Cambio di gobierno semper ta trece cambio den maneho di asunto cu mester atende. Esey ta algo logico, ta pesey tin eleccion pa facilita cambio, basta cu esey ta sucede respetando regla legal cu ta conta pa nos tur, tambe pa gobierno mes. Y haciendo tur cos bon desde inicio ta scapa nos placa. E casonan den corte cu ta aparece despues di cada cambio di gobierno ta mustra cu e realidad ainda ta leu di perfecto. E caso actual di Utlities Aruba NV, den cual corte, si no tin apelacion, a dicidi na fabor di e compania estatal den e asunto di retiro di comisario anterior di e empresanan subsidiario, ta ilustra bon cla cu aparentemente – atrobe – e ‘entusiasmo’ inicial di e gabinete nobo a conduci na accion den pura y sin tuma na cuenta e caminda legal cu mester cana semper. Esaki no ta promer biaha; na 2009 entrada di mesun partido mayoritario a bay acompaña pa e exigencia cu tur persona den tur entidad unda gobierno di Aruba tin influencia y derecho di nombramento, mester a entrega nan retiro voluntariamente. Den mayoria di caso esey a tuma lugar, pero esey no ta bisa cu asina e ruta legal ta. Si un persona considera cu su retiro no tin validez legal, ta na e otro partido pa bay ‘find out’ ta con ta retira hende, aunke ta mas recomendable pa haci esey di antemano. Pero, e entusiasmo describi anteriormente te awe ainda ta stroba actuacion legalmente corecto; esey por a mira tambe varios aña pasa den e caso di e miembronan di directiva di fundacion Lotto pa Deporte, cu na promer instante a keda retira di forma ilegitimo y a laga un ministro frustra pa e hecho cu su poder aparentemente no ta ilimita, pasobra tin algo, fastioso tin ora, cu yama ley…

Ley, den e caso actual tambe ta traha pa ora cos no ta bay asina facil; por ehemplo ora miembro di directiva o comisario di supervision no ta haci caso, cu nan bon derecho, di peticion/exigencia di retiro voluntario. E reglanan pa por ehemplo un persona huridico manera un sociedad anonimo (NV) ta bon describi den e Codigo Civil – renoba – di Aruba y cu regla pa nombramento y retiro. E reglanan renoba a reconfirma un poder clave den un NV: asamblea general di accionista ta e organo dentro di e persona huridico cu ta nombra y retira director y miembro di hunta di comisario. Esaki ta e background di un cambio cu a haci den e statutonan di WEB Aruba NV na februari di e aña aki, pa trece esaki den concordancia cu e regla actual di Codigo Civil, cu no ta laga espacio mas pa delega poder di asamblea na otro organo den e persona huridico.

Pa bolbe na actualidad; por a tuma nota cu despues cu e entusiasmo inicial a mengua, tambe pa e perdida sufri den e promer caso den corte, cu veredicto faborable pa e comisarionan retira incorectamente, awor no mas a bin haci nan ‘huiswerk’ debidamente y a cana e pasonan legal corecto pa un siguiente ronda di retiro. Esaki a conduci na un veredicto den cual e comisarionan retira no a haya razon.Cu esaki nos por cera e capitulo aki? Si, y no. Si, esun aki mes a yega su final, salvo un caso di apelacion cu na nos parecer no tin ningun perspectiva. Pero esey no lo libera nos di e tipo di suceso aki, cu ta fruto di e ambicion y arogancia tipico di e momento di gloria, partidista y individual,ora ta asumi responsabilidad gubernamental. Nos lo keda mira e fenomeno aki, cu no ta bin solamente di hende cu no sa mihor. Den e caso aki e agravante ta cu e pifia ta bin di e top cu mester sa mihor y ademas tin acceso na asesoria legal di mihor calidad cu e pais aki por ofrece.Pero, e hecho cu bo tin acceso na asesoria di calidad no mester significa cu ta cuminza pa subi e ruta aki, djis pa e bufete cu ta ‘na turno’ pa guia gobierno den e procesonan huridico, por cuminza cobra. Claro cu gobierno(nan) ta busca apoyo huridico specializa y tin suficiente caso unda esaki ta hustifica, pero esaki ta costa hopi placa. Loke ta keda straña nos ta cu semper tin un bufete, dependiendo di e color politico, cu aparentemente tin tur experticio riba cualkier tereno. Esaki ta obliga nos supone cu nan tin un staff sumamente amplio pa cubri tur e specialidadnan aki, loke dentro di realidad di e isla chikito aki ta parce ilogico. E modo di opera ta cu e politicota scoge hende di su mesun pensamento, y no primeramente pa nan nivel profesional, pa despues coregi eror di e team cu abogado caro.Pero den e epoca moderno aki esey no ta cuadra cu e consignanan di ‘bon gobernacion’ na tur parti di mundo, cu a conduci na legislacion corespondiente na varios pais. Cerca nos e practica ta keda limita na papiadi e topico y legislacion cu no ta parce di yega te na publico. Mientras tanto lo ta bon si gobiernocuminza aplica anto e reglanan di semper, cu no ta skirbi den piedra pero cu tur huez tambe ta maneha, di ‘deugdelijk openbaar bestuur’ den nan forma di opera, pa e casonan no mester keda yega cerca e mesun huez ey. No gasta placa publico na caso inutil y innecesario.