Dia 8 di augustus Gobierno di Aruba a entrega e uitvoeringsrapportage di segundo kwartaal pa aña 2025 na Conseho di Supervision Financiero (CAft). Segun gobierno ta indica CAft a duna un conseho positivo (ainda no a ser publica) riba e di dos uitvoeringrapportage. Den e rapportage aki gobierno ta indica cu a logra mantene un balans financiero stabiel y aunke tin algun desviacion, e panorama general ta rasonablemente optimista

Pa loke ta trata e ingresonan, den e uitvoeringsrapportage gobierno ta señala cu tin un aumento notabel den belastingnan. Den total, e ingresonan pa e periodo di januari te juni 2025 a yega na Afl. 1.012,1 miyon, cu ta 14% mas halto cu den mesun periodo di 2024. Esey ta representa 56% di e presupuesto anual planifica (Afl. 1.816,6 miyon) – un indicacion cu e pais ta den bon caminda pa logra e meta anual.

Segun e rapport aporte mas grandi a bin for di impuesto directo, cu a subi pa 43% compara cu 2024, pa yega na un total Afl. 417,1 miyon. E aumento mas notabel a ser registra den winstbelasting, cu den mei y juni a duna un gran salto, pasando for di Afl. 52,5 miyon den 2024 na Afl. 200,3 miyon den 2025. E cifra aki ta refleha tanto e bon prestacion economico di empresanan local como e ahuste den plaso di pago cu a keda implementa.

Di otro banda loonbelasting a mustra un caida di 21% den comparacion cu 2024, loke ta consistente cu e reduccion di tarifa IB/LB cu a ser implementa den 2024 y 2025. Segun e rapport, e perdida pa 2025 ta keda rond di Afl. 49,2 miyon.

Impuesto indirecto tambe a keda na un nivel fuerte cu un total di Afl. 439,6 miyon, un crecemento di 9% compara cu 2024. Den esaki, BBO/BAVP a logra Afl. 161,2 miyon – 54% di e presupuesto pa henter e aña. Aunke den 2023 a bin introduci BBO na frontera, cu parti di e coleccion ta pasa via Aduana, e total ta sigui subi constantemente.

Toeristenheffing a genera Afl. 53,2 miyon, un 11% mas halto cu 2024. Segun e documento, mas cu mita di entrada di henter e aña di toeristenheffing ta ser cobra den prome seis luna, cu peaknan adicional spera den augustus y december. E entrada di turista ta keda un fuente vital pa finanzas publico.

Pa loke ta trata gastonan di gobierno, e rapport ta indica cu Aruba a tabatin un gasto di Afl. 780,1 miyon den prome dos kwartaal, cu ta 46% di e presupuesto anual (Afl. 1.683 miyon). E cifra aki ta indica cu e ritmo di gasto ta den regla, ainda cu hopi presion den cierto areanan.

E gasto mas grandi ta keda e gasto di personal, cu den total a subi na Afl. 257,7 miyon (51% di presupuesto). E aumento principal ta relaciona cu indexering di salario cu a drenta na vigor na juli 2024 y januari 2025. E total di FTE’s a baha cu 90 den e di dos kwartaal di 2025, mayormente pa motibo di pensioen, VUT y salida boluntario.

Den subsidionan, un total di Afl. 127,4 miyon a ser paga (50% di presupuesto). Gran parti ta bay na costonan di educacion: Afl. 70,5 miyon pa salario di personal di scol i Afl. 13,5 miyon pa compensacion educacional pa operacion.

Segun e uitvoeringsrapportage di gobierno, interes a sali na Afl. 122,2 miyon, cu ta un tiki mas abou cu 2024. Pago di obligacionnan den moneda local a cubri mas cu mitar di e presupuesto, mientras cu e parti den divisa stranhero ta keda rond 34%.

Pa loke ta e transferencia y depresiacion, transferencia a subi fuerte na Afl. 104,7 miyon (46% di presupuesto), mientras cu depresiacion a keda relativamente abou den nivel di 38%.

Na nivel di servicio di capital, e rapport ta señala cu Aruba a inverti apenas Afl. 9,0 miyon di un presupuesto anual di Afl. 71,0 miyon – solamente 13%. E motibo principal ta e aprobacion laat di presupuesto 2025 (na maart) y e complicacion den ehecucion di cierto proyectonan.

E inversion mas importante realisa te awor ta e tres crashtenders pa aeropuerto (Afl. 8,5 miyon), cu ya ta entrega. Otronan lo sigui mas den aña, pero progreso ta dependiente di capacidad di ehecucion.

Na banda di servicio di capital, Afl. 3,4 miyon a ser presta na 422 studiante, un aumento di mita miyon riba 2024.

Pa loke ta financiamento y debe, e rapport ta splica cu Aruba tin plan pa paga Afl. 534 miyon den debe den 2025 (Afl. 206 miyon den debe local y Afl. 328 miyon den debe internacional). Segun e rapport, e pais lo usa su mesun saldo positivo pa keda paga rond Afl. 78,3 miyon.

Na fin di juni 2025, e saldo total di debe ta Afl. 5.182,4 miyon, cu ta 71% di GDP. Aunke un tiki mas halto cu prome kwartaal, e ratio ta keda bou di e norma estableci den e acuerdo cu Hulanda.

Segun e liquiditeitsoverzicht den e rapport, e saldo di cash a keda fuerte den e di dos kwartaal, subiendo te na Afl. 468,9 miyon na juni 2025. Esaki ta danki na ingresonan di belasting cu a supera expectativa y un ritmo di gasto cu no a baha control. Aunke tin luna cu salida mas halto, e tendencia ta mustra cu Aruba tin espacio pa cubri su obligacionnan sin presion inmediato.

Pa loke ta e sector colectivo, e rapport ta inclui un vision mas amplio di e sector colectivo. Den total, e entidadnan publico (Land, AZV, SVB, ATA, Serlimar, SEPB, Universidad di Aruba) a genera un resultado di Afl. 358,9 miyon den prome mitar di aña.

Den SVB tur fondo (AOV, AWW, Ziektefonds, Ongevallenfonds, Cessantia) a mustra un surplus, cu AOV solamente ta genere Afl. 44,5 miyon den positivo. Den ATA e ingresonan di toeristenbelasting a supera proyeccion cu Afl. 6,1 miyon, mientras cu gastonan di marketing a keda 37% bou di presupuesto pa motibo di retraso den campañanan. AZV a mantene su posicion financiero conforme plan multianual.

Un punto esencial ta e personeelslastennorm (norma di gasto di personal). Te juni 2025, e gasto den ‘public wage bill’ ta 4.6% di GDP. Proyecta pa tur aña, e cifra ta bay na 9,1%, cu ta bou di e limite di 10% estableci den Landsverordening Aruba tijdelijk financieel toezicht (LAft).

Segun e rapport gobierno ta planifica instala un comision special pa busca mecanismonan cu por garantisa cu e norma ta keda respeta tambe den futuro.

Na nivel di Publiek-Private Samenwerkingen (PPP), total di gasto te juni 2025 a keda rond di 50% di presupuesto (Afl. 48,6 miyon). Proyectonan manera Green Corridor y Watty Vos Boulevard ta sigui su ritmo normal.

Ademas, den area di maneho financiero, a sigui implementacion di e “three lines model” pa control interno, preparacion di un verslaggevingsstelsel nobo, y regla nobo pa gerencia. Aunke atrasonan den entrega di cuentanan anual ta keda, gobierno ta den e proceso di move aden pa logra mas transparencia.

Den e prome parti di e uitvoeringsrapportage di dos kwartaal di 2025 gobierno ta duna un mensahe cu Aruba ta den un trayecto di stabilidad financiero. Ingresonan di belasting ta sigui crece, gastonan ta keda den regla, y e saldo positivo ta mustra cu e pais tin capacidad pa sigui paga su obligacionnan.

Aunke tin algun area cu no ta caminda mester, manera e atraso den inversionnan y algun ingreso no realisa – gobierno ta pinta un panorama general cu nan ta den control di su situacion. Pa futuro, gobierno lo pone atencion riba cumplimento cu normanan financiero, sigui controla e gasto di personal, y sigura cu e capacidad di ehecucion no ta keda un obstaculo pa inversion cu ta necesario pa desaroyo di pais