Ayera mainta Minister di Finanzas, Asunto Economico y Sector Primario, mr. Geoffrey Wever (Futuro) a firma e decreto ministerial despues di haya aprobacion di Conseho di Minister. E decreto ministerial ta basa riba e desaroyo reciente den prijs internacional di combustibel, a tuma medida concreto pa mitiga e impacto di e aumento riba comunidad y sector comercial.

Segun e sistematica di prijs, gasolin lo registra un aumento di aproximadamente 49.3 cen pa e luna aki, mientras diesel lo subi cu 83.5 cen. Gobierno ta reconoce cu e aumento aki ta significativo y cu e tin un impacto directo riba e poder di compra di ciudadano, e stabilidad financiero di nos hogarnan, y riba e operacion di empresanan, specialmente esnan cu ta depende di diesel pa transporte y logistica.

Den un programa di noticia, minister Wever a comparti cu den e marco aki, Conseho di Minister a aproba pa Gobierno absorbe mitar di e aumento di gasolin y mas o menos mitar di e aumento di diesel. E decision aki ta dirigi riba proteccion di poder di compra y sostenibilidad economico, pa limita e presion riba prijs di producto y servicio den nos economia, pues pa mitiga e aumento di “the cost of doing business”, segun un comunicado di gobierno.

Cu e intervencion di Gobierno, e aumento real pa consumidor lo keda reduci significativamente, segun e comunicado. Sin medida, gasolin lo subi cu alrededor di 49.1 cen, mientras cu cu intervencion e aumento ta limita na aproximadamente 24.57 cen. Pa diesel, e aumento lo ser reduci di 83.5 cen pa alrededor di 45.20 cen.

Minister Wever, den colaboracion cu institucionnan relevante manera Banco Central di Aruba, CBS y RDA, ta sigui monitorea e desaroyo economico y internacional di cerca. Analisis indica cu e aumento actual tin un caracter temporal, y Gobierno lo sigui evalua e situacion pa determina paso adicional si necesario.

Segun Minister Wever e costo di e medida pa Gobierno ta calcula na aproximadamente 2.5 miyon florin pa luna, cu 1.5 miyon asigna pa gasolin y 1 miyon pa diesel. Den e contexto aki, tambe a tuma decision pa re-prioritisa gasto publico y crea un buffer pa adresa e crisis internacional. Mientras cu cierto proyectonan lo sigui, otro proyectonan lo ser posponi pa 2027 pa crea e espacio financiero necesario pa sostene e medida nan actual.

Gobierno ta enfatisa cu e aumento di prijs di combustibel no ta resultado di factor local, sino di desaroyo internacional fuera di control directo di nos economia. Precisamente pa e motibo aki, Gobierno ta considera su participacion como esencial pa proteha ciudadano y economia.

“Desde e promer dia, mehoracion di poder di compra di ciudadano ta un di e prioridadnan principal di Gobierno. E medida aki ta confirma e compromiso continuo pa sostene comunidad y sigura stabilidad economico den un periodo di incertidumbre global” Minister Wever a subraya.

Segun e comunicado, awe Gobierno lo amplia riba e topico aki y informa comunidad durante un conferencia di prensa oficial, unda lo presenta e ahuste presupuestario y e strategia pa e bienestar di Pais Aruba.

Prijs nobo di benta di combustibel entrante 8 di april 2026

Gasolin unleaded-premium : 248,0 cen p/ltr. (+ 24,6 cen);

Diesel ULS : 246,5 cen p/ltr. (+ 45,1 cen);

Kerosin : 294,0 cen p/ltr. (+ 101,7 cen);

E prijsnan ta inclui BBO/BAZV/BAVP.