Ayera 28 di februari, Gobierno di Aruba oficialmente a inicia e proceso pa transforma e ex-edificio di Ministerio Publico (OM) den Oranjestad den un compleho di apartamento pa studiante, como parti di diferente iniciativa di Gobierno di Aruba pa revitalisa centro di Oranjestad.
Parti di e vision di Minister di Asunto Economico, Geoffrey Wever ta pa mas hende cuminsa biba den centro di Oranjestad y pa edificionan bandona wordo renoba, specialmente cu destino pa studiante.
Hunto cu Minister-President, Sra. Evelyn Wever-Croes, encarga tambe cu DIP, cu ta maneha e propiedadnan di Pais Aruba, a drenta den combersacionnan cu FCCA, cu a mustra interes pa adkiri e propiedad aki y converti esaki den un “studentenflat” – compleho di apartamento pa studiante.
Pa cumpli cu reglanan stipula pa hurisprudencia cu ta conta pa Gobierno di Aruba, mester duna otro interesadonan tambe un oportunidad pa obhecion contra e decision aki prome cu por drenta den un acuerdo definitivo cu FCCA, y pa e motibo ey un publicacion di e intencion di Minister-Presidente y Minister di Economia a tuma lugar 27 di februari ultimo.
E iniciativa aki ta forma parti di un esfuerso mas amplio pa revitalisa e centro di Oranjestad. Gobierno di Aruba ta comprometi pa revitalisa e curason di e capital, y transforma espacionan bandona den oportunidadnan pa desaroyo economico, segun un comunicado di prensa. Si studiantenan biba den centro di Oranjestad, nan lo por cana bay Universidad di Aruba y lo trece full un dinamica nobo pa centro di Oranjestad.
E colaboracion entre gobierno y sector priva ta destaca como un ehempel di con planificacion urbano y desaroyo sostenibel por traha hunto pa beneficio di e comunidad, y ta fundamental pa e exito di e proyecto aki, combinando recurso y experiencia pa alcansa un meta comun.
