GKMB: “Anos no ta esun cu por preveni un brote di dengue, esey mester ta den cada cas, den cada hende”

Brazil ta e pais cu tin mas caso di dengue reporta na nivel mundial, cu 25 miyon di morto for di aña 1980. Recientemente, Argentina a haya su peak mas halto y tambe otro paisnan den region. Aruba tampoco ta scapa di dje, aunke nos no ta registra hopi caso, comunidad mester tuma na serio e medidanan di prevencion.

Mediante un entrevista cu Luis Chong, ken ta fungi como hoofd di Gele Koorts en Muskieten Bestrijding (GKMB), Bon Dia Aruba kier trece dilanti informacion importante pa loke ta trata e prevencion di criadero di e sangura cu ta causa e malesa di dengue, cu algun biaha por resulta mortal.

Departamento di GKMB tin como meta cuida e salud general di comunidad door di controla y combati sangura cu por transmiti malesa, inspecciona y actua diligentemente den situacionnan di peliger cu por presenta den comunidad. Chong a sigura cu nan ta haci controlnan continuo bishitando cas pa cas den tur e barionan di Aruba.

Aparte di e control continuo den casnan, tambe nan ta controla tire shops, casnan di anciano cu ta casnan vulnerabel, scol, hotelnan, entre otro.

Den region Latino Americano y islanan di Caribe tin hopi brote di dengue cu ta tumando lugar, segun loke medionan internacional ta bin reportando recientemente. “E casonan di dengue a eleva compara cu añanan anterior. Organisacion Mundial di Salud (OMS) y Organisacion Panamericano di Salud (PAHO) tambe ta recomenda cu tur hende den regionnan unda tin e sangura Aedes Aegypti pa nan ta mas cauteloso y keda alerta pa casonan di dengue e aña aki,” Chong a menciona.

Na Brazil, Argentina, Paraguay, Colombia, Puerto Rico,entre otronan, e casonan ta redobla hopi mas di loke nan a expect pa loke ta trata e malesa y e mortonan tambe.

Den cuadro aki, Chong a informa cu e sangura Aedes aegypti tambe ta existi na Aruba, pero no na mesun nivel cu na Corsou, unda na comienso di e luna aki gobierno a informa cu ta bay cuminsa tuma accionnan di limpiesa pa motibo cu tres persona a muri debi na e malesa aki.

Minister di Salud di Aruba, Dangui Oduber a señala cu na Aruba tambe ta tumando e medidanan preventivo pa evita un brote di dengue, mirando cu e casonan tabata aumentando. “Aunke na e momentonan aki no tin ningun brote di Dengue na Aruba, ta di importancia crucial pa nos haci tur cos posibel pa preveni esaki. Pa es motibo Ministerio di Salud ta haci un yamada na pueblo pa hunto nos sea responsabel y nos combati criadero di sangura.”

Na e momentonan aki, Aruba tin registra 6 caso confirma di dengue, manera Chong a informa, pero esey no ta nifica cu casonan no lo por aumenta. Importante ta con lihe por actua, con chikito e brote aki ta keda of con grandi e lo por bira si no ta haci nada.

“Pa e tempo aki e casonan ta mas eleva compara cu aña pasa, pero esey por ta tambe cu e dokternan ta mas alerta,” Chong a expresa.

Pa e motibo aki, seccion di GKMB ta mas activo na e momentonan aki. Nan ta ricibi informacion di Departamento di Salud Publico di casonan sospechoso, di cual te ayera tabata na 50. Esaki ta trata di personanan cu ta bay cerca dokter di cas cu diferente sintoma y nan ta haci un test. Cu e casonan sospechoso cu tin te awor, GKMB ta haciendo mas pa bay bishita na e casnan di e pashentnan afecta pa controla e cas y controla e bisiñanan, “pero den e cuadro aki nos mester ta mas alerta y nos ta controla e zona cu ta rond di e casonan sospechoso, esey ta loke nos ta haciendo pa eleva nos alerta.” Chong a declara.

Igualmente, nan a caba di controla e parti turistico, cual ta e parti di High Rise y Low Rise, hunto cu condominionan; ademas di cas di ancianonan cu ta e area mas vulnerabel pa motibo cu dengue por ta mortal tanto pa mucha chikito como pa hende grandi y hendenan cu complicacionnan medico, segun el a sigura.

“Pero e trabao no ta solamente di nos, e trabao ta eigenlijk di comunidad. Nos t’ey pa nos yuda den cierto caminda, pero anos no ta esun cu por preveni un brote di dengue, esey mester ta den cada cas, den cada hende pa duna nan parti, di tene na cura limpi, si nan tin awa para pa nan deshaci di esaki y controla cu no tin criadero di sangura,” Chong a bisa.

Na e momentonan aki, e region ta den un temporada di secura y hopi biento, “pero no ta suppose di tin sangura.” Sinembargo, si nan ta ripara den nan control den e casnan cu tin hemchi di awa of bari cu awa, “cual ta e problema di mas grandi cu nos ta hayando awor y den tur di nan nos ta haya criadero di sangura. Esey ta indica cu e personanan mes na cas ta criando y aumentando e problema aki pa nan mes, pa nan famia y pa e bario.”

Manera ta conoci, ta un tipo di sangura esun cu ta transmiti e malesa di dengue, “Aedes aegypti, cual ta un sangura cu ta biba cu nos. Anos ta cri’e, no ta un sangura di mondi, e ta gusta hende y hende ta cri’e pasobra nan ta esun cu ta laga awa para pa nan. E ta un sangura urbano cu ta crece of biba rond di e cas. Tambe esaki ta e mesun sangura cu ta transmiti Zika, Chikungunya y yellow fever,” el a bisa.

Chong tambe a sigura cu tin un otro sangura cu ta yama “Tigger moskito,” cu tambe ta transmiti dengue pero esey no ta existi na Aruba. “Mi a tende cu na Hulanda si el a wordo introduci door di productonan cu ta bin di Asia, nan por biaha rond di mundo y ta gusta mas awa di riu y Aruba ta hopi seco pa e por sobrevivi akinan.”

El a trece dilanti cu na e casnan cu nan ta hay’e cu tin hemchi cu awa of baki cu awa, nan ta duna e informacion di prevencion pa motibo cu hopi biaha hendenan mes no sa kico esey ta nifica. Den ley tin para cu nan lo por haya un multa, “pero nos no ta bay eynan ainda, pasobra bo kier cooperacion di bo pueblo y unabes bo ta duna hendenan multa, nan no ta bay habri mas e portanan pa bo. Nos ta duna un advertencia.”

A destaca cu comunidad mester yuda pa combati un brote, cu no ta trabao di gobierno of di nan departamento pa haci esey. “Nos ta yuda purba hiba e informacion pa tur hende por preveni, y con bo por preveni? Djis mantene bo area limpi, bo cura limpi, no warda awa ora ta yobe, ni den hemchi. Nos por preveni esey. Tambe ora lo sali, si por purba di bisti manga largo of usa repelente,” el a finalisa.