Meta di gobierno actual ta pa yega 50% di energia limpi na 2021.
Esaki gobierno ta informa den un relato cu ta conta di e bishita di prome minister Evelyn Wever-Croes (MEP) y minister di Transporte, Comunicacion y Sector Primario, Chris Romero (MEP) na e planta WEB.
Aki e mandatarionan a haya un presentacion di e plan cu e planta di awa tin te cu 2021 y tambe a mira cu esaki ta cuadra cu e plan di e gobierno actual pa cu desaroyo di energianan limpi.
“Mester accentua cu hopi aspecto cu a bin dilanti di parti di WEB NV cuadra cu e pensamento y plan di gobernacion di gabinete Wever-Croes. Un di e metanan di e gobierno actual pa loke ta energia limpi, ta di haci menos uzo posibel di loke nos conoce como heavy fuel oil y di e manera aki ta sigura un proteccion mas concreto di nos medio ambiente. Pero apart di ta proteha medio ambiente, lo bay baha e gastonan halto cu heavy fuel oil tin cun’e”, segun e relato.
“E idea y meta ta cu pa aña 2021 Aruba por yega na conta cu 50% di energia limpi pa nos propio uzo. Actualmente, Aruba ta conta cu unicamente 15% pa 16% di energia limpi, y esaki ta algo cu no a cambia den e ultimo 8 añanan”, segun gobierno.
Mayoria di e energia limpi ta bin for di e parke di molina di biento. “Aki ta unda gobierno ta coincidi cu e pensamento di WEB Aruba pa amplia e cantidad di molina un poco mas y asina yega na un porcentahe mas halto di energia alternativo y limpi.”
Mas energia solar y gas natural
Pero pa por yega na e meta di 50% di energia limpi, gobierno ta indica cu nan ta pensa di amplia e suministro di energia solar.
“Awendia e gastonan pa por yega na produci energia solar a baha considerablemente, cual ta un bon bentaha pa nos na Aruba. Di nan banda, WEB tin e intencion pa traha un otro parke solar, cual lo yuda yega na e 50% di energia limpi pa 2021, pero tambe ta contribui na e plan cu gobierno tin pa Aruba yega na ta mas auto sostenibel door di cuminsa produci nos mesun energia.”
Otro di e metanan di e gobierno aki ta pa logra bira independiente di e azeta door di bay haci uzo di gas natural.
E plan aki mas tanto no ta mucho diferente cu esun di e gobierno anterior. Sinembargo punto crucial ta e diferencia di opinion riba e parke di molina na Urirama. No ta conoci te awor kico e gobierno actual lo haci cu e proyecto aki. Te ainda e proyecto no a sigui como cu habitantenan di e barionan cerca ta bringando esaki den corte. Un otro diferente cu e gobierno anterior ta cu nan a declara cu Aruba ya ta na 50% di energia limpi y cu na 2020 esaki lo mester ta 100%.
