Ayera mainta a tuma luga un reunion publico den Parlamento, durante cual prome minister Mike Eman (AVP), hunto cu minister di Relacionnan den Reino Gerlien Croes y minister di Finanzas Geoffrey Wever (Futuro), a duna un splicacion tocante Ley di Supervision Financiero di Aruba (Rijkswet), manera pidi pa e fraccionnan di PPA y MEP. Despues di splicacion di e ministernan, a pospone e reunion cu dos siman riba peticion di fraccion AVP, cu a hiba fraccion PPA y MEP na tuma decision pa entrega un keho na Gobernador di Aruba.
Prome minister Mike Eman a splica cu manera ya ta conoci, parlamento a delibera riba e topico aki den diferente reunion publico. El a remarca cu e tema di Rijkswet ta un tema cu ta tene Reino Hulandes hopi ocupa y a mira discusionnan andando pa basta aña caba y diferente concepto a ser desaroya pa mira con por duna contenido na e pensamentonan cu tin rond di e forma con Reino por traha hunto pa loke ta trata e parti financiero.
El a sigui splica cu den cuadro cu esaki tabatin negociacionnan di e gabinete anterior caminda tabatin bestuurlijk overleg y despues bestuurlijk akkoord cu a ser realisa. Despues di cambio di gobernacion, Gabinete AVP-FUTURO a sigui cu e comision cu tabata traha riba esaki y durante e reunion publico a informa parlamento cu den Conseho di Minister di Reino di ayera, gobierno di Aruba a presenta e concepto di Rijkswet.
“Awor ta sigui cu henter e proceso di discusion cu mester tin di Raad van Advies y e parlamentonan. Diferente di e temanan cu a ser hopi discuti a ser acorda finalmente den forma cu nos ta sinti ta na fabor di nos comunidad y Aruba,” Eman a enfatisa.
Gabinete AVP-FUTURO a entrega na Parlamento di Aruba e concept landsverordening waarborging houdbare overheidsfinanciën (concepto di ordenansa nacional cu ta garantisa finanzas sostenibel di gobierno), e concept memorie van toelichting op concept landsverordening waarborging houdbare overheids financieen (concepto di splicacion riba e concepto di ordenansa nacional cu ta garantisa finanzas sostenibel di gobierno), e concept voorstel Rijkswet (concepto di proposicion pa Ley di Reino), y e concept memorie van toelichting op het concept voorstel Rijkswet (concepto di splicacion riba e concepto di proposicion pa Ley di Reino) cu a ser entrega na Conseho di Minister di Reino.
Prome minister Eman a remarca cu awor ta inicia e proceso caminda comunidad y parlamento por duna nan pensamentonan riba e concepto aki.
“Nos como gobierno ta contento cu por a yega na e punto aki, pasobra nos ta kere e ta trece un trankilidad importante den relacionnan di Reino, e ta kita un inkietud y un disputa cu ta andando basta tempo y nos comunidad tin mester di e trankilidad aki. Y basa riba cumplimento di Aruba riba acuerdonan cu a ser cera irespecto cual gobierno, ta mustra un sentido di madurez y responsabilidad cu pais Aruba tin,” el a enfatisa.
E mandatario a splica cu awor e proceso ta cuminsa na nivel administrativo caminda parlamento tin oportunidad pa repasa, duna opinion, haci sugerencia di cambio, y mescos lo sucede na Hulanda.
Schorsing y protesta
Despues di splicacion di e ministernan, lider di fraccion AVP, parlamentario Jennifer Arends-Reyes, den nomber di fraccion AVP a pidi presidente di parlamento Sr. Marlon Sneek un schorsing di mas o menos dos siman pa asina nan por repasa e documentonan cu nan a ricibi pa asina nan por fiha un posicion.
Esaki no a cay den bon tera cu fraccion MEP ni PPA. Lider di fraccion MEP, Evelyn Wever-Croes, a recorda presidente di parlamento cu ta e dos fraccion a pidi reunion siete luna pasa. Y aunke apenas nan a ricibi e pakete di documento for di gobierno, tanto MEP y PPA a pidi pa e reunion continua, mirando cu ya nan tabatin pregunta pa realisa na gobierno.
“Ora AVP ta cla aki dos siman, AVP por pidi un reunion y nos lo t’ey sigur pa debati. Na e momentonan aki pa buena marcha, pa transparencia, e reunion aki tin cu continua pa haya e informacion cu nos ta buscando,” Wever-Croes a enfatisa.
A pesar cu tanto fraccion PPA como MEP a insisti pa reunion continua, presidente di parlamento a tuma decision pa toch schors e reunion te proximo aviso.
Esaki a haci cu tanto MEP y PPA a tuma decision pa inmediatamente entrega un carta di keho cerca Gobernador di Aruba, SE Alfonso Boekhoudt. Na salida di oficina di Gobernador di Aruba, Wever-Croes a expresa cu “awe ta un dia hopi scur” despues cu presidente di parlamento a schors e reunion cu nan a warda siete luna pa por a tuma luga.
“Nos a pidi e reunion, nos ta cla pa e debate, pakico bo tin miedo pa e debate tuma luga? Si AVP mester dos siman, y den dos siman nan mester di un reunion nan por pidie toch? Nan lo hay’e mesora. Nos tin cu warda siete luna pa un reunion y awor cu a reunion a ser yama nan ta boicotia e reunion,” el a subraya.
El a splica cu tanto fraccion MEP como PPA a bay na Gobernador pasobra gobierno no ta aplica transparencia den e situacion aki. “Esaki ta dictadura di marca mayor,” el a enfatisa. El a sigui splica cu tin un palabracion haci cu parlamento y gobierno pa loke ta trata Rijkswet, cu ta bisa cu gobierno no ta entrega un Rijkswet sin consulta cu parlamento.
Parlamentario Wever-Croes a agrega cu ademas gobierno a scoge e pio momento pa entrega e Rijkswet, pasobra den e Conseho di Minister di Reino ta dos partido ta ser representa, BBB y VVD, cu ta partidonan cu no tin afinidad cu Aruba.
El a splica cu nan a propone desde reunion di dialuna ultimo pa warda un rato cu e negociacionnan pa e gobierno nobo forma na Hulanda pasobra eyden ta bay tin mas partido cu tin hopi mas afinidad cu Aruba y e ora ta sigui negocia. “No por core entreg’e awor na e pio momento historicamente pa cu e relacion entre Hulanda y Aruba,” el a enfatisa.
Por ultimo el a indica cu den e carta di keho cu nan a entrega na Gobernador di Aruba, nan a pidi Gobernador pa intermedia pa Parlamento di Aruba haci su trabao debido, algo cu actualmente nan no por haci pa motibo di un grupito ta stroba nan di haci e trabao.
