Dialuna anochi ariba nan pagina oficial di Facebook, Crisis Management Office (CMO) a anuncia cu Aruba a pasa di codigo geel pa codigo oranje den e Oil spill incident Trinidad & Tobago.
Recientemente, segun e portal di noticia local NoticiaCla ta reporta, director di CMO, Rino Hermans, a declara na prensa internacional cu Gobierno di Aruba tin planea pa activa un ekipo di 60 hende, cu ta inclui personal di prome auxilio y personal di limpiesa, pa atende cu e situacion di derame di petroleo si esaki yega costa di Aruba.
Manera diferente medio di comunicacion local y internacional a publica, e derame di petroleo cu a sucede na Trinidad y Tobago a yega costa di Bonaire e siman aki y den bista di esaki Aruba a anuncia cu ta pasa for di codigo geel pa un codigo oranje.
E fase oranje aki, CMO ta splica, den e plan di accion pa locual ta regarda Oil Spill pa Aruba ta cu asina cu Bonaire sinti efecto di un Oil Spill Aruba ta pasa pa e fase oranje/standby. Den e fase aki lo pasa na costanan regularmente y monitor si por constata patchnan/teer cu por a yega nan nos costa
Segun e portal di noticia ta indica, Hermans a splica cu a dividi Aruba den 4 seccion y cada departamento ta encarga cu e monitoreo di e situacion. Accionnan cu lo wordo tuma den caso cu constata patchnan/ teer di azeta na e costa di Aruba ta:
Accion di limpiesa lo tuma luga di inmediato si e ta na un di e sitionan cu publico ta landa; si e ta na un di e sitionan cu turtuga tin neishi of cu nan ta usa pa nan neishi. CMO no lo tuma accion inmediato si ta trata patch/teer riba barancanan, esakinan lo keda si nan no ta representa riesgo pa hende of bestia
Gobierno di Bonaire a bisa cu e azeta tabata mustra un menasa serio pa tanto humano y naturalesa y cu servicio di emergencia a keda activa, e portal di noticia local a indica.
