Recientemente e asunto di inversion di e compania nobo pa administra planta di purificacion (AWSS) a hala bastante atencion. E tema principal tabata pakico gobierno no a usa su propio fondonan disponible pa inverti poniendo nan na disposicion di e compania, envez cu e compania ta bay den exterior pa prestamo indudablemente mas caro. No ta trata aki di repiti e debate ey, mas bien ta trata e tema di con gobierno en general ta anda cu inversion, via e ehemplo aki. Aki tambe tin suficiente pregunta.

E pregunta principal ta keda pakico gobierno di Aruba regularmente no ta ni inverti loke tin programa den presupuesto, hasta den un situacion unda no tin problema di fondo. Algo critica na varios ocasion pa colegio di supervision financiero CAft. Pa bon comprension, e problema ta cu den ultimo añanan por nota un uso masha parcial mes di e fondonan aproba den presupuesto pa inversion. No ta trata aki di fondo extra disponible ora tin un parti di e surplus realiza cu ta segun acuerdo disponible pa inversion. E unico problema cu por surgi ta den cashflow, ora gasto total na cierto momento ta obliga scoge entre cual pago pa haci y cual pa retene. Esey mester ta un impedimento pa no inverti? Riba e posible pregunta aki CAft tin un contesta bon cla den nan conseho encuanto e promer presupuesto complementario di 2025: “Pa 2025 CAft ta constata un nivel di inversion di Afl. 70 miyon. Riba econtenido concreto di esakipor lo pronto no tin claridad.Si acaso e surplus di 2,4porciento resulta insuficiente como ‘buffer’, ta considera reduci e inversionnan.CAft ta enfatiza sin embargo cu controla gasto ta preferible envez di reduci inversion.”CAft ta bisa tambe den e conseho menciona cu ta pesey nan ta insisti den haya un programa multi-anual di inversion pa por tin vista riba inversion a largo plazo, pa garantiza efectividad y eficiencia di esakinan.E opcion corecto ta anto pa laga inversion, cu ta den presupuesto pasobra gobierno mes na promer lugar ta considera nan necesario, sigui core manera planifica. E no por ta un tipo di ‘sluitpost’ den presupuesto, cu cual ta cumpli ‘ora por’, djis pano corta otro gasto. Kico tabata anto e panorama financiero den ultimo añanan; tabatin fondo suficiente pa haci inversion programa y depues, den e siguiente aña, inversion extra a base di surplus? Te na 2022 no tabatin un surplus ainda, anto te ey tabata trata solamente di fondo presupuesta caba.Interesante ta cu durante 2022 a tuma e decision di saca Afl. 16 miyon for di presupuesto,cu tabata destina pa inverti den e plantanan di purificacion. CAft: “Ta indica cu WEB NV ta tuma e proyecto over. E saldo di ‘kapitaaldienst’ y cu esey tambe e saldo di financiamento di e pais ta mehora cu Afl. 16 miyon. CAft ta constata cu ta elimina un inversion cu anteriormente a keda indica como sumamente urgente y ta hinca e proyecto aki bao di un entidad gubernamental. No ta hustifica e cambio aki den e proyecto di ley di cambio di presupuesto aki. Banda di esey no tin claridad te unda e solucion aki ta trece riesgo cune pa presupuesto di e pais.” Seguidamente, na 2023 y 2024 ingreso extra ta resulta hopi mas grandi compara cu loke tabata anticipa den presupuesto. Na fin di 2023 caba e resultado tabata asina bon cu lo tabatin fondo disponible pa inversion, aunke a pasa e ‘problema’ di planta di purificacion caba pa e entidad nobo. Tabata previsible tambe cu e resultado financiero gubernamental pa 2024 lo tabata mihor ainda, cu a resulta den un surplus di Pais Aruba di Afl. 294,7 miyon den e ‘exploitatierekening’, cu tabata 4,1% di GDP (Afl. 7076 miyon), sin papia di e sector colectivo cu tabata añadi e potencial contribucion grandi di AZV y SVB, hasta manteniendo nan reservanan na un nivel aceptable.Si kita 1% inicial cu mester bay pa paga debe, mitar di e restante 3,1% lo tabata disponible pa inversion, cual ta 1,55% di Afl. 7076 miyon: Afl. 109 miyon. Na 2023 e suma disponible pa inversion tabata Afl. 57 miyon (di e Afl. 183 miyon disponible di e saldo primario di Pais Aruba). Asina lo tabatin na fin di 2024 caba un panorama faborable pa inversiondi tal manera cu lo tabatin fondo disponible pa e proyecto di AWSS, unda por a yega na un areglo pa pospone o para e negociacion pa haya prestamo, pasobra gobierno mes por a pasa e capital necesario pa e compania, na un interes faborable pa ambos, y ademas pa e consumidor cu lo mester paga e servicionan cu e compania mester bay organiza, y den pura. Ningun momento, segun nos opinion, tabatin un situacion unda no por a cambia rumbo di e prestamonan, si na 2022 a cumpli cu e inversion inicial menciona anteriormente, yden curso di 2023 y 2024 a mira resultado di e medidanan fiscal tuma, principalmente di BBO, aumenta pa 7% y BBO na frontera.

Kico por conclui di tur esaki awor? Cu, independiente di e investigacion cu e actual gabinete ta desea di haci den e asunto aki, por bisa cu e gabinete anterior a carece di sano huicio, na momento cu e proyecto di mas urgencia, esaki segun nos y nan opinion, a keda elimina di e programa di inversion cu gobierno tabatin pa 2022. Manera declara pa e anterior ministro presidente, e tempo ey no tabatin fondo extra, pero a dicidi cu e proyecto no tabata prioridad pa gobierno. Esey ta keda un hecho.