(NLTimes) – Den añanan recien e carga di trabao di politico, for di alcaldente na minister, a aumenta, mescos cu e complehidad di e asuntonan cu nan ta atende cune y menasanan y intimidacion cu nan ta enfrenta. Pero nan salario a keda atras.
Hunta di Conseho riba e Status Huridico di Oficionan Politico (ARPA), pues, a urgi e gobierno nobo di Hulanda pa aumenta salario di politiconan significantemente cu entre 10% y 18% durante tres aña, AD ta informa.
Debi na poco aumento recien, salarionan di politiconan awor ta for di balansa compara cu esnan di ambtenaar. Por ehempel, e funcionario di mas halto di un ministerio, e Secretario-General, actualmente ta gana €1.000 bruto pa luna mas cu un minister. E salario mensual di Secretario-General ta €17.332 pa luna bruto, compara cu €16.220 pa e minister.
E grupo di conseho, dirigi pa Alexander Rinooy Kan (D66), ta trece dilanti cu e minister ta e persona finalmente responsabel pa asuntonan politico di un ministerio. Generalmente, esey mester nifica tambe e salario di mas halto den e ministerio.
ARPA ta sugeri un aumento di 18% pa consejal, alcalde y miembronan di conseho di municipio den e municipionan mas grandi, reparti den tres aña. Den municipionan mas chikito, miembronan di conseho mester haya un aumento di 10%. E grupo aki ya caba a ricibi compensacion adicional den e ultimo añanan pa e responsabilidadnan adicional cu municipionan a tuma riba nan mes.
E grupo di conseho tambe ta defende un aumento total di 15% pa ministernan y 12% pa Secretarionan di Estado.
Door cu asuntonan a bira mas compleho, politiconan mester cumpli cu expectativanan di ciudadanonan mas halto, ARPA a bisa den su rapport. E rol di un politico tambe a bira mas exigente riba un nivel personal. “Oficialnan politico ta mas visibel y ta informa mas intimidacion,” ARPA a skirbi.
E instancia tambe a conseha pa mehora otro condicionnan di empleo pa politiconan. Nan condicionnan di trabao “no ta cuadra bon cu practica mas.” Finalmente, un oficina politico ta un trabao pa e persona cu ta ocupa esaki, pero politiconan no ta disfruta di e mesun seguridad di trabao y beneficionan di empleo cu otro trahadornan. E organo a recomenda varios medida pa tene e trabao atractivo y ofrece mas proteccion contra retiro, manera un “derecho di regreso” pa politiconan na nan doñonan di trabao anterior.
ARPA a entrega e rapport na ministerio di Asuntonan Interno y Relacionnan den Reino. Probablemente lo ser atende solamente despues cu e gabinete nobo huramenta dia 23 di februari.
