Siman pasa Joselin Croes den nomber di gobierno di Aruba, y riba peticion di Minister Lampe, a firma un MoU cu Wayne State College. E MoU ta honra tur studiante di Aruba pa haya un tarifa special, igual na e tarifa cu un residente di Nebraska lo paga.
E ‘in-state tuition fee’ lo ta mas o menos USD 5500 pa aña. Riba esaki ta bin e gastonan di camber, cuminda, seguro y buki cu ta mas o menos USD 10.000 pa aña, cu ta un suma total di mas o menos USD 15.000 pa aña pa un studiante por caba su Bachelor Degree y Master Degree. Wayne State College ta ofrece mas di 100 diferente curiculo, pero nan specialisacion ta educacion, economia, computer y arte. Den ramo di educacion nan ta cubri master den educacion pero tambe pa educacion pa hobennan special, counceling, pa directornan di scol y administracion di scol. Algun di nan ta on-line haciendo e posibel pa maestronan por sigui studia na Aruba.
Actualmente tin 27 studiante di Corsou na Wayne State College studiando Sports Management, Music, Business & Technology, Criminal Justice, Human Resource Management etc. Minister plenipotenciario a haya chens pa combersa cu varios di nan y puntra nan dicon nan a scoge pa bin studia na un scol asina aleha den un estado asina chikito. Nan contesta unanime tawata cu e prijs ta hopi bon, e nivel di educacion ta hopi halto y hopi importante ta cu e comunidad ta chikito y cu nan bos ta wordo scucha. Cualkier problema cu nan tin ta wordo resolvi, si nan ta malo tin un enfermeria cu ta atende cu nan, fin di siman nan ta comparti cu famianan cu ta invita nan pa come of bay bishita e ciudadnan mas grandi. Nan ta haya conseho y tin un hopi bon ‘help desk’ cu ta prepara nan pa drenta mercado laboral y of scoge nan master degree. Pa algun di nan cu tawata tin problema cu nan educacion nan ta bisa cu Wayne State ta perfecto paso nan ta haya hopi ayudo di tur e maestronan y nan tin tur tempo di mundo pa studia paso no tin hopi cos di haci eybanda.
Despues di a pasa dos dia na e Universidad, minister plenipotenciario ta compronde loke ta atrae un studiante pa bin Wayne State. Wayne su parti atletico ta hopi fuerte, nan tin football, baseball, softball, rugby, atletiek y hopi mas na un nivel competitivo. Nan tin un curicuclo hopi fuerte den business and technology, arte, musica, educacion y tecnologia. Nan facilidad tin ekiponan sofistica pa duna les den ingenieria, construccion, tecnologia y computer sciences. Den un ambiente sigur cu solamente 3500 studiante den un estado hopi keto e studiante tin tur tempo y oportunidad pa studia y caba su Bachelor y Master na un prijs hopi abou.
Minister Plenipotenciario di Aruba na Merca, Joselin Croes ta felicita Minister di Educacion Armando Lampe cu e logro grandi di haya “in-state tuition fee” pa tur studiante di Aruba cu kier bay studia na Wayne State na Nebraska.
Na Juni 2019 e team di Wayne lo biaha pa Aruba pa topa cu Minister di Educacion, Universidad di Aruba, IPA, International School of Aruba, Colegio Arubano y EPI pa elabora riba un MoU cu nan kier firma cu varios di e institutonan aki pa ‘student exchange programs’, ‘internships’, ‘research’, ‘capacity building’, ‘teachers leadership programs’, ‘counseling programs’ y programanan pa maestronan cu ta duna les na muchanan special.
