ORANJESTAD – Gobierno ta preparando pa introduci fase 2 di reforma fiscal. Awo gobierno ta evaluando e prome Fase di Reforma Fiscal cu a drenta na vigor cuminsamento di e aña aki. Fase 1 ta mas riba e tereno personal manera loonbelasting, inkomstenbelasting y grondbelasting; tambe ta trata e belastingnan cu ta causa comportacion negativo, manera alcohol y sigaria, esakinan ta wordo yama “sin” taxes.

“Gobierno ta bay paso pa paso cu e sistema nobo aki. E Reforma Fiscal ta parti den 4 fase. Si cada fase tuma 6 luna pa wordo desaroya y implementa, den dos aña e ora Aruba por tin un sistema di Impuesto mas husto y senciyo. E prome paso ya a drenta na vigor y ta trece alivio pa Aruba.

Gobierno ta sigui cu e reunionnan pa prepara y pa introduci Fase 2 di Reforma Fiscal. Fase 2 ta e Impuesto Indirecto, cu ta e BBO. Diferente posibilidad ta wordo studia pa cu e direccion cu kier bay cu BBO entre otro e BTW (manera IMF ta pronone) of Omzetbelasting (manera Corsou ta propone). Tambe e demas reforma den inkomstenbelasting lo wordo introduci. Awo ta papia solamente di tarifa, pero tambe lo reforma y haci e formulario di inkomstenbelasing mas senciyo. Prome minister ta duna di conoce cu esaki no ta un decision cu gobierno por a tuma e aña aki pero si den e siguiente lunanan nos dilanti. E Reforma Fiscal ta un proyecto cu lo trece alivio pa nos pueblo pasobra e ta trece un sistema di belasting mas husto.

Fase 3 ta e Impuesto pa comerciantenan. Lo studia posibilidad di cambio riba e Impuestonan cu comerciantenan mester paga esta Winstbelasting y Dividend Belasting. Pa trece un balans bek den nos sistema di Impuesto, esaki mester afecta tur hende. Comerciantenan tambe ta indica cu awo aki tin un sistema di Impuesto hopi complica y cu ta costa hopi.

Fase 4 ta e impuestonan cu ta trata di turismo. Nos bishitantenan di afo ta paga varios impuesto, Roomtax, Car rental tax, Time Share, All inclusive Tax, Casino Drop Tax. Gobierno riba e tema aki ainda no a sinta cu AHATA pero tambe ta riba agenda pa pronto sinta cu tur esunnan concerni riba e tema aki.