Den un momento historico pa Aruba, Prome Minister Mike Eman, hunto cu Prome Minister Hulandes Dick Schoof, a duna di conoce cu e isla ta tumando e paso pa desmantela permanentemente e ex refineria di petroleo na San Nicolas. E sitio cu pa decadas a forma e curason industrial di Aruba, lo ser haci limpi y re-desaroya como parti di un futuro economico sostenibel.

E anuncio a tuma luga durante un reunion special na e refineria. E presencia di Prome Minister Schoof, kende tabata na caminda pa un conferencia internacional na Colombia, a ser mira pa Gobierno di Aruba como un muestra di compromiso y respet.

“Nos ta aprecia grandemente e hecho cu Prome Minister Schoof a pone algun ora disponibel pa asisti personalmente na e momento simbolico aki”, asina Prome Minister Eman a duna di conoce. “E ta subraya e lasonan fuerte den Reino y e respet mutuo entre Aruba y Hulanda”.

Prome Minister Eman a señala cu Parlamento, cu e mocion De Meza, a yega na un logro importante den historia di e isla. E decision pa cera e refineria y remedia e sitio ta marca e fin di un era cu a cuminsa casi un siglo pasa.

“Ora e refineria di petroleo a bin Aruba den añanan 1920, el a trece prosperidad, desaroyo, y empleo”, prome minister Eman a indica. “El a forma e fundeshi pa nos sociedad multicultural y crecemento economico. Pero awe nos ta na un crusada nobo, caminda nos ta scoge sostenibilidad, innovacion y desaroyo orienta na futuro.”

Segun e mandatario, haci limpiesa y redesaroyo di e sitio inmenso di e refineria ta un reto enorme pa un isla chikito manera Aruba, tanto financieramente como tecnicamente. No obstante, e ta mira sosten mundial pa e decision, ya cu e transicion pa energia sostenibel ta andando mundialmente.

“Mundo ta pasando den un transicion energetico. Y cu un isla chikito manera Aruba ta dicidi di desmantela un di e refinerianan di petroleo mas grandi di mundo y transform’e pa un futuro sostenibel ta un paso balente y inspirativo,” el a declara.

Durante e presentacion conhunto, Prome Minister Schoof a duna di conoce cu Hulanda ta prepara pa brinda sosten tecnico na Aruba pa e desmantelacion compleho y redesaroyo di e sitio.

“Nos sa cu e proyecto aki lo tuma añas y ta rekeri hopi conocemento specialisa,” Schoof a bisa. “Hulanda ta para cla pa provee ​​expertonan cu por yuda diseña, plania y maneha e transicion aki, garantisando cu e ta ser hiba na e manera mas transparente y eficiente.”

Prome Minister Eman a enfatisa cu e sosten no ta trata di ayudo financiero directo pa e limpiesa, pero primordialmente di acceso na e conocemento tecnico y experiencia di maneho necesario pa un proyecto asina grandi.

Ademas di e cooperacion tecnico, Schoof a anuncia tambe un aporte financiero substancial di e Fondo di Energia: Hulanda lo inverti 53.6 miyon euro—e ekivalente di mas o menos 110 miyon florin —den fortificacion di e red di coriente di Aruba.

“Un red di coriente confiabel y potente ta esencial pa e transicion pa energia berde,” Schoof a splica. “Esaki ta mesun berdad na Hulanda cu e ta aki na Aruba. E inversion aki ta sigura cu Aruba ta prepara pa e transicion energetico y e integracion di fuentenan di energia sostenibel.”

Prome Minister Hulandes a enfatisa cu e decision di Aruba pa caba cu e era industrial basa riba petroleo ta un acto di curashi. “Sostenibilidad ta rekeri decisionnan balente. E decision di e gabinete no solamente ta importante pa Aruba, pero tambe un ehempel pa henter Caribe. E ta demostra cu un nacion chikito por duna un aporte significativo na metanan mundial di clima,” el a agrega.

E refineria di San Nicolas, un tempo un di esnan mas grandi na mundo, a hunga un rol crucial den desaroyo di Aruba. Miles di Arubiano tabata traha eynan, y e fabrica tabata hasta strategicamente importante durante Segundo Guera Mundial. Toch, e compleho a cay den deterioro durante e ultimo decadanan, y intentonan pa habri esaki back no a duna resultado duradero.

Segun Prome Minister Emna, e gobierno actual ta mira e ceramento no como un perdida, pero como un oportunidad pa reusa e area. El a remarca cu e futuro redesaroyo lo brinda espacio pa negoshinan inovativo, tecnologia berde, y diversificacion economico.

“Nos kier transforma e area den un fuente di oportunidadnan nobo,” el a bisa. “E mester bira un luga unda energia sostenibel, educacion, y empresario ta bini hunto pa haci Aruba cla pa futuro.”

E reunion tabatin nificacion simbolico tambe. Pa tanto Aruba como Hulanda, e momento a reafirma e relacion estrecho dentro di Reino Hulandes. Mientras cu ambos bandera tabata bula banda di otro, e lidernan a expresa nan aprecio pa e cooperacion y solidaridad entre e islanan y e madre patria Europeo.

“Den temponan turbulento pa nos region, ta importante pa e comunidad di Aruba sinti e calor y proteccion di nos conexion dentro di Reino. E hecho cu nos ta para aki hunto ta demostra cu nos ta comparti responsabilidad pa seguridad, stabilidad, y desaroyo di nos islanan,” Prome Minister Eman a subraya.

E declaracionnan conhunto di Eman y Schoof ta marca no solamente e inicio di un proyecto di remediacion grandi pero tambe un cambio di rumbo mas amplio pa Aruba. For di un isla cu un tempo tabata prospera riba zeta, pa un pais cu tin como meta pa crece a traves di sostenibilidad, conocemento y innovacion.

Aruba como Modelo den Region di Caribe

Cu su decision pa desmantela e refineria di petroleo y enfoca riba redesaroyo sostenibel, Aruba ta posiciona su mes como un pionero den region di Caribe. Mientras cu hopi isla ainda ta depende hopi riba combustibel fossiel, Aruba ta comprometi cu fuentenan di energia renobabel manera solar, biento, y posiblemente hidrogeno.

E isla a pone su mes e meta pa logra un suministro di energia completamente sostenibel den e proximo decadanan. E ambicion aki ta alinea cu metanan internacional di clima, incluyendo limita keintamento global na 1.5 grado Celsius. Colaboracion cu Hulanda ta ofrece no solamente experticio tecnico pero tambe acceso na rednan internacional y oportunidadnan di inversion.

Segun Prome Minister Eman, esaki ta e momento pa traduci vision den accion; “Aruba ta mustra cu hasta un isla chikito por haci un diferencia grandi. Nos escogencianan awe ta determina e futuro di nos yiunan y nos planeta.”

Cu e decision historico aki, Aruba ta skirbiendo un capitulo nobo den su historia.