Gobierno di Aruba un biaha mas lo permiti ambtenaarnan retira trempan boluntariamente, segun medionan local a reporta.
E plan lo core for di dia 15 di april te cu 15 di juni di e aña aki, cu e intencion di reduci gasto di personal den gobierno.
Esaki ta loke por a compronde den un decreto nacional adopta den comienso di april, y despues publica den e Gaceta Oficial di Aruba. Ambtenaarnan por entrega un peticion dentro di e periodo aki pa haci uso di e plan, bao di cual nan tin derecho di provision special pero suheta na cierto condicionnan.
Gasto di personal ta constitui un parti grandi di presupuesto. For di varios aña atras den Bon Dia Aruba a publica cu den un rapport di IMF a topa cu algun proyeccion encuanto e desaroyo di entrada y gasto di gobierno di Aruba den e proximo añanan, te na 2026. For di e cifranan aki por a saca algun conclusion interesante manera cu a base di e crecemento grandi cu gobierno di Aruba tabata anticipa pa aña 2022 y 2023, gastonan di personal a cuminsa subi y na 2022 ta yega caba na e nivel ‘pre-Covid’, pa despues sigui crece pa na 2026 yega na 150 miyon florin pa aña mas na gasto di personal di gobierno.
Tipicamente ta usa e plannan aki ora cu e gastonan den salario ta considera demasiado halto of uno cu no ta sostenible, pero tambe ora cu tin presion for di institucionnan manera IMF por ehemplo, di reduci gastonan den gobierno. Pa e motibo aki, intervencion den servicio civil ta usa cada biaha mas como un instrumento pa crea mas libertad financiero.
Esaki no ta algo cu ta obliga of forsa ambtenaarnan haci, sino un acuerdo boluntario. Na mesun tempo, e fluho di personal cu sali lo tin su consecuencianan riba e capacidad di gobierno y servicio brinda na pueblo, dependiendo riba cuanto di e ambtenaarnan haci uso di e opcion.
Un tempo atras caba a implementa e plan boluntario aki, y awo lo bolbe provee esaki como parti di gobierno su politica financiero.
