Despues cu Otmar Oduber a sali como minister di Turismo y Cultura for di e gabinete anterior, e proyecto grandi di Culture and Heritage City San Nicolas a stanca. E siman aki e gobierno nobo a reuni pa asina continua cu e proyecto.
Nicolaas Store, San NicolasE reunion a tuma luga entre Otmar Oduber como minister di Infrastructura y Medio Ambiente (POR), minister di Turismo Dangui Oduber (MEP) y oficina di turismo ATA, asina nan ta informa den un relato.
“E reunion tabata sumamente fructifero y hopi positivo, colega Oduber di Turismo y mi persona riba invitacion di ATA a realisa e reunion aki a base di proyectonan cu kier pa continua na San Nicolas. Den pasado mi tabatin e honor di por a carga e cartera di Turismo, pa cual mi a combersa cu colega minister actual riba e importancia di e desaroyonan aki. Minister Dangui Oduber desde inicio a mustra interes y ta mira e necesidad pa sigui pusha pa San Nicolas”, asina minister Otmar Oduber ta bisa.
A hiba combersacionnan cu a wordo laga atras di e Culture and Heritage City di San Nicolas, unda cu ATA tabata un miembro instrumental den e plataforma cu tabatin. Despues di e reunion a tuma decision conhunto riba e aspecto di ‘branding’ pa San Nicolas. Lo acerca ministernan encarga cu Cultura y Transporte cu ta forma e 4 ministerionan cu ta sumamente importante pa e desaroyo na San Nicolas, segun e relato ta informa Lo reuni y percura pa continuidad di e trabounan cu tabata tuma luga.
Den e reunion cu ATA a papia riba cierto proyectonan cu lo pone enfasis riba dje. Manera e arte di Lolita, di Changa y Uncle Louis Store. Ya caba a combersa cu Fundacion Museo Arubano (FMA), cu tambe ta cla pa continua cu e proceso pa haci di Nicolaas Store un museo di comunidad na San Nicolas, minister Oduber ta informa. “Asina poco poco ta mira cu ta piki e diferente proyectonan aki cu no a wordo continua, pero cu ta importante pa desaroyo di turismo na Aruba.”
