Gobierno di Aruba y Aruba Circular Economy Foundation: A firma un MOU cu meta pa aumenta consciencia riba economia circular na Aruba

Cu e obhetivo di implementacion di “Circular Economy Action Plan”, Gobierno di Aruba y Aruba Circular Economy Foundation (ACEF) a firma un Memorandum of Understanding (MOU) durante un ceremonia virtual, unda e enfoke di ACEF lo aumenta e consciencia riba economia circular pa asina acelera e transicion pa un modelo economico sostenibel, independiente y inclusivo pa Aruba.

Den un comunicado di prensa di Ministerio di Asuntonan Economico, Comunicacion y Desaroyo Sostenibel a señala cu ACEF ta un fundacion non-profit y ta consisti di miembronan local y internacional cu experticio diverso y experiencia, trahando riba e temanan di sostenibilidad y economia circular. E enfoke di e fundacion ta pa crea consciencia (awareness), promove conocemento di economia circular, y stimula “Circular thinking and practice” – pues pensamento y practica (estilo di bida) circular – na Aruba.

Minister Geoffrey Wever a splica di ta contento di por inicia e partnership aki hunto cu ACEF, unda cu e colaboracion lo por sigura miho esfuerso den inspira, motiva y empodera ciudadano di Aruba y tambe negoshinan local pa haci e transicion den un ritmo mas rapido. E parti di “public awareness” ta importante pa e ministerio su implementacion di “Circular Economy Action Plan” cual oficialmente lo ser lansa fin di e luna aki.

Firmamento di e MOU ta sirbi como un prome paso concreto den e direccion di un partnership colaborativo duradero entre Gobierno di Aruba y ACEF pa asina cuminsa implementa e “Circular Economy Action Plan”. Ambos organisacion y gobierno ta kere firmemente den e oportunidadnan cu e economia circular ta representa pa e desaroyo di Aruba, y ta comprometi den stimula e transicion mas pronto posibel.

Durante e reunion tabata presente pa firma Mr. Geoffrey Wever (Minister di Asuntonan Economico, Comunicacion y Desaroyo Sostenibel) y Mr. Egidio Bundel (Presidente di ACEF), acompaña pa Mr. Bauke Feenstra (Treasurer ACEF), Mrs. Eunice Semeleer (Sustainability Policy and Strategy Advisor) and Mr. Jeremy Croes (Circular Economy Project Lead).

Economia circular ta trece hopi beneficio cu lo mester yuda disminui e uso di recursonan, reduci e produccion di desperdicio y limita e consumo di energia, ademas tin beneficio ambiental cu lo permiti haya un bentaha competitivo den e contexto di globalisacion.

E ta promove e diseño superior di materialnan, sistemanan y modelonan comercial, pa contribui na e capital economico, natural y social e rason pa e cual e sistema aki ta diseña pa beneficia companianan, creando un balor comparti, pa e sociedad y medio ambiente.

Pa cada aña na Europa, ta wordo utilisa den promedio casi 16 ton di material pa persona pa asina nan por move nan economia, ademas di 6 ton mas cu ta bira desperdicio, di otro banda, casi e mita di desperdicio genera ta termina na dumpnan.

E principionan di economia circular ta consisti di e promocion di preservacion di capital natural y ta fomenta e importancia di selecciona di forma consciente e recursonan, tecnologia y procesonan, cu e fin cu cada biaha lo ta mas eficiente den e cadena di produccion.

Esaki ta convoca pa duna prioridad na utilisacion di fluho di recursonan natural y renovable, si ta posibel, materialnan organico, palo y desperdicio vegetal cu despues di usa nan por bay back na medio ambiente of por wordo probecha cu energia renovable.

E segundo principio ta enfoca riba mehoracion di uso di recursonan, componentenan of materialnan, di forma cu nan por wordo someti na proceso di reparacion of reciclahe cu ta busca promove e implementacion di ciclonan interno di companianan.

E ultimo principio ta trata di fomenta eco-eficacia di sistema, identifica e diseño, fayonan cu su uso por genera como por ehemplo, elementonan toxico, emision di contaminacion of desperdicionan cu por implica un daño pa salud y medio ambiente.

Ta casi tres siman pasa cu na Aruba a tuma luga e di 10 edicion di ‘Sustainable Education Symposium’ (SES) 2022. E titulo di e simposio di e aña aki tabata ‘Road to the Circular Economy’ cual a wordo organisa pa Biblioteca Nacional di Aruba hunto cu Aruba Circular Economy Foundation (ACEF) cu a conta cu e presencia di oradornan local y internacional.

Den e simposio aki tabata presente Dylan Farro, ta un Statistical Analyst na Banco Central di Aruba y actualmente ta finalisando su maestria den data analytics.

E titulo di e presentacion di Farro pa e simposio tabata “Exploring Consumers Circular Economic Behavior”, unda cu segun esaki ta e prome investigacion di su tipo cu riba un manera cuantitativo a investiga kico ta motiva economia circular na Aruba.

El a remarca cu no solamente na Aruba, pero mundialmente, tin un escasez di data ariba e tereno di economia circular. E falta di data aki ta un problema pasobra expertonan no por determina necesariamente unda un pais ta, y consecuentemente nan no sa con pa yega caminda cu mester bay.

Pa Minister di Asunto Economico, Comunicacion y Desaroyo Sostenibel Geoffrey Wever e tipo di eventonan aki ta importante pa promove sostenibilidad y economia circular na Aruba y unda e ta menciona cu economia circular ta un modelo holistico pa logra sostenibilidad y a haci un yamada na un y tur pa uni tras di e meta aki den cual ta haci uso di innovacion tecnologico, organisacional, cultural y financiero pa avansa e transicion na un modelo economico na Aruba cu ta sostenibel, circular y ‘self-reliant’ incluso.