Gobierno Colombiano lo participa den e restructuracion financiero di e aerolinea Avianca pa e cual a otorga un prestamo di 370 miyon dollar, cu e fin di preserva e servicio aereo nacional, siman pasa e Ministerio di Hacienda a informa.
Na luna di mei pasa, Avianca a protege su mes bou ley di bancarota di Merca pa inicia un proceso di reorganisacion debi na impacto di crisis Covid-19, cu na final di maart a obliga e companianan aereo di e pais laga nan avion na tera.
Comite di Administracion di Fondo di Mitigacion di Emergencia (FOME) cu ta maneha e recursonan pa enfrenta e pandemia, diasabra ultimo a autorisa “e participacion di e nacion den e restructuracion di Avianca, mediante e financiamento di hasta 370 miyon dollar den e proceso cu e empresa ta sigui bao capitulo 11 di Codigo di Bancarota di Merca”, e cartera di Hacienda a manifesta den un comunicado.
E informacion ta agrega cu “e operacion aki mester ta evalua y autorisa pa un hues cu ta encarga di e caso na Tribunal di Districto Sur di New York”. E transaccion lo conta cu aporte nobo di inversionistanan existente, asina como di aporte nobo di participantenan cu condicion den mercado.
E medida a bin despues di un proceso di analisis y estudio di alternativanan riba e participacion di gobierno cu a cuminsa na maart di aña aki, ora e compania tabatin un prome encuentro pa busca financiamento.
Pa otorga e prestamo, Gobierno Colombiano a tuma na cuenta cu Avianca ta e compania aereo mas grandi na e pais, cu un participacion di 45,5% na mercado di pasaheronan transporta na 2019, a sirbi pa mas di 75 destino na e pais y exterior.
Avianca Holding ta genera mas di 21.000 empleo directo y indirecto na Latino America, di e cual mas di 14.000 ta na Colombia, y ta traha cu un red di mas di 3.000 proveedo.
