Gobierno di coalicion den un carta fecha 24 di maart 2020 ta pidi permiso di Conseho di Ministro di Reino pa desvia di e normanan estableci pa presupuesto 2020, alegando condicion extraordinario den e actual situacion di crisis di salubridad publico y economico, cu a haci gobierno recuri na un presupuesto di emergencia cu no ta cumpli mas cu e normanan stipula.

Gobierno di Aruba ta splica den e carta cu e daño financiero cu mester cubri ta entre Afl. 1,2 y Afl. 1,35 biyon. Esaki ta basa, segun gobierno, riba e scenario cu lo tin un prohibicion di biahe pa resto di aña pa tanto turismo crucero como pa transporte aereo. Segun gobierno, mirando e desaroyonan na Merca, e partner principal den nos economia, un scenario asina ta bon imaginable. Esaki ta hustifica e aplicacion di articulo 23 di e ley di supervision financiero (Laft) cu ta contempla e condicionnan extraordinario den cual Aruba ta pasando.

Tambe ta referi na articulo 36 di Statuut cu ta stipula e ayudo mutuo cu e paisnan den Reino mester brinda otro. Alavez ta suplica pa trata e asunto aki den e reunion di Conseho di Ministro di Reino di awe, 27 di maart.

Pa por enfrenta e deficitnan a causa di e emergencia menciona, ta pidi un apoyo pa presupuesto den forma di un donacion di 250 euro; un prestamo di 250 miyon euro cu un periodo di pago di 30 aña y un periodo liber di pago di 3 aña. Tambe un aporte den costo di e areglo di emergencia FASE y un aporte den medida pa apoya empresa mediano y chikito di 150 miyon euro. En total un suma di 400 miyon euro na donacion pa apoya recuperacion di economia, mas e prestamo di 250 miyon euro. Ademas tambe un suma ainda no stipula den cuadro di reconstruccion di economia den un fondo di reconstruccion cu mester lanta ainda.

Finalmente ta pidi permiso tambe na Conseho di ministro di Reino pa subi mercado internacional pa fia placa pa renoba e debenan cu ta caduca e aña aki, cu ta un suma di Afl. 361 miyon.

 

LEAVE A REPLY

Please enter your comment!
Please enter your name here