A tuma nota den medionan di comunicacion y medionan social cu tin hopi confusion pa cu e motibonan di e welga di e managernan di unidad di EPI, e exigencianan cu tin di nan banda y e status di e deliberacionnan. For di comunicadonan di sindicato SIMAR por ripara cu nan mes ta contradeci nan mes pa loke ta nan causa y e historia di e proceso aki. Tur esaki ta trece hopi confusion bou di e studiantenan, docentenan, mayornan y comunidad en general cu no ta compronde e rason nan completamente pakico ainda e managernan di unidad ta den welga. Gobierno ta haye sumamente iresponsabel di e managernan di unidad y di sindicato SIMAR cu ta pone studiantenan y docentenan memey di full e asunto aki, dunando e docentenan y e hobennan un start falso pa cu aña escolar 2016-2017.
Siman pasa SIMAR y managernan di unidad a presenta via di nan abogado un carta cu 5 exigencia concreto na gobierno. Gobierno a bay di acuerdo cu 4 di e 5 exigencianan aki e mesun dia, cu ta inclui 1) oranan adicional pa docentenan pa sostene e managernan di unidad den nan tareanan, 2) lo facilita nan den 2 siman cu nan descripcion di tarea actualisa, 3) den un periodo di 3 luna lo duna claridad riba e proceso di “functiehuis” y implicacion specifico pa nan posicion como parti di MBO na Aruba, 4) gobierno lo facilita cu un proceso di mediacion externo pa guia directorado y managernan di unidad pa mehora e comunicacion y colaboracion.
Adicional na tur esaki gobierno a ofrece e managernan di unidad un compensacion (gratificacion) pa e periodo cu ta trahando riba e structura di e school. Gobierno a presenta un solucion factibel na SIMAR y managernan di unidad otorgando 32 ora di tarea (un trabou completo) adicional pa cada unidad pa por wordo aloca na docentenan cu por haci cierto trabounan den e unidadnan cu tin 2 Manager te ora bin claridad riba e structura di e school, incluyendo kico ta e cantidad di managernan di unidad necesario a base di entre otro cuanto alumno y estudionan cada unidad tin.
Esaki nan ta e puntonan cu mester wordo clarifica prome cu bay over na nombra un otro managernan di unidad. Tur esaki lo keda cla dentro di 4 luna, pues no ta pa un tempo indefini. Lastimamente SIMAR y managernan di unidad no a acepta esaki y ta keda para ariba nan punto cu vacatura pa e di 3 manager mester sali di inmediato sin cu e proceso a keda finalisa. E punto di e vacatura pa e di 3 unidad manager ta e unico punto pendiente y esaki a resulta di ta e “dealbreaker” pa e managernan di unidad y SIMAR.
A purba na splica na mas cu un ocasion cu e proceso cu gobierno a scoge pe ta hustamente pa yega na un solucion structural y duradero pa loke ta e structura di EPI, y no pa bolbe yena buraco mientras tur hende ta consciente cu status quo no lo conduci na un EPI mas efectivo. Ta di lamenta cu e managernan di unidad a perde e interes general for di bista y nan posicion ta perhudicando e docentenan, studiantenan y e organisacion den su totalidad. Manera palabra e descripcion di tarea nobo di tanto managernan di estudio manager como managernan di guia a keda formalisa y inclui den e buki di funcion pa cu e Proyecto di restructuracion di salario. E punto cu tin pendiente ta e formacion di maneho cu lo defini e cantidad di manager na cada unidad.
Awor lo hiba SIMAR y managernan di unidad corte por medio di un caso sumario pa corte por instrui nan pa resumi nan trabou na bienestar di studiantenan y docentenan manera debe ser.
Gobierno ta asumi su responsabilidad facilitando e managernan di unidad lo maximo posibel y pa entama un proceso cu lo trece cambio di berdad pa cu e funcionamento di e school.
