Weekend ultimo, gobierno a anuncia e compra y instalacion di dos incinerator nobo na Parkietenbos, destina pa procesa desperdicio medico. Mientras cu gobierno a presenta e noticia como uno positivo pa maneho di desperdicio y pa medio ambiente, ambientalistanan y residentenan di area cerca di Parkietenbos a expresa preocupacion.

Diahuebs mainta, Minister di Husticia y Energia mr. drs. Arthur Dowers (AVP) a asisti na un evento di “groundbreaking” na e planta di maneho di desperdicio di Serlimar na Parkietenbos. Esaki den cuadro di e proyecto nobo di incinerator, cu segun un comunicado di gobierno, tin cu trece alivio specialmente pa e maneho di desperdicio medico cu no por djis bay riba e sero di desperdicio residencial/industrial cu tin na e dump, conoci como e “landfill”.

E proyecto aki ta uno importante pa tanto e maneho di desperdicio, pero tambe pa mehora e situacion laboral pa e empleadonan. E comunicado a splica cu pa hopi tempo, e espacio den cual tabata acumula desperdicio medico tabata casi yega e dak, cual tabata crea un situacion alarmante pa no solamente esnan trahando eyden, sino pa e area di Simeon Antonio y bisindario. Cu e instalacion di dos incinerator nobo, por reduci e cantidad di desperdicio biologico/medico di manera eficiente y sin cu esaki tin impacto grandi riba medio ambiente.

Gobierno a informa cu ademas di e dos incinerator nobo cu a instala, pronto lo haya dos incinerator mobil nobo parti pafo cu lo yuda acelera e proceso y maneho di desperdicio medico.

Mirando e situacion den cual e empleadonan tin cu traha, gerencia a crea un facilidad pa mehora e bienestar di e empleadonan. Actualmente cada empleado di dump ta pasa henter dia trahando den un ambiente no higienico den nan coverall y ta bay cas cu e mesun paña bisti. Esaki obviamente no ta higienico, mirando cu nan ta sinta den nan auto personal y bay cas den e mesun coverall bisti, loke por trece contaminacion di trabao den nan auto y hogar. E facilidad nobo ta un espacio den cual nan por cambia paña y hasta laba esakinan pa por tin esaki limpi pa e siguiente dia di trabao, segun e comunicado. Tambe a instala sistemanan specialmente pa laba man y desinfecta esaki, separa for di unda nan ta maneha cuminda.

Segun Minister Dowers, e retonan tabata basta grandi na momento cu a tuma e cartera over; el a gradici tur stakeholders, pero specialmente Serlimar, cu a sa di carga pasenshi y a pasa den momentonan dificil na caminda pa yega awe na e facilidad nobo aki. Esaki ta un logro grandi pa maneho di desperdicio medico y un paso firme den maneho eficiente y efectivo di desperdicio aki na Aruba, segun e minister.

Gobierno ta consciente cu e planta aki no ta algo facil pa atende cune, mirando cu tin cu tene contacto continuo cu esnan cu ta biba den e bario.

Na final di e discursonan, director di Utilities Joseph Everon, a sorprende Sra. Zoey Cornijn di Luna Foundation cu un donacion di tres mil florin, pa e trabao incansabel cu e fundacion aki ta haci pa cu cachonan riba caya, cual problema ta conoci riba e dump di Parkietenbos tambe. Riba rednan social, Luna Foundation a comenta cu “nos a ser invita como partner, trahando hunto pa un meta comparti: cambia bida pa e animalnan bibando na y rond di e dump. E colaboracion aki ta nifica mehoracionnan real, practico pa e cachonan cu mas tin mester di nos.” E post a splica cu e donacion ta pa sostene e trabao na nan santuario, y cu ademas di esey, AWSS “tambe ta bay ta yudando nos den remodela nos haula di pallet, creando espacionan mas safe y confortable pa nos animalnan mientras nan ta warda pa nan ‘second chance.’”

Cuestionamento tocante permiso

Un punto cu a keda cuestiona ampliamente, tanto pa comunidad como medionan di comunicacion, ta e hecho cu no a informa explicitamente si tin e permisonan necesario pa por opera un incinerator na Parkietenbos. Esaki pasobra e permiso cu AWSS (Aruba Waste Water Solution) a obtene algun aña atras pa por opera incinerator, tabata provisional y temporal. Y den e comunicacion oficial di AWSS y di gobierno, no a indica explicitamente cu a obtene e permiso necesario pa opera un incinerator.

Esaki despues di un saga di varios aña den cual habitantenan di e area di Parkietenbos ta bringa pa evita incineracion di desperdicio na Parkietenbos.

Tabata na december 2020 cu minister di Husticia y Asunto Social e tempo aya a duna DOW un permiso di molester (hindervergunning) pa construccion y operacion di un planta di incineracion na Parkietenbos. Tabata usa e permiso pa kima diferente tipo di desperdicio, manera desperdicio medico, cadaver di animal y lodo di planta di tratamento di awa di riool. Prome cu e permiso pa incinerator, tabata kima e desperdicio aki riba tereno di dump na Parkietenbos of den container sin usa un planta di incineracion.

Un grupo di ciudadano bibando den e area di Parkietenbos a expresa cu nan ta experimenta molester serio di e planta di incineracion, y ta teme cu e contaminacion ta pone nan salud den peliger. Na 2023, e grupo di ciudadano a entama un caso contra e decision aki, y na december di e aña ey, corte a revoca e permiso di molester y a determina cu e minister mester a tuma un decision nobo tocante e peticion di DOW. E minister a apela e decision, y a pidi presidente di corte pa duna un alivio interino, pa preveni un situacion di emergencia debi na acumulacion di desperdicio.

Den un sentencia di 8 di mei 2024, e Presidente di Corte a otorga e peticion pa alivio interino, loke ta nifica cu por a usa e planta di incineracion durante e proceso principal di apelacion – suheto na condicion y obligacion stipula den e sentencia. Esakinan ta inclui cumpli cu regulacion stipula den e manual di operacion di e fabricante di incinerator, como tambe e regulacion y provisionnan asocia cu e permiso di molester.

E aña ey a indica cu a lanta AWSS y cu e compania aki lo ta encarga cu operacion di e planta di incineracion. Esaki ta nifica cu e minister awo lo mester duna un permiso di molester nobo na e compania aki pa opera e incinerator. Sinembargo, no tin claridad si e compania ta dispone di esaki. E situacion a crea malcontento y preocupacion cu algun residente di e area a expresa riba rednan social.

Reaccion positivo

Sinembargo, for di ambito politico, parlamentarionan tanto di coalicion como di oposicion a expresa sosten pa e desaroyo na Parkietenbos.

Den un post comparti riba rednan social, parlamentarionan di Futuro, Gino Goeloe y Muzaninn Wever a indica cu “a logra combersa cu diferente ehecutivo cu por a duna nos bon noticia di e direccion y maneho cu nan lo hiba.” Y mientras nan “lo keda monitoria,” e parlamentarionan a indica cu “ta mustra cu progreso ta ‘in motion’ cu innovacion y pa sostene e conocemento y cuido di trahadonan y seguridad sostenibel.”

Parlamentario di MEP, Xiomara Maduro, a referi na e planta di AWSS na Parkietenbos como “un proyecto cu ta necesario pa Pais Aruba,” mientras su colega di MEP, Edgard Vrolijk a expresa orguyo den AWSS. “Nos a kere den e vision di Gabinete Evelyn Wever-Croes 2 di lanta un NV pa atende cu problema di awa sushi y den futuro pa e problema di sushi cu por soluciona esaki structuralmente. Nos a topa hopi obstaculo pa por a pasa e ley y tambe despues den preparacion pa organisa AWSS, pero awe ta wak cu e vision tabata uno real y awe tur cu a bay contra ta toca nan pa haci apertura.” Di su banda, lider di MEP, Evelyn Wever-Croes a bisa di “ta contento cu ta sigui cu nos vision, a pesar di un tardansa. Contento tambe di mira esnan den gobierno cu a vota CONTRA e proyectonan aki, awe continua cune.”

Sinembargo, ningun parlamentario a menciona e controversia tocante e falta di permiso, ni a cuestiona e minister publicamente tocante esaki.

Por spera cu den proximo simannan lo tin mas informacion riba e legalidad di e operacion di incinerator.