Gobernacion ta garna for di otro

E dianan di fiesta aki a kita atencion un poco di e acontecimentonan na Curaçao, cu ta señalnan fuerte pa nos sistema politico tambe. Na nos hermana isla diripiente tambe ta bay tin eleccion y mas lihe ainda cu cerca nos.

E coalicion bastante elabora no a wanta mas cu un man yen di luna y ya caba e prome ministro a hay’e ta bay cerca gobernador pa entrega retiro. Y a acorda di biaha cu ta bay tin eleccion. A traha y firma decreto cu rapidez y e contrincantenan politico cu tabatin intencion di no bay eleccion, pero organisa un gobierno nobo a base di un mayoria diferente den parlamento, a keda frustra. Pasobra ya parlamento ta disolvi y nombramento di presidencia nobo di parlamento y pretende di forma un gobierno provisional nobo no lo bay carga aprobacion di Gobernador. No ta keda nan nada otro cu prepara pa eleccion.

Tur e confusion aki ta fruto di e problemanan di algun aña pasa, unda gobierno di prome ministro Schotte a keda sin apoyo den parlamento y a baha, pa keda como gobierno demisionario te despues di eleccion. E fantasma di un gobierno cu no tabatin e decencia di maneha informacion secreto di servicio di inteligencia na un manera debido, a causa cu hunto cu Hulanda a introduci e forma di e gobierno provisional (ad interim) cu ta reemplasa e gobierno demisionario. Awor e spirito a sali di e boter caba y probablemente cada biaha cu un gobierno baha den un situacion similar, nos lo bay mira e conflicto aki, di gobierno nobo a base di mayoria nobo, cu pretencion di reemplasa gobierno demisionario. Ban evita esey aki.

Esey no ta e unico ni e principal tendencia cu nos por mira cerca nos bisiñanan. Tampoco esey ta e bringamento recien den sala di parlamento. E ultimo aki ta sucede regularmente, cerca nos sigur, y  tin biaha den forma pio cu e caso na Curaçao. Un diferencia tin y esey ta cu cerca nan parce cu tin otro tipo di ministerio publico, cu no ta perde pa gana y ta pasa pa aresto inmediato di e victimario. Na Aruba probablemente nos ministerio publico lo a saca un declaracion cu no ta carni ni pisca, indicando cu ‘miho nan regla e asunto aki entre nan’, y por fabor no bin molestia OM, pasobra nan tin cos hopi mas importante pa haci. Loke textualmente ta corecto tambe, pasobra asina importante parlamentario cu falta talento pa regla asunto cu palabra no ta.

Nan no mester ta den parlamento, pero esey ta na nan mes y nan partido pa dicidi si berguensa ta existi. Den tur confusion sin embargo, ta refrescante pa tende cu e partido en cuestion a emiti un declaracion den cual nan a distancia nan mes di e actuacion di nan miembro, cu consecuencia cuesaki ta aleha di e posicion, habriendo caminda pa otro persona. “Zo hoort het”, nos por bisa, pero ki dia na Aruba un partido a yega di distancia nan mes abiertamente di violencia di nan miembro, te pa pone presion cu e persona mester bay? No ta mas bien asina cu nos mester scucha mil y un pretexto di e partido, cu ta orienta na scapa cara y carera di e persona envolvi? Nos tin algo pa siña aki anto, pa colmo di un partido cu un lider cu e mes tin varios aña di prizon ta ward’e, dependiendo di su caso den apelacion na corte.

Pero no ta esey ta e aspecto mas sobresaliente di e situacion na Curaçao. Loke por observa cu cierto preocupacion na e isla ey ta kico ta sucede ora diversificacion politico ta tuma un rumbo robes y e representacion politico di pueblo ta keda fragmenta di tal manera, cu ta bira dificil pa crea gobierno stabiel ainda. Na Aruba nos ta mirando un tendencia cu ta bin di e otro banda, unda despues di cuatro periodo di gobernacion di un solo partido, e probabilidad di un gobierno di coalicion ta mas grandi cu e tabata den hopi aña. Si esey ta bay ta e caso, y si tin mas partido chikito cu ta logra penetra den parlamento, ta na e votado. Pero en todo caso e existencia di mas partido den parlamento no mester conduci na e paralisacion di gobernacion normal, pa motibo cu gobierno(nan) no ta resisti mas cu tanto luna.

Na prome luga esaki ta depende di madurez di e politiconan, cu no mester eleva trampa te nivel di arte. E situacion economico y social di nos isla ta demasiado delicado pa soporta daño a traves di esaki. Pero loke ta mas importante cu tur otro cos ta e participacion di hende cu conocemento y experiencia den partidonan politico, cu mester tin un base di apoyo suficiente, pa por tin algo di ofrece. Cerca nos tambe, irespecto cual partido e ta concerni, esaki ta importante. No ta asina cu ora haya suficiente partido pa organisa un liga di futbol completo, esey necesariamente ta un garantia di calidad, aunke experiencia cu gobierno di un partido tampoco a gana premio di beyesa.

You May Also Like

editorial 2_15_1.jpg

Ministro ta ‘bezig’ cu asbest…

Sin preocupa cu e bisiñanan bibando na menos di 100 metro, e trabao pa ...

Confusion refineria, ken ta papia berdad?

Un articulo riba website di e agencia noticiero Argus tocante avance di trabao na ...

Conflicto entre Universidad y Ministro treci di manera confusivo…

Yegando fin di siman, a surgi e noticia di e conflicto entre directiva di ...

editorial 2_15_1.jpg

E 17 metanan di sostenibilidad: ‘Talk the talk’, o algo mas… enseñansa

Despues di un pauze pa atende e asunto alrededor di nos Gobernador, nos ta ...

CAFT ta duna beneficio di duda

E ofensivo di propaganda di gobierno a cuminsa move seriamente, loke tabata di anticipa cu ...

Gobierno no tin maneho integral…. Citgo y hotel ta e prueba palpable

Nos ta haya nos confronta atrobe cu e hecho cu e maneho di gobierno ...