba ta bay conose e BON NOBO di un maneho cu awor nos tur sa, nunca el a conose pa 35 aña largo: BON GOBERNACION! Cu Gobernantenan cu un curazon pa pueblo, respet, diplomacia y bon manera. Manera mi mama, Beulah Philips dfm, tawata bisa semper: “Bon manera ta habri porta cu bon educacion no ta habri.” Y PUEBLO PROME ta habri e portanan pa nos por sinta como pais igual na mesa cu Hulanda renegocia e miho trato pa pueblo di Aruba, bou di e proteccion di e leynan Internacional cu tin. Partido PUEBLO PROME semper lo pone e bienestar y seguridad di nos pueblo prome.

LEAVE A REPLY

Please enter your comment!
Please enter your name here