Tocante e deliberacionnan andando entre CITGO y su trahadonan, Gobierno di Aruba ta informa cu esaki ta algo netamente entre CITGO y su trahadonan. CITGO a cera contractnan laboral cu cada empleado separadamente.
Segun un comunicado di gobierno, ta trata di contractnan individual den cual Gobierno di Aruba no ta participe. E contractnan aki ta cera entre dos partido priva a base di leynan vigente na Aruba. Na momento di disputa, por acerca Mediador di Gobierno como instancia oficial di Gobierno.
Asina mes, teniendo cuenta cu e trahadonan, Gobierno a haci un esfuerso adicional ora di negocia e Memorandum of Understanding y a exigi di CITGO cu CITGO mester cumpli cu nos leynan y cu su trahadonan. Fuera di exigi pa CITGO cumpli cu su trahadonan, Gobierno a exigi pa CITGO cumpli cu tur e contratistanan y e vendornan cu a duna servicio na CITGO. E contratista y vendornan ainda ta en espera di nan pago. E espacio cu Gobierno tin pa por haci mas ta limita pa ley, segun e comunicado.
Gobierno a tuma nota di e preocupacion y peticion di algun sindicato cu kier pa Gobierno tuma e trahadonan di CITGO over. Gobierno bao di e circunstancia actual, e presion di Conseho di Ministro di Reino via CAFT, no tin e posibilidad pa tuma ningun trahado over. Ademas CITGO no a cumpli cu su obligacionnan di paga impuesto a base di contract. Otro sindicato kier pa RdA tuma e trahadonan over. RdA tampoco por haci esey, pasobra RdA no tin entrada pa loke ta concerni e refineria ya cu aki tampoco CITGO a cumpli cu su obligacion contractual.
Gobierno di Aruba ta buscando un otro operador pa tanto e terminal como e refineria, pero no ta asina leu ainda. Ta e operador nobo lo dicidi en cuanto di trahadonan cu e lo tuma den servicio. Den esaki, Gobierno tampoco tin un bos.
A pesar di esaki, Gobierno lo haci tur loke ta den su alcance pa e operador nobo duna empleo na mas tanto trahado posibel, e comunicado ta finalisa bisando.
