Riba dialuna, 30 di januari 2017, Gobernador Alfonso Boekhoudt a ricibi e kalender di parha di Aruba di Greg Peterson di Aruba Birdlife Conservation.
Manera cu Bon Dia Aruba a informa caba, dies diferente fotografo a contribui na e proyecto bunita aki. Entre esakinan tabata e miembro di mas hoben Sven Oversteegen di 12 aña di edad. Esaki ta e di nuebe kalender di ABC y e di dos biaha cu Hilton Aruba Caribbean Resort and Casino ta e patrocinado. Dia 31 di januari e kalender a wordo devela den hardin di Hilton Aruba. Presidente di e fundacion sr. Greg Peterson ta informa cu tin 236 especie di parha registra na Aruba cu solamente dos cu ta endemico na e isla: e shoco y prikichi. Ambos ta hunga rolnan principal den e kalender di 2017.
E kalendernan ta costa 15 florin y e entrada completo ta bay na e Fundacion Aruba Birdlife Conservation. E kalendernan ta obtenibel na Huchada Santa Cruz y na Best Deal na Paradera. E kalender tambe ta inclui algun di sr. Greg Peterson su imagennan di parha mas famoso. Recientemente sr. Peterson a caba di publica un buki titula Bird Wildlife of Aruba cual ta obtenibel riba Amazon.com. E buki aki ta contene potretnan completo di mas cu 200 especie di parha saca den e naturalesa di Aruba.
