Pa loke ta trata e situacion reinante den Colegio Arubano y tur e turbulencia cu a pasa cu directiva di SMOA/SVOA, Minister di Enseñansa, Rudy Lampe a declara na Bon Dia Aruba cu nan a yega di reuni cu tur e partnernan.
Pero nan lo sigui cu e ronda di reunion e siman aki. Nan a yega di tene un reunion cu rector nobo y Obispado. Pero tambe cu e organisacion di e mayornan di Colegio Arubano. Igualmente nan a yega di reuni prome cu e docentenan y tambe cu e directiva di SMOA/SVOA.
Awor cu un rector nobo a wordo nombra den e instituto di enseñansa aki, esaki lo por trece mas trankilidad riba preocupacion cu ta existi den e cuerpo di docente y studiantenan.
E mandatario a declara cu na Bon Dia Aruba cu si por yega nan un situacion di acuerdo cu por reestablece e trankilidad bek bao e docentenan, sigur nan lo comunica esaki di inmediato pa comunidad.
Encuanto intervencion di gobierno pa bin cu cambio den e directiva di e fundacion, mirando cu malcontento ta wordo concentra den e maneho cu nan ta hibando den Colegio, esaki no ta posibel. Minister Lampe a bisa cu den e directiva aki gobierno no tin niun representante. “Nos no tin niun voz den e directiva,” el a declara.
Esunnan cu ta representa den e directiva aki ta entre otro Obispado y organisacion di mayornan. Pero gobierno mes no tin ningun representacion den e directiva, mientras si gobierno naturalmente ta subsidia e fundacion shen porciento y te hasta e edificio ta propiedad di gobierno.
E ta kere cu den e sentido ey gobierno si mester tin algo di bisa, pasobra e ta esun cu ta pone e placa pa Colegio Arubano por draai. Ademas nan ta haci uzo di un edificio di gobierno, sinembargo gobierno no tin voz den e directiva.
