Siman pasa a tuma un reunion di Conseho di Minister di Reino (Rijksministerraad, RMR), y prome minister demisionario, Evelyn Wever-Croes, a comenta na un portal noticiero local cu tur cos ta indica cu Aruba su desaroyonan recien ta satisfactorio pa Hulanda, y ta di spera cu den proximo reunion lo aproba e siguiente prestamo pa Aruba.

Wever-Croes a comenta den un relato di portal noticiero online, NoticiaCla, cu Conseho di Minister di Reino a mustra ‘satisfecho’ cu e avancenan cu a tuma luga na Aruba, a pesar cu nos isla ta actualmente den pleno campaña electoral pa eleccion diabierna proximo. “Awor e siguiente paso ta pa Tweede Kamer aproba e fiansa pa nos hay’e”, Wever-Croes a comenta den e relato. “Ta spera cu den juli nos lo hay’e, manera nos a planea.”

Ta trata aki di 181 miyon florin cu Aruba ta spera di ricibi den tercer kwartaal den prestamo cu cero interes for di Hulanda. Despues cu Conseho di Minister di Reino aproba e prestamo, esaki ta pasa na Tweede Kamer pa un aprobacion final. Manera ta conoci, Conseho di Minister di Reino a reuni diabierna ultimo y durante e reunion aki a trata e siguiente tranche di sosten pa e islanan di Reino Hulandes. Manera Wever-Croes a expresa, tur indicacion t’ey cu e placa pa tercer kwartaal lo wordo aproba sin problema proximo luna.

Pa por maneha a consecuencianan di e pandemia di Covid-19, Aruba, Corsou y St. Maarten a ricibi sosten di likides den forma di prestamo cu cero interes for di Hulanda desde comienso di 2020, suheto na implementacion di e landspakket cu reforma y e supervision di esaki. E rekisito pa sosten di likides ta wordo evalua cada kwartaal hunto cu e implementacion di e landspakket pa cada isla. E sosten di likides den tercer kwartaal di 2021 ta trata di e di seis tranche di e ayudo aki, segun ta splica den un relato di e portal noticiero CuracaoChronicle.

Sinembargo, ningun di e islanan aki ta cumpli completamente cu e condicionnan pa e tranche aki. Pa Aruba, ta trata di varios punto menor, y Conseho di Minister di Reino a duna aprobacion pa e di seis tranche.

Esaki mientras cu e otro dos pais autonomo den Reino, St. Maarten y Corsou, a haya algun dificultad cu e condicionnan pa ricibi e prestamo di Hulanda. Manera Bon Dia Aruba a reporta siman pasa, despues cu un disputa tocante bon maneho corporativo relaciona cu Aeropuerto Internacional Prinses Juliana a keda resolvi satisfactoriamente pa Royal Schiphol Group (RSG), e isla a ricibi e Naf. 39 miyon cu ya tabata conta cu aprobacion di RMR.
Mientras cu ainda no tin confirmacion di Corsou lo bin na remarca pa e ayudo cu a solicita ultimo, mirando cu tin varios ley cu mester pasa den Parlamento prome cu e isla por bin na remarca pa mas ayudo di Hulanda.

 

LEAVE A REPLY

Please enter your comment!
Please enter your name here