Gobierno ta carga peso di mas di 8.000 salario

Recientemente ministro encarga cu finanzas y recurso humano a emiti un comunicado di prensa tocante gastonan di personal, cu tabata inclui un resumen elabora pa expertonan di Fondo Monetario Internacional (IMF). Riba su mes caba e cifranan tabata revelador, pero tin mas di conta den e sentido aki.

Pa prome biaha den varios aña nos por a mira un resumen asina completo manera den e informe di IMF. Esaki ta bon pa tur esnan envolvi y interesa, ya cu por argumenta mas a base di dato concreto y no solamente segun suposicion.

E mandatario mes a mustra riba e total di 7.195 cupo di trabao cu gobierno ta pagando actualmente. Esey caba ta un cifra alarmante, pero en realidad no tabata conta henter e storia. Riba e mesun tabel por a observa tambe un otro cifra cu ta conta mas di e responsabilidadnan grandi cu gobierno tin pa cu pago di salario tur luna. Un bista riba loke IMF a presenta:

Pago di salario subsidio di salario 2018

Fuente: Informe IMF pa gobierno di Aruba, nov 2019

Clarificacion:

1): ta encera e cuerponan di Husticia: KPA, CEA, Brandweer, Kustwacht, Arumil, GNC y IASA

2): Ta inclui persona riba VUT, empleado uitzendbureau, y otro personal contrata

3): Ta inclui parlamento, Raad van Advies, DOW, etc.: pago pa cuenta di gobierno

4): Entidad autonomo, manera AZV, SVb: tin propio financiamento

5): Entidad cu ta haya subsidio di salario, manera fundacion

Cantidad di cupo di trabao

For di e resumen di IMF nos por conclui cu e cantidad di salario cu gobierno ta paga, sea directo o indirectamente, ta ainda mas cu e cantidad di 7.195 cu ministro encarga cu Finanzas a menciona. E cantidad di e ministro ta referi na loke gobierno ta paga directamente di empleado publico, enseñansa publico, enseansa subsidia y e categoria ‘Otro’ cual ta abarca empleado publico riba VUT, persona emplea via uitzendbureau y otro contratadonan. Mas detaye tocante con hunto nan ta conforma 624 persona no ta conoci.

Loke no a bin dilanti ta e sector di organisacion subsidia, pa mayor parti fundacion, cu segun IMF na fin di 2018 tabata representa 858 cupo di trabao. Esakinan no ta salario cu gobierno ta paga directamente, pero si ta parti di e peso structural cu gobierno ta carga. Aunke esey tambe ta relativo, pasobra tin momento cu e grupo aki a ser usa pa baha gasto di gobierno, sin cu esaki a causa critica o turbulencia mayor. E momento tabata na 2017, tempo cu gobierno a corta drasticamente den su aportacion na e sector aki. Den e tabel aki bao nos por mira un resumen di e gastonan den sector subsidia cu ta refleha esaki.

Fuente: Banco Central di Aruba (Annual Statistical Digest 2018)

E conclusion ta cu e gastonan di gobierno no ta abarca solamente e Afl. 479 miyon, cu ta e limite cu a acorda cu gobierno di Hulanda, sino hopi mas. E cifra menciona ta cubri e gastonan di salario di personal di e ministerionan, e scolnan publico, y e 624 persona cu den e tabel aki ta cay bao di e categoria ‘Otro’. E cifra di Afl. 605 miyon menciona ariba den e tabel ta e Afl. 479 miyon plus gasto di enseñansa subsidia (Afl. 105 miyon), plus e categoria ‘Otro’.

Sin embargo, no ta contando den esaki e gastonan cu gobierno tin cu e sector subsidia cu no ta enseñansa. No ta dificil pa argumenta con importante esaki ta, y cu no ta gasto cu gobierno por keda sin haci sin mas. Loke si mester tin ta supervision estricto riba strategia, planificacion, gasto haci y responsabilisacion adecua. Loke no mester ripiti ta e suceso di 2017 unda e sector subsidia a paga e cuenta pa por a cera buki e aña ey. Si considera e cuponan aki indispensable, ta trata anto di costo cu pa gobierno ta dificil pa evadi. Ta trata segun IMF di 858 cupo di trabao, cu ta haci e total cu gobierno ta carga: 8.053. Nos ta yega na un total di gasto di Afl. 677 miyon, casi 50% di presupuesto total di Pais Aruba pa 2018.

Ta bira obvio tambe cu e discusion di e gastonan di personal cu CAft y gobierno Hulandes cu ta limita na e Afl. 479 miyon cu gobierno ta paga na e empleadonan di e ministerionan, no por keda asina. Ta trata aki di practicamente mita di presupuesto anual cu ta medida fuerte y cuidadoso pa no afecta funcionnan vital den gobernacion, cu pa un parti substancial ta kedando fuera di alcance di e intentonan pa maneha gasto di personal. Tambe por observa den e tabel di IMF e promedio di salario halto pa e cuerponan di seguridad, cu ta como Afl. 10.000 pa persona, pa aña, mas halto cu e promedio di e demas empleadonan publico. Esaki ta principalmente producto di e overtime cu pa gran parti ta un problema den e cuerponan aki; otro asunto cu gobierno mester enfrenta.