Gobierno ta sostene proyecto pa estudio di profesionalisacion di psicologonan pa GZ psycoloog

Ayera tardi na Bureau Multidisciplinaire Centrum a tuma luga e ceremonia di firmamento di cuater profesional cu lo continua cu un estudio pa bira GZ psycholoog. Minister di Enseñansa, Gerlien Croes tambe tabata presente pa asina oficialmente concretisa e proyecto aki. Alabes tambe a tuma luga firmamento di e acuerdo di cooperacion entre MDC, Bureau Multidisciplinario di Aruba y Orthopedagogish Centrum.

Minister Croes a splica cu esaki ta un desaroyo cu a bin ta cana pa algun tempo caba. El a remarca cu no ta desconoci den comunidad, principalmente ora ta yega na desaroyo di mucha y hobennan, e retonan cu tin. El a subraya cu no solamente na Aruba, pero rond mundo tin un necesidad inmenso pa psicologonan, pero specialmente GZ psycoloog.

“Awe mi ta kere ta un inicio di un proceso nobo unda nos ta brinda trahadonan cu tin cu dedica na e formacion di e mucha y hobennan, un trabou cu nan tambe ta haya oportunidad pa specialisa nan mes, cu ta un necesidad grandi,” el a enfatisa.

E mandatario a indica cu ora cu nan a combersa den comunidad, pero tambe ora ta papia cu scol y docentenan, ta mira e necesidad cu tin den e kader aki. El a sigura cu e concretisacion di e proyecto aki ta habri porta pa crea oportunidad pa e profesionalnan di e veld por keda profesionalisa nan mes.

“Sin esaki nan no por brinda e miho di nan mes tampoco na desaroyo di nos comunidad. Mas cu claro tur e desaroyonan positivo aki ta carga sosten di parti di Gobierno di Aruba p’esey nos ta oficialisa un acuerdo unda cu oficialmente e ta ser concretisa cu e proyecto aki ta inicia, aunke cu e estudio a cuminsa caba,” el a remarca.

Minister Croes a enfatisa cu ta un desafio awendia den e mundo actual pa por keep up cu tur locual ta influencia e desaroyo di e mucha y hobennan, y hasta di ciudadanonan. El a indica cu tin hopi cos cu ta fuera di e alcance di e hende cu ta influencia ee mucha y hobennan y esey ta rekeri un necesidad inmenso pa nan por tin un bon sosten y aporte, y guia ora cu nan haya nan mes den situacionnan dificil.

El a splica cu fuera di e proceso nobo cu a cuminsa oficialmente pa capacita e profesionalnan y sigui profesionalisa nan mes como GZ psycoloog, e ta un señal cla tambe cu e prioridadnan cu tin na e momento aki nan tin cu bay realmente duna prioridad na nan.

E mandatario a subraya cu e concretisacion di proyecto aki ta un stap grandi y alabes un stap chikito den tur e stapnan cu falta pa tuma.

“Mi ta kere cu sigur ora cu tin algo positivo mester duna continuacion na dje. Ohala cu den e tempo nos dilanti nos por ofrece hopi mas profesional den e sector e oportunidad aki cu na final di dia nan por duna di nan banda back na esnan cu tin mas mester di dje. Laga nos semper keda den tur e retonan cu nos por encontra toch positivo y realisa nos mes cu si nos no zet nos mes in pa e tipo di stapnan aki nada no lo cambia tampoco,” el a enfatisa.

Minister Croes a indica cu e ta spera cu pa mayornan eventualmente esaki por ta un alivio. “Cada sosten cu bo ta duna na e chikito, na e hoben, e ta un alivio pa cada mayor cu tin cu deal diariamente cu e retonan aki su mes,” el a agrega.

El a splica cu pa loke ta e topico di sosten psicologico y sosten den e area di salud mental na Aruba ta uno cu tin un necesidad hopi grandi. El a remarca cu ta importante pa siña papia abiertamente di esaki den comunidad.

“Laga mi duna pabien na tur esnan cu a encamina e proceso, pero mas tur cos tambe na nos profesionalnan. Keep it up, zet door. Aworaki e ta oficial, mi ta spera cu poco poco nos por bay crea y habri mas porta pa boso y tur otro colega tambe cu ta den e veld. E necesidadnan ta grandi, nos mester ta optimista por ta nos no por haci tur cos pareu, pero si mientras cu nos ta tuma stapnan den e caminda corecto nos lo logra,” el a enfatisa.