(AP) — Gobierno entrante Israeli di Benjamin Netanyahu a pone expansion di asentamentonan na West Bank como maximo prioridad riba su lista ayera, primintiendo di legalisa decenas di outpost construi ilegalmente y anexa e teritorio ocupa como parti di su acuerdo di coalicion cu aliadonan ultra-nacionalista.
E acuerdonan di coalicion, publica un dia prome cu gobierno ta programa pa keda huramenta, tambe ta inclui lenguahe sosteniendo discriminacion contra hende LGBTQ basa riba religion, reformanan hudicial contencioso y toelagenan generoso pa hombernan ultra-Ortodox cu ta preferi studia en bes di traha.
E pakete a habri caminda pa loke ta spera di ta un comienso turbulento pa e gobierno mas religioso y derechista den historia di e pais, potencialmente poniendo partinan grandi di publico Israeli den conflicto, sacudiendo e aliadonan mas cercano di Israel y escalando tension cu Palestina.
“Loke ta preocupa mi mas ta cu e acuerdonan aki ta cambia e structura democratico di loke nos ta conoce como Estado di Israel”, segun Tomer Naor, chief legal officer di e Movemento pa Gobernacion di Calidad na Israel, un grupo di vigilancia. “Un dia nos tur ta bay lanta y Netanyahu no ta bay ta prome minister mas, pero e cambionan aki ta bay ta ireversible.”
E guia tabata lidera pa un compromiso pa “avansa y desaroya asentamentonan na tur parti di pais Israel”, incluyendo “Judea y Samaria”, e nombernan biblico pa West Bank.
Israel a captura West Bank na 1967 hunto cu Gaza Strip y Jerusalem occidental – teritorio cual e Palestinonan kier pa un futuro estado. Israel a construi decenas di asentamento Hudiu, hogar na alrededor di 500mil Israeli cu ta biba banda di 2.5 miyon Palestino.
Mayoria di comunidad internacional ta considera e asentamentonan di Israel na West Bank ilegal, y un obstaculo pa paz cu e Palestinonan. Merca ya a adverti e gobierno entrante contra tuma stapnan cu por socava speransa pa un estado Palestino independiente.
Respondiendo na un solicitud pa comentario, liderazgo Palestino a enfatisa cu e conflicto Israeli-Palestino por keda resolvi solamente mediante establecimento di un estado Palestino cu Jerusalem oriental como capital.
Sin un solucion negocia di dos estado, “no ta bay tin paz, seguridad ni stabilidad den e region”, segun Nabil Abu Rdeneh, vocero di presidente Palestino, Mahmoud Abbas.
Den acuerdo di coalicion entre Likud di Netanyahu y su aliado, partido Zionismo Religioso, Netanyahu a priminti di legalisa puntonan di asentamento cual hasta gobierno Israeli ta considera ilegal. E tambe ta priminti pa anexa West Bank “scogiendo e momento y considerando interesnan nacional y internacional di estado di Israel.”
Un movida asina lo aliena hopi di mundo y duna municion pa criticonan cu ta compara politica Israeli den West Bank cu apartheid na Sur Africa.
E acuerdo tambe ta faborece Itamar Ben-Gvir, un politico derechista cu ta bay ta a cargo di cuerpo policial nacional como e recien-crea minister di Seguridad Nacional.
E ta inclui un compromiso pa expande y aumenta fondo pa e asentamentonan Israeli den e ciudad dividi di Hebron den West Bank, unda un comunidad chikito ultra-nacionalista hudiu ta biba den barionan fortifica memey di decenas di miles di Palestino. Ben-Gvir ta biba den un asentamento cercano.
E acuerdo tambe ta inclui un clausula primintiendo pa cambia e leynan anti-discriminacion di e pais pa permiti negoshinan nenga servicio na hende “pa motibo di creencia religioso.”
E legislacion a genera indignacion e siman aki na momento cu miembronan di partido di Ben-Gvir a bisa cu por usa e ley pa nenga di duna servicio na comunidad LGBTQ. Netanyahu a bisa cu e no ta bay laga e ley pasa, pero toch a laga e clausula den acuerdo di coalicion.
Entre otro cambionan ta poniendo Bezalel Smotrich, un lider di asentamento cu ta dirigi e partido Zionismo Religioso, den un cargo ministerial recien crea, encarga cu politica di asentamento na West Bank.
Netanyahu y su aliadonan tambe a acorda pa pusha cambionan cu intencion di reforma e sistema legal di e pais – specificamente un ley cu lo permiti parlamento reverti decisionnan di Corte Supremo cu un mayoria simpel di 61 legislador.
Criticonan ta bisa cu e ley ta bay socava “checks and balances” di gobierno y destrui un institucion democratico critico. Nan tambe ta bisa cu Netanyahu tin conflicto di interes den pusha pa e reforma legal pasobra actualmente e ta den huicio pa cargonan di corupcion.
