(AP) – Gobierno Hulandes a conseha mayornan riba diamars pa no laga nan yiunan di menos di 15 aña usa plataformanan di rednan social manera tikTok y Instagram, citando problemanan fisico y psicologico entre e muchanan cu ta haci uso di esaki, incluyendo atakenan di panico, depresion y dificultadnan pa drumi.
E ministerio di Salud tambe a encurasha mayornan pa limita con largo nan yiunan ta pasa usando dispositivonan electronico, mantene telefon y laptop pafo di e camber y tin 20 minuut di ‘screentime’ sigui pa dos ora pa hunga pafo.
E conseho aki “ta duna muchanan e tempo pa desaroya mas reciliencia digital y comprension pa media,” Vincent Karremans, minister diputado pa hubentud y deporte, a bisa den un carta manda pa parlamento. Karremans ta un di varios minister cu a keda despues cu e gobierno Hulandes a collapse anteriormente e luna aki, cu eleccion pendiente pa october.
Ambos TikTok y Instagram ta rekeri pa e usuarionan tin por lo menos 13 aña di edad.
E guianan, cual no tin peso legal, ta distingui entre websitenan di “rednan social” manera TikTok y Instagram y “plataformanan di interaccion social” manera e servicionan pa manda mensahe mane WhatsApp y Signal. E websitenan di rednan social tin “funcionnan di diseño hopi mas adictivo” cu tin un impacto negativo riba muchanan, segun e gobierno a bisa.
Muchanan por usa e servicionan di mensahe for di 13 aña di edad, e aña cu mayoria muchanan Hulandes ta cuminsa scol secundario, segun e recomendacionnan.
Aña pasa, Australia a bira e prome pais den mundo cu a prohibi cu muchanan di menos di 16 aña por haci uso di rednan social. Dinamarca y Francia ta considerando legislacion similar y Suecia a duna recomendacionnan tocante limita screentime pa muchanan aña pasa.
Un grupo di experto, crea bao peticion di e parlamento Hulandes, a haya cu ‘screentime’ intenso y uso i rednan social por resulta den problemanan fisico y psicologico den muchanan. Scolnan Hulandes a prohibi studiantenan for di usa tablet, celular y holoshinan yama ‘smart watch’ cu algun excepcion, manera lesnan tocante media.
Den mei, alrededor di 1,4000 dokter y experto di bienestar pa muchanan na Hulanda a firma un carta publico, haciendo yamado na gobierno pa prohibi muchanan di 14 aña for di tin telefon y restringi e uso di rednan social te cu edad di 16 aña.
Den februari, Reina Hulandes Maxima a bisa cu su yiu muhe mas chikito, Prinses Ariane, tin problema di bista pa motibo cu el a pasa hopi tempo riba su dispositivonan.
