ORANJESTAD – Diamars ultimo minister di Deporte Dangui Oduber hunto cu colega Minister di Infrastructura Otmar Oduber a reuni cu e actornan den e mundo di motorsport pa trata e futuro di Raceway Palo Marga.
E federacion nobo lo tin e mandato pa organisa eventonan teniendo na cuenta tur reglanan stipula, y lo tin e deber pa mantene e pista tambe.Palo Marga su tereno ta hopi grandi y p’esey e federacion nobo lo bay percura pa no solamente organisa evento di drag race, pero tambe otro diciplinanan manera motorcross, drifting y den futuro go Karting.
Manera ta conoci gobierno a cera e pista di Palo Marga algun tempo atras pa motibonan cu a haya raportnan negativo di DVG, DOW y DIP y no tabata tin ningun organisacion cu ta carga responsabilidad pa maneho di e pista.
Durante di e reunion e actornan den motorsport a haya e oportunidad pa duna nan input. Tabata tin entre otro lidernan di drag race, motorcross, drifting y go karting. Gobierno a propone pa lanta un federacion cu lo bay dirigi e tereno di Palo Marga. Ora cu e federacion aki keda institui deportenan di motorsport tambe por bin na remarke pa haya subsidio di “Sport Subsidie Aruba” (SSA) via e federacion, asina e minister Dangui Oduber a duna di conoce.
E actornan di motorsport a keda hopi agradeci cu gobierno pa yama e reunion y a bay di acuerdo na un manera unanime pa cuminsa e proceso pa lanta e federacion. Segun e mandatario den 2 siman lo por tin un acuerdo firma esta un MOU entre gobierno y e actornan di motorsport. Esaki sigur ta un otro logro grandi y di e manera aki cu hechos gobierno ta mustra cu tin deporte na pecho.
